Numeri 11

₁Sive sacala sasola Simakadze ngenca yetinhlupheko taso; watsi kube asive, lulaka lwakhe lwabavutsela. Watfumela umlilo lowavutsa emkhatsini wabo, waze washisa nalababesemaphetselweni enkambu. ₂Batsi kube bantfu bakhale kuMosi, wase uthandaza kuSimakadze, umlilo wacima. ₃Ngako-ke lendzawo yabitwa ngekutsi iThabera, ngobe umlilo waSimakadze wavutsa emkhatsini wabo.

₄Kukhona bantfu betive lababesemkhatsini wema-Israyeli, lababekhala ngekukhanuka inyama. Nawo ema-Israyeli akhala, atsi: “Ngubani lotasipha inyama sitekudla? ₅Sesikhumbule eGibhithe lapho sasidla khona inhlanti mahhala, sasidla emaselwa, nemajoti, nashaladi na-anyanisi, negalikhi. ₆Kodvwa nyalo sesilahlekelwe lutsandvo lwekudla. Kute kudla lapha, ngaphandle kwalemana!”

₇Imana yayifanana nenhlanyelo lencane lemhlophe, kufanane nemanafu. ₈Bantfu babehamba bayewubutsa, bese bayakusila esigayweni setandla nome etjeni lekusila. Babekupheka ngelibhodo nome bente ngako emacebelengwane. Kwakunambitseka njengekudla lokuphekwe ngemafutsa emncumo. ₉Ngesikhatsi kwehla ematolo ebusuku enkambu, nemana yayehla kanye nawo.

₁₀Mosi weva bantfu emindenini yonkhe balila, ngulaba nalaba emnyango welithende labo. Simakadze watfukutsela wabilelana; naMosi waphatseka kabi emoyeni ngaloko. ₁₁Wabuta kuSimakadze watsi: “Inceku yakho uyiletseleleni lokuhlupheka? Ngenteni lembi kuwe, kutsi ungaze ungeleke ngalomtfwalo wabo bonkhe labantfu? ₁₂Bemitfwa ngimi yini bonkhe labantfu? Batalwa ngimi yini, kutsi ungaze ungitjele kutsi angibagone ngemikhono njengesidzandzane nasiphetse luswane, ngize ngiyewubangenisa eveni lowaletsembisa bokhokho babo ngesifungo? ₁₃Ngingayitsatsaphi nje inyama lengenela bonkhe labantfu? Bayangikhalela batsi: ‘Siphe inyama sitekudla.’ ₁₄Anginawo emandla ekwetfwala bonkhe labantfu, ngobe bangumtfwalo lomatima kakhulu lapha kimi. ₁₅Nangabe utangiphatsa kanjena, ngiyacela kutsi usale sewungibulala khona manje nje, nangizuze umusa ebusweni bakho, khona ngingasayiwuphindze ngibone lusizi lwami.”

₁₆Simakadze wakhuluma kuMosi, watsi: “Letsa baholi bema-Israyeli labangema-70 lobatiko kutsi babaholi netiphatsimandla emkhatsini walabantfu. Baletse lapha ethendeni lekuhlangana, kutsi batekuma lapha kanye nawe. ₁₇Ngitakwehla ngitewukhuluma nawe lapho, ngitsatse lokunye lokukwaMoya lokukuwe ngikunike bona. Batakusita ekwetfwaleni umtfwalo walesive kanye nawe, khona ungetikwetfwala wedvwa. ₁₈Tjela labantfu utsi: ‘Tihlambululeni nitilungiselele likusasa; kukhona inyama lenitayidla kusasa kona loku. Simakadze univile nanikhala nitsi: “Ngubani longasipha inyama sitekudla? Sasincono eGibhithe.” Manje-ke Simakadze utanipha inyama, futsi vele nitayidla. ₁₉Ningeke niyidle lilanga linye, nome lamabili, nome lasihlanu, nome lalishumi nome langema-20, ₂₀kodvwa niyakuyidla inyanga yonkhe, ize iphume nangemakhala, inenyanyise, ngobe senimlahlile Simakadze losemkhatsini wenu, nakhala kuye natsi: “Empeleni saphumelani khona lena eGibhithe?” ’ ”

₂₁Kodvwa Mosi wakhuluma watsi: “Naku lapha ngihola emadvodza lati-600 000, lahamba ngetinyawo, kodvwa ujinge utsi: ‘Ngitawubanika inyama labatayidla inyanga yonkhe!’ ₂₂Beyingabenela yini inyama kube bekungahlatjwa yonkhe imihlambi yetimvu, netimbuti, netinkhomo? Betingabenela yini tona tinhlanti tonkhe telwandle lebetingabanjelwa bona?”

₂₃Simakadze waphendvula Mosi watsi: “Sandla saSimakadze sifishane yini? Utase ubone-ke kutsi loku lengikushoko kutakwenteka ngempela yini kuwe, nome cha!”

₂₄Ngako-ke Mosi waphuma wayawutjela sive konkhe labekutjelwe nguSimakadze. Wahlanganisa bonkhe baholi lababengema-70, wabemisa batungeleta lithende lekukhontela. ₂₅Simakadze wase uyehla asekhatsi efini, wakhuluma naye. Wase utsatsa lokunye kwaMoya lokwakukuMosi, wakubeka etikwalabaholi labangema-70. Watsi kube Moya ahlale etikwalabaholi, baphrofetha, kodvwa abazange baphindze baphrofethe.

₂₆Lababili balabaholi labangema-70, bo-Eldadi neMedadi, bona babesele enkambu, bangakayi ethendeni lekuhlangana. Nabo behlelwa nguMoya baphrofetha. ₂₇Kwaphuma lelinye lijaha lagijima layawubikela Mosi, lafike latsi: “Bo-Eldadi naMedadi bayaphrofetha lena enkambu.”

₂₈Joshuwa, umsa waNuni, labengumsiti waMosi kusukela ebusheni bakhe, wakhuluma kuMosi, watsi: “Nkhosi yami, Mosi, bathulise!”

₂₉Mosi wamphendvula, watsi: “Unemona yini ngami? Ngifisa shangatsi sonkhe sive saSimakadze ngabe sibaphrofethi nekutsi Simakadze abeke Moya wakhe kuso.” ₃₀Mosi nabo bonkhe baholi besive sema-Israyeli bancandzeka babuyela enkambu.

₃₁Masinyane Simakadze wakhuphula umoya lomkhulu ngaselwandle waletsa tigwaca leteta tindizela phansi kuphakama lokungaba limitha linye kusuka emhlabatsini, tacondza ngasenkambu tichamuka ngenhla nangentasi, tatungeleta inkambu; kusuka ngala kwato kuya ngale kwakungaba luhambo lwelilanga linye ngetinyawo. ₃₂Ngalelo langa bantfu basukuma bagola letigwaca lonkhe lilanga nebusuku balo, ngisho nangakusasa kwakhona, kute noko lowagola ngaphansi kwemakhilogremu labengaba yinkhulungwane. Bateneka ngephandle kwenkambu. ₃₃Kwatsi naleyo nyama yabo isegcwele umlomo, bangakayihlafuni nekuyihlafuna, lulaka lwaSimakadze lwabavutsela wabashaya ngesifo lesimatima. ₃₄Ngako-ke libito laleyo ndzawo kwabe sekutsiwa yiKhibrothi Hathava, ngobe lapho ngulapho bangcwaba bantfu lababehahela kudla.

₃₅Sive satfutsa eKhibrothi Hathava, sahamba saze semisa eHaserothi, lapho sefika sahlala khona.