Matewu 1

₁Lona ngumlandvo wekutalwa kwaJesu Khristu, labesitukulwane saDavide, naye abesitukulwane sa-Abrahama.

₂Abrahama watala Isaka; Isaka watala Jakobe; Jakobe watala Juda kanye nabomnakabo. ₃Juda watala boPheresi naZara, unina wabo bekunguThamari; Pheresi watala Hesroni; Hesroni watala Ramu; ₄Ramu watala Aminadaba; Aminadaba watala Nasoni; Nasoni watala Salmoni; ₅Salmoni watala Bowazi kuRahabi; Bowazi watala Obedi kuRuthe; Obedi watala Jese; ₆Jese watala inkhosi Davide.

Davide watala Solomoni, unina abengumfati wa-Uriya; ₇Solomoni watala Rehobhowamu; Rehobhowamu watala Abiya; Abiya watala Asafa; ₈Asafa watala Josafati; Josafati watala Joramu; Joramu watala Oziya; ₉Oziya watala Jothamu; Jothamu watala Ahazi; Ahazi watala Hezekiya; ₁₀Hezekiya watala Manase; Manase watala Amoni; Amoni watala Josaya; ₁₁Josaya watala Jekhoniya nabomnakabo, ngesikhatsi bantfu baka-Israyeli batfunjwa bayiswa eBhabhulona.

₁₂Emvakwekutfunjwa kwabo kuya eBhabhulona Jekhoniya watala Sheyaltiyeli; Sheyaltiyeli watala Zerubhabheli; ₁₃Zerubhabheli watala Abiyudi; Abiyudi watala Eliyakimu; Eliyakimu watala Azori; ₁₄Azori watala Sadoki; Sadoki watala Akhimu; Akhimu watala Eliyudi; ₁₅Eliyudi watala Eliyezeri; Eliyezeri watala Mathani; Mathani watala Jakobe; ₁₆Jakobe watala Josefa, indvodza yaMariya, unaboJesu lobitwa ngekutsi nguKhristu.

₁₇Tili-14 titukulwane kusukela ku-Abrahama kuya kuDavide. Kusukela kuDavide kuya esikhatsini sekutfunjwa kwabo kuya eBhabhulona nakhona tili-14. Kusukela esikhatsini sekutfunjelwa eBhabhulona kuya esikhatsini saKhristu nakhona tili-14.

₁₈Kutalwa kwaJesu Khristu kwaba nje-ke: Kwatsi Mariya unina asamiselwe Josefa, basengakahlangani, watfolakala asakhuleliswe nguMoya Longcwele. ₁₉Kepha Josefa, indvodza yakhe, abengumuntfu lolungile, akatsandzanga kumtsela ngelihlazo. Wacabanga, asafuna kumlahla ngasese. ₂₀Kodvwa asakucabanga loko, kwefika ingilosi yeNkhosi kuye ngeliphupho yatsi: “Josefa, ndvodzana yaDavide, ungesabi kumtsatsa Mariya umkakho, ngobe loko lakukhulelwe kwaMoya Longcwele. ₂₁Mariya utakutala indvodzana uyetse libito utsi nguJesu, ngobe nguye loyakusindzisa bantfu bakhe etonweni tabo.”

₂₂Konkhe loku kwentekela kugcwalisa loko lokwashiwo yiNkhosi ngemphrofethi lowatsi: ₂₃“Bheka, intfombi iyawukhulelwa itale indvodzana, libito layo kuyawutsiwa ngu-Imanuweli,” lokusho kutsi: “Nkulunkulu unatsi.”

₂₄Josefa nakavuka ebutfongweni, wenta njengaloku ingilosi yeNkhosi imtjelile; watsatsa Mariya waba ngumkakhe. ₂₅Kodvwa akazange ahlangane naye waze watubula ngendvodzana; wayetsa libito, watsi nguJESU.