Sihlabelelo 107

₁“Dvumisani Simakadze,

ngobe yena muhle,

nemusa wakhe ume

kuze kube phakadze.”

₂Labahlengwe nguSimakadze abasho njalo,

bona labo labahlengwe

emandleni ebacindzeteli babo.

₃Wababutsa emaveni onkhe

emphumalanga nasenshonalanga,

enyakatfo naseningizimu.

₄Labanye bazulazula ehlane, kalashameshame,

kepha abazange batfole

ngisho nemuti wekungenisa.

₅Balamba, boma,

umphefumulo wabo waphela emandla kubo.

₆Base bakhala kuSimakadze

basesekulolo lusizi lwabo,

wabephula kulo.

₇Wabahola ngendlela lecondzile

kutsi bahambe baze befike emtini

lababengangenisa kuwo.

₈Akabongwe Simakadze ngemusa wakhe,

ngekwentela bantfu

imisebenti lemangalisako:

₉Ngobe wenelisa umuntfu lowomile,

lolambile umesutsisa ngalokuhle.

₁₀Labanye babehleti ebumnyameni

nasetfuntini lekufa,

baboshwe tinsizi netinketane,

₁₁ngobe baphambana nemavi aNkulunkulu,

bakwedzelela kuyalwa

kwaLosetikwako Konkhe.

₁₂Yebo, wabayendzisa ngekudvonsa kamatima,

basakateka phansi, kwabate lobasitako.

₁₃Base bakhala kuSimakadze

basesekulolo lusizi lwabo,

wabasindzisa kulo.

₁₄Wabakhipha kulobo bumnyama

nakulelo tfunti lekufa,

wajuba tibopho letatibabophile.

₁₅Akabongwe Simakadze ngemusa wakhe,

ngekwentela bantfu

imisebenti lemangalisako:

₁₆Ngobe wafohla emasango elitfusi,

wajuba nemishudvo yetinsimbi.

₁₇Labanye baba tilima

ngenca yekona nebubi babo

behlelwa kuhlupheka.

₁₈Tinhlitiyo tabo taba mnyama,

behluleka kudla,

ngako bondza bacishe bafa.

₁₉Base bakhala kuSimakadze

basesekulolo lusizi lwabo,

wabasindzisa kulo.

₂₀Wakhipha umyalo wakhe, wabaphilisa,

wabenta bagejwa kufa.

₂₁Akabongwe Simakadze ngemusa wakhe,

ngekwentela bantfu

imisebenti lemangalisako.

₂₂Abanikele ngemihlatjelo yekubonga,

bamemetele imisebenti yakhe ngenjabulo.

₂₃Labanye babehla benyuka

ngemikhumbi elwandle,

babephila ngekuhweba.

₂₄Bayibona imisebenti yaSimakadze,

netimangaliso takhe ekujuleni kwalo.

₂₅Wakhuluma kwavuka sivunguvungu,

sadlondlobalisa emagagasi elwandle.

₂₆Abatsatsa abajika etulu,

aphindza abagoboncisela ekujuleni,

badzimate batfutfumeliswa kwesaba.

₂₇Badzayitela, bayendza,

njengemuntfu nadzakiwe,

lwati lwabo lwefika

lapho luphela khona.

₂₈Base bakhala kuSimakadze

basesekulolo lusizi lwabo,

wabakhulula kulo.

₂₉Wathulisa kubhenguta kwelwandle,

emagagasi alo abindza.

₃₀Batfokota ngobe kwase kuba nekuthula,

wabaholela esikhumulweni

lababecondze kuso.

₃₁Akabongwe Simakadze ngemusa wakhe,

ngekwentela bantfu

imisebenti lemangalisako.

₃₂Abamphakamise emkhambatsini wesive,

bamdvumise emhlanganweni webaholi.

₃₃Imifula wayigucula yaba lihlane,

tiyalu toma taba lubhubhushi,

₃₄live lelivundzile laba lugagadvu

ngenca yebubi betakhamiti talo.

₃₅Wagucula lihlane laba ngumena,

umhlaba lowomile wamila tiyalu.

₃₆Kulapho abeka khona labalambile,

bacaba, bakha khona imiti yabo,

bahlala batinta.

₃₇Balima emasimi, bahlanyela tivini,

bavuna sivuno lesikhulu.

₃₈Wababusisa, bandza kakhulu,

netifuyo tabo tandza kakhulu.

₃₉Babuye bancipha baphunguka,

ngenca yekucindzetelwa nangekuhlushwa,

₄₀watsela kwedzelewa etikwetikhulu,

wabazulazulisa ehlane lelite indlela.

₄₁Kodvwa waphakamisa labamphofu

wabakhipha elusizini,

wenta imindeni yaba njengemihlambi yetimvu.

₄₂Labacotfo bayakubona loku bajabule,

kodvwa bonkhe lababi bayathula.

₄₃Lohlakaniphile akacaphele letintfo,

bantfu abayicondzisise imisebenti

yemusa waSimakadze.