Sihlabelelo 111

₁Haleluya, dvumisani Simakadze!

Ngiyawubonga Simakadze

ngenhlitiyo yami yonkhe,

ngimbonge emihlanganweni yalabacotfo,

neyalabangcwele.

₂Mikhulu imisebenti yaSimakadze!

Iphenywa ngibo bonkhe

labatfokota ngayo.

₃Imisebenti yakhe inebukhosi neludvumo,

nekulunga kwakhe kume ingunaphakadze.

₄Wente timangaliso takhe

kutsi tikhumbuleke.

Simakadze unemusa nebubele.

₅Ubapha kudla labo labamesabako,

sivumelwane sakhe uyasikhumbula

phakadze naphakadze.

₆Sive sakhe usikhombise

emandla emisebenti yakhe,

wasinika emave aletinye tive.

₇Imisebenti yetandla takhe yetsembekile,

futsi ilungile;

yonkhe imitsetfo yakhe yetsembekile.

₈Ayinawugucuka phakadze naphakadze,

yentiwa ngeliciniso nangekulunga.

₉Sive sakhe wasitfumelela kuhlengwa,

wemisa sivumelwane sakhe

kuze kube phakadze.

Lingcwele liyesabeka libito lakhe.

₁₀Kwesaba Nkulunkulu sicalo sekuhlakanipha.

Bonkhe labahamba ngemitsetfo yakhe

banengcondvo lenhle.

Umelwe kudvunyiswa

phakadze naphakadze.