Sihlabelelo 1

₁Ubusisiwe umuntfu

longatitsatsi teluleko tebedukisi

longahlanganyeli emikhubeni yetigangi,

longahlali nasemkhambatsini

walabaphukuta Nkulunkulu.

₂Kodvwa kujabula kwakhe

kusemtsetfweni waSimakadze,

uyacabanga azindle ngawo imini nebusuku.

₃Unjengesihlahla lesihlanyelwe

elusentseni lwemifula,

sona sitsela titselo ngesikhatsi sato

emacembe aso akabuni.

Konkhe lakwentako kuyaphumelela.

₄Lababi-ke bona abanjalo,

banjengemakhoba wona lapheshulwa ngumoya.

₅Ngako-ke, lababi bangeke bakhone

kubhekana nesihlalo sekwehlulela,

netoni tingeke tikhone

kuma kanye nalabalungile bakhe.

₆Ngobe Simakadze uyayinakekela

indlela yalabalungile,

kodvwa indlela yalababi

iya ekubhujisweni.