Matewu 16

₁BaFarisi nebaSadusi beta kuJesu batemlinga, bamcela batsi akabakhombise sibonakaliso lesivela ezulwini. ₂Kepha yena wabaphendvula watsi: “Nalishonako lilanga, niyaye nitsi: ‘Litawubalela, ngobe sibhakabhaka sibhejile.’ ₃Nasekuseni niye nitsi: ‘Lamuhla litakuna, ngobe sibhakabhaka sibhejile sinemafu.’ Niyakwati kuchaza simo sesibhakabhaka, kepha anikwati kuchaza tibonakaliso tesikhatsi? ₄Situkulwane lesibi nalesiphingako ngekungetsembeki kuNkulunkulu sifuna sibonakaliso, kepha ngeke sisitfole ngisho nasinye ngaphandle kwesibonakaliso saJona.”

Wesuka lapho, wahamba.

₅Batsi nabewelela ngesheya kwelwandle, bafundzi bakhohlwa kuphatsa sinkhwa. ₆Jesu watsi kubo: “Nibocaphela, ningangenwa yimbiliso yebaFarisi nebaSadusi!”

₇Base bakhuluma bodvwana batsi: “Usho ngobe asikatiphatsi tinkhwa.”

₈Kepha Jesu akwati loko watsi kubo: “Nine bantfu bekukholwa lokuncane, nentiwa yini kutsi nikhulumisane nodvwana ngekutsi kwentiwa ngobe nite tinkhwa? ₉Anikeva namanje? Anikhumbuli yini mhlazana ngihlephula tinkhwa letisihlanu, letesutsisa emadvodza lati-5 000, nekutsi ngacwalisa emabhasikidi lamangaki? ₁₀Tona letinkhwa letisikhombisa letesutsisa emadvodza lati-4 000, niyatikhumbula yini? Nagcwalisa emabhasikidi lamangaki? ₁₁Aniboni ngani kutsi bengingakhulumi kini ngesinkhwa? Kepha caphelani imbiliso yebaFarisi nebaSadusi!”

₁₂Base bayabona bafundzi kutsi abengasho yona imbiliso yesinkhwa, kepha abesho timfundziso tebaFarisi nebaSadusi.

₁₃Jesu wesuka lapho, waya eveni lelisedvute nelidolobha laseKhesariya Filiphi, lapho afike wabuta bafundzi bakhe watsi: “Bantfu batsi iNdvodzana yeMuntfu ingubani?”

₁₄Bamphendvula batsi: “Labanye batsi inguJohane uMbhabhatisi, labanye batsi ingu-Elija, kantsi labanye batsi inguJeremiya nome ingulomunye nje webaphrofethi.”

₁₅Wababuta watsi: “Nine-ke, nitsi ngingubani?”

₁₆Simoni Phetro waphendvula watsi: “UnguKhristu, iNdvodzana yaNkulunkulu lophilako.”

₁₇Jesu waphendvula watsi kuye: “Ubusisiwe wena Simoni waJohane, ngobe loko awukakwembulelwa ngumuntfu kepha nguBabe losezulwini. ₁₈Nami-ke ngitsi: UnguPhetro. Etikwalelidvwala ngiyakulakha libandla lami, nemandla ekufa angeke alehlule. ₁₉Ngiyawukunika tikhiya tembuso wasezulwini; lotakubopha lapha emhlabeni kuyawube kuboshiwe nasezulwini; nako konkhe lotakukhulula lapha emhlabeni kuyawube kukhululiwe nasezulwini.”

₂₀Ngako wabayalisisa bafundzi bakhe kutsi bangatjeli muntfu kutsi unguKhristu.

₂₁Kusukela lapho Jesu wacala wakhuluma ngalokusebaleni nebafundzi bakhe watsi: “Kufanele ngiye eJerusalema, ngiyewuhlushwa tibondza telibandla, nebaphristi labakhulu, nebafundzisi bemtsetfo. Ngitawubulawa, kodvwa ngelilanga lesitsatfu ngiyawuvuswa.”

₂₂Phetro wase umdvonsela eceleni wamekhuta watsi: “Nkhosi, Nkulunkulu akakusite, loku kungete kwenteka kuwe!”

₂₃Jesu wagucuka watsi kuPhetro: “Suka kimi, Sathane! Usitsikameti kimi, ngobe awukuboni lokukwaNkulunkulu, kodvwa ubona kwebantfu!”

₂₄Jesu wakhuluma kubafundzi bakhe watsi: “Umuntfu nakafuna kungilandzela, akatidzele, etjatse siphambano sakhe, angilandzele. ₂₅Lofuna kusindzisa imphilo yakhe, uyawulahlekelwa ngiyo; kepha lolahlekelwa yimphilo yakhe ngelibito lami, uyawuyitfola. ₂₆Ngobe kuyawumsita ngani umuntfu kutfola live lonkhe, kepha alahlekelwe ngumphefumulo wakhe? Ingabe angakhiphani umuntfu kuhlenga umphefumulo wakhe? ₂₇Ngobe iNdvodzana yeMuntfu iyawufika ngenkhatimulo yeYise, ikanye netingilosi tayo, ngulapho-ke iyawukhokhela wonkhe umuntfu njengekwenta kwakhe. ₂₈Ngicinisile, ngitsi kini: Kukhona labanye la emkhatsini wenu labangeyikuva kufa, badzimate bayibone iNdvodzana yeMuntfu ita embusweni wayo.”