Numeri 15

₁Simakadze wakhuluma kuMosi, watsi: ₂“Khuluma kuma-Israyeli utsi: ‘Nase ningene eveni lenginipha lona kutsi libe likhaya lenu, ₃nibobe seniletsa iminikelo leyentiwa ngemlilo kuSimakadze, ibe yetinkhomo, nome yetimbuti, nome yetimvu, kube liphunga lelinuka lusi lolumnandzi kuSimakadze. Kungaba ngumnikelo wekushiswa, nome umhlatjelo wekugcwalisa setsembiso lesitsite, nome umnikelo wesihle, nome iminikelo yemikhosi. ₄Lowo loletsa umnikelo wakhe utawuletsa kuSimakadze umnikelo walokutinhlavu ngemalitha langaba mabili afulaha lobhicwe nemafutsa emncumo langaba yilitha. ₅Lungisa liwayini lelingaba yilitha ngelizinyane lemvu, libe ngumnikelo wekushiswa nome wemhlatjelo, kutsi liwayini libe ngumnikelo wesinatfo. ₆Nawunikela ngesihhanca, bhica fulaha wemnikelo walokutinhlavu longemakhilogremu langaba mabili labhicwe nemafutsa emncumo langaba yilitha nencenye, ₇kunikelwe kanye neliwayini lelingaba yilitha nencenye, kube ngumnikelo wesinatfo. Kunikele kube liphunga lelinuka lusi lolumnandzi kuSimakadze. ₈Nawulungisa inkunzana kutsi ibe ngumnikelo wekushiswa nome ibe ngumhlatjelo wesetsembiso lesitsite nome semnikelo wekuthula kuSimakadze, ₉uyawuyiletsa kanye nemnikelo walokutinhlavu kube ngufulaha longemalitha langaba sitfupha nencenye lobhicwe nemafutsa emncumo langemalitha langaba mabili, ₁₀kanye neliwayini lelingemalitha langaba mabili, lemnikelo walokunatfwako kube ngumnikelo lowentiwa ngemlilo, liphunga lelinuka lusi lolumnandzi kuSimakadze.

₁₁“ ‘Kutabonikelwa kanjalo-ke, nakunikelwa ngenkunzi, nome ngesihhanca, nome ngelizinyane lemvu nome lembuti. ₁₂Ngulowo nalowo mnikelo ubowentela loko kuye ngebunyenti bawo. ₁₃Wonkhe um-Israyeli wekutalwa kufanele ente njalo nakaletsa umnikelo lowentiwa ngemlilo, kube liphunga lelinuka lusi lolumnandzi kuSimakadze. ₁₄Nakwenteka nome ngunini wetive lohlala emkhatsini wenu, nome kukwesikhashana nome sikhatsi lesidze, aletsa umnikelo lowentiwa ngemlilo, kube liphunga lelinuka lusi lolumnandzi kuSimakadze, naye kufanele ente njengobe nani nenta. ₁₅Sive siyawuba nemtsetfo lofananako: wenu kanye newebetive labahlala emkhatsini wenu. Leso-ke simiso setitukulwane ngetitukulwane. Nine nebetive niyawufanana embikwaSimakadze. ₁₆Imitsetfo nemiyalo yenu iyawusebenta ngalokufananako kini nakubetive labasemkhatsini wenu.’ ”

₁₇Simakadze wakhuluma kuMosi, watsi: ₁₈“Khuluma kuma-Israyeli utsi: ‘Nase ningene eveni lenginipha lona, ₁₉kufanele nehlukanisele Simakadze sabelo sakhe, nanidla sinkhwa salelo live. ₂₀Kufanele sinkhwa setilinga tenu tekwendvulelisa nisetfule njengemnikelo wesivuno senu sekucala ekubhuleni kwenu. ₂₁Tonkhe titukulwane tenu seniyawunikela kuSimakadze umnikelo wetivuno tenu tekwendvulelisa.

