Makho 13

₁Watsi Jesu nakaphuma ethempelini, lomunye webafundzi bakhe watsi kuye: “Mfundzisi, asewubuke lamatje naletakhiwo kutsi takheke kahle kangakanani.”

₂Jesu watsi kuye: “Uyatibona yini letakhiwo letinkhulu? Kute nalinye litje leliyawusala lisetikwalelinye lelingayiwudzilitelwa phansi.”

₃Jesu abehleti eNtsabeni Yemincumo abhekene nelithempeli. BoPhetro, naJakobe, naJohane, na-Andreya bambuta babodvwana naye batsi: ₄“Ase usitjele kutsi kuyakwenteka nini loko? Kuyakwentekani lokuyawuba sibonakaliso saleso sikhatsi sekuphela?”

₅Jesu wabatjela watsi: “Caphelani kutsi kubete lonedukisako. ₆Kuyawuta labanyenti egameni lami batsi: ‘Nginguye!’ Ngaloko bayakwedukisa labanyenti. ₇Naniva emahemuhemu etimphi, netindzaba tetimphi, ningetfuki, ngobe letintfo tifanele kutsi tenteke, kodvwa noko umhla wekuphela uyawube ungakefiki. ₈Sive siyawuvukela lesinye sive, umbuso uvukele lomunye umbuso, kuyawuba nekutamatama kwemhlaba tindzawo ngetindzawo, kuyawuba netindlala. Loko kuyawube kukucala kwetinsizi, kube njengemhelo walomsikati nasatawuteta.

₉“Ticapheleni nine, ngobe bayawunimangalela etinkantolo, niyawushaywa emasinagogeni, nimiswe embikwebabusi nemakhosi ngenca yami, nize nibeke bufakazi ngami kubo. ₁₀LiVangeli kufanele lishunyayelwe etiveni tonkhe kucala. ₁₁Nabanimikisa etinkantolo baninikele, ningahlupheki ngekucabanga kutsi niyawutsini, kodvwa shanoni loko leniyakuphiwa ngalowo mzuzu, ngobe kuyawube kungasesini leniyakube nikhuluma, kodvwa Moya Longcwele uyakukhuluma ngemilomo yenu. ₁₂Umuntfu uyawunikela umnakabo ekufeni, neyise umntfwanakhe, bantfwana bayawuvukela batali babo bababulalise. ₁₃Niyawutondvwa ngabo bonkhe ngenca yeligama lami. Kepha lowo loyawucinisela kuze kube ngusekugcineni, uyakusindziswa.”

₁₄“Kodvwa nanibona ‘Sinengisoncitsakalo’ eme endzaweni lengakamfaneli,” (lofundzako akacaphele inchazelo yaloku), “labo labaseJudiya ababalekele etintsabeni. ₁₅Naloyabe asetikwendlu angabe asehla, angasangeni nasendlini yakhe kuyawutsatsa timphahla takhe. ₁₆Losensimini angasabuyeli emuva kuyawutsatsa kwekwembatsa kwakhe. ₁₇Maye kulabo labayawube batetfwele, nalabo labayawube bamunyisa ngalawo malanga! ₁₈Thandazelani kutsi loko kungete kwenteka ebusika. ₁₉Ngobe kulawo malanga kuyawuba netinhlupheko letinkhulu, letingazange setibekhona kusukela ekucaleni kwendalo yaNkulunkulu kudzimate kube ngulamuhla, futsi tingeke tiphindze tibe khona. ₂₀Kube futsi Nkulunkulu abengakawafinyeti lawo malanga, kute namunye labeyawusindziswa; kodvwa ngenca yalabakhetfwe nguye wawafinyeta lawo malanga.

₂₁“Ngaleso sikhatsi nakufika lomunye atsi kini: ‘Ase nibuke, nangu Khristu,’ nome atsi: ‘Nanguya,’ ningamkholwa. ₂₂Bokhristu bemanga nebaphrofethimbumbulu batawuvela bakhombise tibonakaliso netimangaliso kuze kwedukiswe nalabakhetsiwe, nakunekwenteka.

₂₃“Kodvwa caphelani, ngobe senginitjele konkhe loku kungakenteki.”

₂₄“Ngalawo malanga emvakwaleto tinhlupheko,

₂₆“Lapho-ke bayawuyibona iNdvodzana yeMuntfu ita ngemafu inemandla lamakhulu nebukhosi. ₂₇Iyawutfumela tingilosi tayo kutsi tiyewubutsa labo labakhetsiwe bayo emimoyeni yomine, nasemikhawulweni yonkhe yemhlaba.”

₂₈“Ase nifundze sifundvo esihlahleni semkhiwa. Ngesikhatsi emagala aso advumba, bese sihluma emacembe, niyabe seniyati kutsi seletfwese lihlobo. ₂₉Kanjalo-ke nani, nanibona letintfo tenteka, nibokwati kwekutsi iNdvodzana yeMuntfu seyisedvute, seyingasemnyango.

₃₀“Ngicinisile, ngitsi kini: Lesitukulwane singeke sendlule kungakenteki konkhe loku. ₃₁Kuyakwendlula lizulu nemhlaba, kodvwa emavi ami wona angeke endlule.”

₃₂“Kepha noko kute lowatiko kutsi lelo langa nalelo awa kuyawufika nini. Netingelosi tasezulwini atati, neNdvodzana ayati; nguYise kuphela lokwatiko loko. ₃₃Caphelani nilindze, ngobe anati kutsi leso sikhatsi siyawufika nini. ₃₄Kufanana nendvodza leyayitawuya khashane; yatsi nase itawusuka ekhaya, yabeka tisebenti tayo etikhundleni tato, nguleso nemsebenti waso lotsite. Yayala umgcini welisango kutsi alindze kahle. ₃₅Ngako-ke lindzani, ngobe animati umnikati wendlu kutsi uyawubuya nini. Angahle abuye ebusuku nome ekhatsi nebusuku, angabuya ekukhaleni kwekucala kwelichudze, nome ekuseni. ₃₆Nakefika ningakamlindzeli, akanganikhandzi nilele. ₃₇Loku lengikusho kini, ngikusho kubo bonkhe ngitsi: Lindzani.”