Taga 31

₁Leti-ke taga taLemuweli, inkhosi yaseMasa, latifundziswa ngunina:

₂“Lalela, ndvodzana yami, ndvodzana yesisu sami! Wena uyimphendvulo yemthandazo wami. ₃Emandla akho ungawacitsi kulabasikati; yebo, emandla ekuphila kwakho ungawacitseli kulabo lababhubhisa emakhosi. ₄Lalela-ke, Lemuweli: Emakhosi kufanele angalinatsi liwayini nome ngabe yini lokudzakanako. ₅Nase banatsa bayayikhohlwa lemitsetfo lebekiwe, bese bakhohlwa emalungelo alabacindzetelwe. ₆Tjwala bebantfu labafako kanye nalabo labaselusizini. ₇Bayekele banatse batewudzakwa bakhohlwe tinhlupheko tabo, bangalukhumbuli lusizi lwabo.

₈“Khuluma ubemelele labo labehluleka kutikhulumela. Vikela emalungelo alabo labangenalusito. ₉Khuluma wehlulele kahle. Vikela emalungelo alabeswele nalabamphofu.”

₁₀Ngubani longatfola umfati sibili? Uligugu lelengca onkhe ematje laligugu.

₁₁Indvodza yakhe yetsembele kuye ngenhlitiyo yayo yonkhe, futsi ingeke yeswele lutfo.

₁₂Uyentela lokuhle ngaso sonkhe sikhatsi sekuphila kwakhe, akayenteli lokubi.

₁₃Ukhetsa insontfo lenhle nakotini lokahle, asebente ngetandla letivumako.

₁₄Njengemikhumbi yebahwebi, kudla kwemndeni wakhe ukulandza khashane.

₁₅Uvuka kungakasi alungisele umndeni wakhe kudla, bese wabela tidzandzane takhe imisebenti.

₁₆Utsi angatfola indzawo, ayitsenge ngemali latentele yona ngetandla takhe, bese uyayilima wenta sivini.

₁₇Ukhutsele, uyabhukula afinyete tidvwaba, acinise tandla, asebente.

₁₈Uyacaphelisisa kutsi umsebenti wakhe uyayingenisa yini inzuzo, asebente kuze kube ngusebusuku.

₁₉Uyatitfungela atelukele.

₂₀Unesandla ekusiteni labamphofu, aphe nalabeswele.

₂₁Kukhitsika kwelitulu akumetfusi, ngobe bonkhe bemndeni wakhe banetimphahla letifutfumalako.

₂₂Wenta tembeso temibhedze, embatse timphahla letentiwe ngakotini locolisakele naletibukhwebeletane.

₂₃Indvodza yakhe iyahlonishwa emasangweni, lapho ingulenye yemalunga emsumphe khona.

₂₄Utfunga tingubo ngendvwangu lecolisakele, bese utsengisela bahwebi.

₂₅Wembetse emandla nekuhlonipheka, futsi akesabi lutfo ngelikusasa.

₂₆Ukhuluma kuhlakanipha, lulwimi lwakhe lugcwele teluleko temusa.

₂₇Ucaphelisisa konkhe lokwenteka ekhaya lakhe, akavilaphi.

₂₈Bantfwabakhe bayamhlonipha, nendvodza yakhe futsi iyamdvumisa idzimate itsi:

₂₉“Banyenti bafati labenta tintfo letinhle, kodvwa wena ubendlula bonkhe.”

₃₀Buhle buyayengana, nekubukeka kulite; kodvwa umfati lowesaba Simakadze ufanele kudvunyiswa.

₃₁Mbonge ngako konkhe lakwenta ngetandla takhe; umdvumisele imisebenti yakhe layentile ngisho nasemkhatsini webantfu.