Sihlabelelo 149

₁Simakadze mhlabeleleni ingoma lensha,

nimdvumise ebandleni lalabangcwele.

₂Israyeli akajabule ngenca yeMdali wakhe,

bantfu beSiyoni batfokote ngeNkhosi yabo.

₃Abadvumise ngekugidza

nangesigubhu nangehabhu.

₄Simakadze uyasijabulela sive sakhe,

labatitfobako ubapha umchele wekuncoba.

₅Labangcwele abahlabele ngebukhosi,

bahlabele ngenjabulo bonkhe busuku.

₆Shangatsi emaphimbo abo

angadvumisa Nkulunkulu,

netandla tabo

tihlome inkemba lekhalipha

tinhlangotsi totimbili.

₇Khona batewuphindzisela kubetive,

bajezise nebahedeni,

₈babophe nemakhosi abo ngemaketane,

netikhulu tabo batibophe ngabozankosi,

₉batewufeza sijeziso sabo

njengobe kubhaliwe.

Loku kuludvumo

lwalabangcwele bakhe bonkhe.

Haleluya, dvumisani Simakadze!