Matewu 28

₁EmvakweliSabatha, ekuseni ngeluvivi ngeliSontfo, Mariya waseMagdala nalomunye Mariya baya kuyawubona lithuna. ₂Kwaba khona kutamatama kwemhlaba lokukhulu, ingilosi yeNkhosi yehla ezulwini, yaligicita lelitje, yase ihlala etikwalo. ₃Lengilosi yayinjengembane, timphahla tayo tatimhlophe njengesitfwatfwa. ₄Kepha balinidzi befikelwa kwesaba, bachachatela, baze baba njengalabafile.

₅Ingilosi yatsi kulabafati: “Ningesabi, ngiyati kutsi nifuna Jesu labebetselwe esiphambanweni. ₆Akekho lapha; uvukile, njengobe abeshito. Wotani nitewubona indzawo lapho abelele khona. ₇Hambani masinyane niyewutjela bafundzi bakhe nitsi: ‘Sewuvukile kulabafile, nyalo nje sewusembili kunani uya eGalile; nitawumbona khona.’ Nibokukhumbula loku lenginitjela kona.”

₈Base basheshe bayesuka ethuneni, ngobe babesaba, kantsi futsi babejabule kakhulu, bagijima bayawutjela bafundzi bakhe.

₉Jesu wefika kubo watsi: “Kuthula akube kini!” Beta kuye, bambamba tinyawo, base bakhuleka kuye. ₁₀Jesu watsi kubo: “Ningesabi! Hambani nibikele bomnaketfu kutsi, abahambe baye eGalile, bayawungibona khona.”

₁₁Batsi labafati basahamba, bancandzeka, labanye balindzi baya edolobheni, babikela baphristi labakhulu ngako konkhe lokwase kwentekile. ₁₂Kwatsi baphristi labakhulu netibondza nasebahlangene bakha lisu, banika balindzi imali lenkhulu, ₁₃batsi: “Nibotsi: ‘Bafundzi bakhe befike ebusuku, baseba sidvumbu sakhe, tsine sisatunywe butfongo.’ ₁₄Lusibalukhulu nakuva loko, tsine siyawumchazela, eve kahle, ningahlupheki nine.”

₁₅Balindzi bayitsatsa lemali, benta njengobe babetjeliwe. Kuze kube ngulamuhla emaJuda abambelele kulawo mavi.

₁₆Kepha bafundzi labali-11 baya kulentsaba yaseGalile, lapho Jesu abebatjele kutsi baye khona. ₁₇Batsi nabambona bakhuleka kuye, noko labanye babo babesangabata. ₁₈Jesu wasondzela kubo watsi: “Ngiphiwe emandla onkhe ezulwini nasemhlabeni. ₁₉Ngako-ke hambani, nente tive tonkhe tibe bafundzi bami, nibabhabhatise egameni leYise, neleNdvodzana, nelaMoya Longcwele, ₂₀nibafundzise kugcina konkhe lenginiyale ngako. Nibokwati kutsi mine nginani onkhe emalanga, kuze kube ngusekupheleni kwetikhatsi.”