Sihlabelelo 115

₁Yenta kungabi ngitsi, Simakadze,

yenta kungabi ngitsi,

kepha akudvunyiswe libito lakho

ngenca yemusa wakho

nangenca yekwetsembeka kwakho.

₂Kungani betive batsi:

“Sewushonephi loNkulunkulu wabo?”

₃Phela, Nkulunkulu wetfu usemazulwini,

wenta konkhe lakutsandzako.

₄ Kodvwa tithico tebetive

tentiwa ngesiliva nangegolide,

tingumsebenti wetandla temuntfu.

₅Tinemilomo, kodvwa atikhulumi,

tinemehlo, kodvwa atiboni.

₆Tinetindlebe, kodvwa ativa,

tinemakhala, kodvwa atiliva liphunga.

₇Tinetandla, kodvwa atiphatsi,

tinetinyawo, kodvwa atihambi.

Tite nemalakanya emiphinjeni yato.

₈Laba labatentako bafanana nato,

bonkhe labetsembele kuto bafanana nato.

₉Awu, Israyeli,

yetsembelani kuSimakadze.

Nguye longumsiti wenu nesihlangu senu!

₁₀Awu, wena ndlu yaka-Aroni,

beka litsemba lakho kuSimakadze.

Nguye longumsiti wakho nesihlangu sakho!

₁₁Nine lenesaba Simakadze, yetsembelani kuye.

Nguye longumsiti wenu nesihlangu senu!

₁₂Simakadze usikhumbulile, utasibusisa;

utayibusisa nendlu yaka-Israyeli,

ayibusise nendlu yaka-Aroni.

₁₃Utababusisa bonkhe labamesabako Simakadze,

labancane nalabakhulu.

₁₄Shangatsi Simakadze anganandzisela

nine kanye nebantfwabenu.

₁₅Shangatsi ningabusiswa nguSimakadze,

yena lowenta lizulu nemhlaba.

₁₆Emazulu ayindzawo yaSimakadze,

yena yedvwa,

kodvwa umhlaba wawuniketela kubantfu.

₁₇Nkulunkulu akadvunyiswa ngulabafile;

yebo, akadvunyiswa ngulabo

lase bathula emathuneni.

₁₈Kodvwa tsine, lesiphilako,

siyawumbonga Simakadze,

kusukela manje kuze kube phakadze.

Haleluya, dvumisani Simakadze.