Sihlabelelo 114

₁Mhlazana baka-Israyeli baphuma eGibhithe,

mzukwana indlu yakaJakobe

iphuma kubantfu

labakhuluma lolunye lulwimi,

₂Juda waba sive lesingcwele saSimakadze,

Israyeli waba sive lesibuswa nguye.

₃Lwandle Lolubovu lwakubona loku lwabaleka,

umfula iJordane wema,

wangete wageleta.

₄Tintsaba tatjakadvula

njengetimbuti,

emagcuma atjekula

njengemazinyane etimvu.

₅Kwenteke njani kuwe,

Lwandle Lolubovu,

kutsi bewungaze ubaleke?

Nawe Jordane, wentiwe yini

kuma ungageleti?

₆Nine-ke tintsaba,

nitjakadvuleleni njengetimbuti?

Nani magcuma,

nitjekuleleni njengemazinyane etimvu?

₇Mhlaba, tfutfumela embikwaSimakadze,

yebo, embikwaNkulunkulu waJakobe.

₈Simakadze ugucula lidvwala

libe lichibi lemanti,

ancibilikise tiphongotja tetintsaba

tibe ngimitfombo yemanti.