Sihlabelelo 147

₁Haleluya, dvumisani Simakadze!

Maye, kuhle kuhlabela kuNkulunkulu wetfu.

Kumnandzi, futsi kufanele

kutsi advunyiswe!

₂Simakadze wakha iJerusalema kabusha,

ubutsa labasakatekile baka-Israyeli.

₃Labanetinhlitiyo letephukile uyabaphilisa,

abophe emanceba abo.

₄Ubala inombolo yetinkhanyeti,

atibite tonkhe ngemabito ato.

₅Mkhulu Simakadze wetfu,

nemandla akhe makhulu,

kuhlakanipha kwakhe akunakulinganiswa.

₆Simakadze uyabaphakamisa labatfobekile,

kepha lababi ubehlisela phansi.

₇Hlabelani kuSimakadze ngekubonga;

dvumisani Nkulunkulu wetfu

ngekushaya ihabhu.

₈Yena losibekela sibhakabhaka ngemafu,

alungisele umhlaba imvula,

ahlumise tjani etintsabeni.

₉Tilwane utipha kudla,

afunte emazini emahhwabayi nasalambile.

₁₀Simakadze akatfokotiswa

ngemandla emahhashi emphi;

nemasotja lahlomile lahamba ngetinyawo angeke amjabulise.

₁₁Simakadze ujatjuliswa ngulabamesabako

nalabetsemba umusa wakhe.

₁₂Awu, Jerusalema,

dvumisa Simakadze!

Awu, Siyoni,

dvumisa Nkulunkulu wakho!

₁₃Ngobe nguye

locinisa imivalo yemasango akho,

abusise bantfu bakho,

₁₄ente iminyele yakho ibe nekuthula,

anesutsise ngakolweni lomnandzi.

₁₅Ukhipha umyalo wakhe uye emhlabeni,

livi lakhe ligijima ngalamakhulu ematubane.

₁₆Ukhitsikisa lichwa njengeboya betimvu,

asakate sitfwatfwa njengemlotsa,

₁₇ehlise sangcotfo sakhe njengetinhlavu.

Ngubani nje longemelana nemakhata akhe?

₁₈Utfumela livi lakhe likuncibilikise,

avuse umoya wakhe,

emanti agobhote.

₁₉Wembula livi lakhe kuJakobe,

timiso nemiyalo yakhe ku-Israyeli.

₂₀Kute sive lake wenta njalo kuso,

kute sive lesake sati timiso takhe.

Haleluya, dvumisani Simakadze.