Taga 8

₁Utsi kambe kuhlakanipha akumemeti yini?

Kona kucondza akuliphakamisi yini liphimbo lako?

₂Kume embonisweni eceleni kwemgwaco;

kume nasemahlanganweni emigwaco.

₃Kumemeta kakhulu emasangweni elidolobha

nasetimphundvwini temasango kutsi:

₄“Bonkhe bantfu abalalele kimi,

ngikhuluma kubo bonkhe.

₅Yeyi nine leningakakhuli engcondvweni,

fundzani nikhule ekuhlakanipheni.

Nine lenilibele,

buyisani tingcondvo tenu.

₆Lalelani kimi, ngobe ngitawukhuluma tintfo letibalulekile;

emlonyeni wami kutawuphuma liciniso.

₇Yebo, konkhe lengikukhulumako kuliciniso;

emavi ebubi ngiyawatondza.

₈Konkhe lengikukhulumako kwetsembekile;

kute lokugwegwile,

kute nalokungemanga.

₉Kumuntfu lonekucondza,

konkhe kucondzile;

kulabanelwati, konkhe kuyakhanya.

₁₀Khetsani imfundziso yami kunesiliva,

nikhetse lwati lwami kunegolide lecengiwe.

₁₁“Ngobe kuhlakanipha kuncono kunematje laligugu;

kute umcebo longawulinganisa nako.

₁₂Mine lengikuhlakanipha,

ngingumnikati webucotfo;

lwati nemicabango lemihle kwami.

₁₃Kwesaba Simakadze kukutondza lokubi.

Ngiyakutondza kutigcabha,

neluchuku,

nekutiphatsa dlephu, nebumbulu.

₁₄Kweluleka lokuhle nekwehlulela kahle kwami,

kucondza kanye nemandla kwami.

₁₅Emakhosi abusa kahle ngami,

nebabusi bashaya umtsetfo ngami.

₁₆Bonkhe lababusa ngekungakhetsi basitwa ngimi,

nome ngabe tikhulu nome tindvuna.

₁₇Ngiyabatsandza laba labangitsandzako,

nalabo labangifunisisako bayangitfola;

₁₈batfola ngami ingcebo neludvumo,

babutfole ngami bunjinga lobungapheli

kanye nekuchuma.

₁₉Labakutfola kimi kuncono kunegolide lecengiwe,

sitselo sami sendlula isiliva lecengiwe.

₂₀Ngihamba endleleni yekulunga,

yebo, emikhondvweni yebumsulwa.

₂₁Ngibahlobisa ngekuceba labo labangitsandzako,

tikhwama tabo batigcwalise ngemali.

₂₂“Simakadze wangidala,

ngaba wekucala emisebentini yakhe,

ngaba wekucala endalweni yakhe,

ngiwasendvulo.

₂₃Ngemiswa phakadze, ekucaleni,

umhlaba ungakadalwa.

₂₄Ngatalwa, kusete ngisho nekujula kwetilwandle,

kusete tiyalu temanti lageletako.

₂₅Tintsaba tisengakasekelwa etindzaweni tato,

nemagcuma asengabibikho,

mine ngase ngikhona,

₂₆umhlaba nemave abesengakakwenti,

ngisho nelitsantsana lemhlabatsi imbala.

₂₇Ngangikhona mhlazana amisa emazulu,

mhlazana abeka umkhatsi

ehlukanisa sibhakabhaka netilwandle,

₂₈mhlazana asimisa emafu etulu,

acinisa imitfombo yetilwandle,

₂₉mhlazana asika imincele yetilwandle,

kuze emanti angalengci livi lakhe,

mhlazana abeka tisekelo temhlaba,

₃₀ngangiseceleni kwakhe,

njengengcweti yekwakha.

Nganginentfokoto lenkhulu onkhe emalanga,

ngijabula embikwakhe njalonjalo.

₃₁Ngangidlalisela umhlaba wakhe,

ngijabulela bantfu bonkhe.

₃₂“Manje-ke, madvodzana ami, ngilaleleni,

babusisiwe labo labagcina imiyalo yami.

₃₃Lalelani imfundziso yami,

ningayedzeleli;

nitawuhlakanipha.

₃₄Ubusisiwe umuntfu longilalelako,

longilindzela onkhe malanga emasangweni ami,

logadza etimphundvwini teminyango yami.

₃₅Umuntfu lotfola mine utfola kuphila,

utakwemukela kutsandvwa nguSimakadze;

₃₆kodvwa logeja kungitfola,

utilimata yena,

bonkhe labangitondzako batsandza kufa.”