Taga 23

₁Nangabe umbusi akumeme kutsi utekudla naye, ubokhumbula kutsi ungubani lowo mmemi wakho. ₂Nawulambile, tibambe ungadli. ₃Ungakuhawukeli kudla lakunika kona nome kumnandzi kanganani, tibambe; kungahle kube lugibe.

₄Caphela ungatibulali ngekucoshana nebunjinga; tsatsa kuhlakanipha nekutibamba. ₅Bunjinga buyawunyamalala emehlweni akho ububuka; buyawushesha bundize njengelusweti.

₆Ungadli nemuntfu lowemanako; ungakuhaleli nekudla kwakhe nome kungaba mnandzi kanganani. ₇Nawukudla lokudla, kuyawukubamba emphinjeni. Ungamuva atsi: “Dlani, unatse,” kantsi inhlitiyo yakhe ayikho lapho. ₈Uyawukuhlanta naloko lokuncane lokudlile, ukhandze kutsi ubongele lite.

₉Ungasicitsi sikhatsi sakho ngekukhuluma intfo lenengcondvo esilimeni, ngobe singeke siwemukele lamavi akho.

₁₀Ungayisusi iminyele lese yabekwa kadzeni nome-ke udle live letintsandzane. ₁₁UMvikeli wato unemandla, uyakutitsatsela sikhundla emelane nawe.

₁₂Yenta ingcondvo yakho yemukele imiyalo, ulalelisise loko lofundziswa kona.

₁₃Ungesabi kumcondzisa umntfwana; ngobe nawumfaka luswati, angeke afe. ₁₄Kumshaya ngeluswati kuyawusindzisa imphilo yakhe ekufeni.

₁₅Ndvodzana yami, nangabe unekuhlakanipha enhlitiyweni yakho, inhlitiyo yami iyawujabula. ₁₆Ngiyawutfokota enhlitiyweni yami, nangiva ukhuluma emavi ekuhlakanipha.

₁₇Ungahawukeli lutfo etonini, kodvwa yesaba Simakadze ngetikhatsi tonkhe; ₁₈ngobe likusasa lakho liyawuba nekuciniseka nemphumelelo.

₁₉Ndvodzana yami, lalela; ubolalela, khona utekuhlakanipha. Ingcondvo yakho yibeke endleleni lengiyo sibili. ₂₀Ungabi ngumngani wetidzakwa nome timiti. ₂₁Tidzakwa netimiti tiphetsa ngebuphuya. Nawuphila ngekulala ungasebenti, uyawugcina wembatsa emanikiniki.

₂₂Lalelisisa uyihlo, ngobe nguye lowakutala; ungamedzeleli nenyoko ngobe asagugile.

₂₃Tsenga liciniso ungatsengisi ngalo. Zuza kuhlakanipha, nemiyalo, nekucondza konkhe; ungakhohlwa ngiko.

₂₄Uyise wendvodzana lelungile uyajabula; nangabe indvodzana ihlakaniphile, uyise uyatfokota.

₂₅Yenta uyihlo nenyoko batigcabhe ngawe; yebo, ajabule nenyoko lowakutala.

₂₆Ndvodzana yami, ngilalele utigcine ngekunakekela tindlela tami. ₂₇Tingwadla tingumgodzi lojulile, nemfati losiphingi ulugibe lolubulalako. ₂₈Betsiya emadvodzana ebantfu bawabhacele emasitseleni njengetigebengu, batfumbe emadvodza lamanyenti bawente angasetsembeki.

₂₉Ngubani lotsi: “Maye?” Ngubani lonelusizi? Ngubani lonenkhani? Ngubani lokhononako? Ngubani lonemanceba nemihuzuko ngelite? Ngubani lonemehlo labovu? ₃₀Ngulabo labacitsa sikhatsi lesinyenti ekunatseni liwayini lelidzakanako netjwala. ₃₁Nome liwayini libila, nome lihaza, nome limnandzi lehla ngesiphundvu, kodvwa libalekele. ₃₂Ekugcineni liluma njengenyoka, linhlonhlotse njengesitfozi selibululu. ₃₃Emehlo akho ayawubona tintfo letingekho, emlonyeni wakho kuphume emavi langenamcondvo. ₃₄Liyawukwenta uve shangatsi untanta emagagasini elwandle nome njengemuntfu lolele etsala letintsambo letiboshelwe ensikeni yemkhumbi. ₃₅Utawutsi: “Bangilimatile, kodvwa angikabuva buhlungu; bangishayile, kodvwa angikhumbuli. Nginelibhabhalazi, ngifuna kuyawunatsa futsi.”