Sihlabelelo 12

₁Awu, Simakadze, sisindzise!

Sekute bantfu labacotfo,

ngobe labetsembekile sebanyamalele.

₂Bantfu bayayengana la emhlabeni,

tilimi tabo tisheleliswa ngemanga,

inkhulumo yabo imphacambili.

₃Shangatsi Simakadze angatihhumbula

letindzebe letitigabatisa kakhulu,

ajube lulwimi loluncemphetako.

₄Shangatsi Simakadze angabajuba tilwimi

laba labakhuluma bachoshe batsi:

“Sigabe ngelulwimi lwetfu sitawutikhulumela,

iphi leyo nkhosi lengasikhona tsine?”

₅Simakadze-ke yena utsi:

“Njengobe timphuya setichwagiwe,

nanjengobe tihlupheki timpintjekile,

ngitakuta ngimephule lowo lofuna lusito,

bese ngimbeka endzaweni lengenangoti.”

₆Emavi aSimakadze ate sici,

endlula isiliva lehlantisisiwe,

yahlanjululwa ngemlilo kasikhombisa.

₇Wena, Simakadze, utasilondvolota

usivikele kulababi.

₈Lababi bayahambahamba;

bubi sebaba ligugu kubantfu.