₂₂“ ‘Nangabe kwenteka nona ngesiphosiso ngekungayigcini lemiyalo Simakadze layinika Mosi, ₂₃konkhe loko Simakadze laniyala ngako ngaMosi kusukela mhlazana Mosi acala kuniyala kuye embili titukulwane ngetitukulwane, ₂₄nakwenteka-ke nona ngesiphosiso, nangabe sive sonkhe besingati, kufanele sive sinikele ngenkunzana yinye ibe ngumnikelo wekushiswa, liphunga lelinuka lusi lolumnandzi kuSimakadze, kanye nemnikelo walokutinhlavu, nemnikelo walokunatfwako, kanye nesiphongo sinye kube ngumnikelo wesono. ₂₅Umphristi uyakwenta inhlawulo yekubuyisana kwesive sonkhe sema-Israyeli siyawube sesiyatsetselelwa, ngobe sone ngesiphosiso, futsi sitsite ngekona kwaso sasesiletsa kuSimakadze umnikelo lowentiwa ngemlilo kanye nemnikelo wesono. ₂₆Sonkhe sive sema-Israyeli kanye nebetive labahlala emkhatsini waso bayawutsetselelwa, ngobe sonkhe lesive sone ngesiphosiso.

₂₇“ ‘Kodvwa nangabe kone umuntfu munye ngesiphosiso, uyawuletsa sibhutatana lesinemnyaka munye budzala, sibe ngumnikelo wesono. ₂₈Umphristi uyawukwentela lowo muntfu lowone ngesiphosiso inhlawulo yekubuyisana naSimakadze. Nase amentele leyo nhlawulo yekubuyisana naSimakadze, lowo muntfu uyawube sewuyatsetselelwa. ₂₉Lowo mtsetfo wekona ngesiphosiso uyawusebenta ngalokufananako, nome ngabe kone um-Israyeli wekutalwa nome ngabe wetive.

₃₀“ ‘Kodvwa umuntfu lowona ngemabomu, nome angewemdzabu nome angewetive, uyawuba nelicala lekungahloniphi Simakadze, uyawuncunywa esiveni sakubo. ₃₁Njengobe lomuntfu wedzelele livi laSimakadze, wephula lomunye wemitsetfo yakhe ngemabomu, kufanele ancunywe; licala lakhe libe setikwakhe.’ ”

₃₂Atsi ema-Israyeli asesehlane, kwatfolakala indvodza itfota tinkhuni ngelilanga leliSabatha. ₃₃Labo labayikhandza itfota tinkhuni bayitsatsa bayimikisa kuMosi na-Aroni nesive sonkhe, ₃₄bayivalela esitokisini, ngobe kwakungakakhanyi kahle kutsi kufanele kwentiweni kuyo. ₃₅Simakadze wakhuluma kuMosi, watsi: “Lendvodza kufanele ife. Sive sonkhe kufanele siyigcobe ngematje, siyigcobele ngephandle kwenkambu.” ₃₆Ngako-ke sive sayitsatsa sayikhiphela ngephandle kwenkambu, sayigcoba ngematje yaze yafa, njengobe Simakadze abeyale Mosi.

₃₇Simakadze wakhuluma kuMosi, watsi: ₃₈“Khuluma kuma-Israyeli, utsi: ‘Kuto tonkhe titukulwane tenu letiyawulandzela kufanele nente timvakaza emiphetfweni yetingubo tenu ngelucotfo loluluhlata njengesibhakabhaka. ₃₉Niyawutsi nanitibuka letimvakaza, bese nikhumbula yonkhe imiyalo yaSimakadze, niyilalele, khona ningetiwuba tingwadla ngekudvonswa tinkhanuko tetinhlitiyo tenu netemehlo enu. ₄₀Niyawukhumbula kulalela yonkhe imiyalo yami, nibe ngulabehlukaniselwe Nkulunkulu wenu. ₄₁NginguSimakadze, Nkulunkulu wenu lowanikhipha eGibhithe, kutsi ngibe nguNkulunkulu wenu. NginguSimakadze, Nkulunkulu wenu.’ ”