Sihlabelelo 148

₁Dvumisani Simakadze

nine mazulu laphakeme,

nidvumise Simakadze

nani lenisezulwini.

₂Mdvumiseni nine tingilosi takhe,

nimdvumise nani nonkhe mabutfo akhe.

₃Mdvumise wena langa, nawe nyanga,

nimdvumise nani nonkhe

tinkhanyeti letikhatimulako!

₄Mdvumiseni nine mazulu laphakeme,

nani manti langetulu kwesibhakabhaka.

₅Konkhe akudvumise libito laSimakadze,

ngobe wakhuluma kwadaleka.

₆Wakumisa etindzaweni tako

phakadze naphakadze,

wakushayela umtsetfo longenakweciwa.

₇Dvumisani Simakadze nine lenisemhlabeni,

nani tilwane letesabekako taselwandle,

nawe kujula kwelwandle,

₈nawe mlilo nesangcotfo,

nelichwa, netinkhungu,

nemoya lonemandla lolalela imiyalo yakhe.

₉Mdvumiseni nine magcuma netintsaba tonkhe,

nimdvumise nani tihlahla tetitselo,

nani nonkhe mahlatsi,

₁₀nine tilwane tesiganga netekufuywa,

nani lenihamba ngesisu,

netinyoni letindizako.

₁₁Mdvumiseni nine makhosi netive tonkhe,

nimdvumise nani tikhulu

nebabusi bonkhe bemhlaba,

₁₂nani majaha netintfombi,

nani labadzala nalabancane.

₁₃Bonkhe abadvumise libito laSimakadze,

ngobe lakhe kuphela libito leliphakeme;

inkhatimulo yakhe ingetulu

kwemhlaba nelizulu.

₁₄Sive sakhe usivusele insindziso,

kuze kudvunyiswe

bonkhe labangcwele bakhe,

lekusive saka-Israyeli,

lesisedvute naye.

Haleluya, dvumisani Simakadze!