Lukha 15

₁Ngalelinye lilanga kwefika batselisi netilahlwa titewulalela Jesu. ₂Kodvwa baFarisi netati temtsetfo tahhingatela tatsi: “Lomuntfu wemukela tilahlwa abuye futsi adle nato!”

₃Ngako-ke Jesu wase ubatjela umfanekiso lotsi: ₄“Nangabe lomunye wenu anetimvu letilikhulu bese kulahleka lenye, angente njani? Angete atishiya etsafeni yini leti letingema-99, ahambe ayewufuna lena lenye lelahlekile, adzimate ayitfole? ₅Angatsi nase ayitfolile, atfokote ayetjatse ehlombe abuyele nayo ekhaya. ₆Atsi nase afike ekhaya, ameme tihlobo takhe nabomakhelwane atsi kubo: ‘Tfokotani kanye nami, ngobe sengiyitfolile imvu yami lebeyilahlekile.’ ” ₇Jesu wachubeka watsi: “Ngalokufananako, ngitsi kini: Kuyawuba khona kutfokota lokukhulu ezulwini ngesoni sinye lesiphendvukako kunebantfu labalungile labangema-99 labangakudzingi kuphendvuka.”

₈“Nome-ke ake sitsi: Umfati lonetinhlavu tesiliva letilishumi alahlekelwe ngulolunye, wente njani? Akasikhanyisi yini sibane atsanyele indlu yakhe alufunisise adzimate alutfole? ₉Atsi angalutfola, ameme tihlobo takhe, nabomakhelwane bakhe atsi kubo: ‘Tfokotani kanye nami, ngobe sengilutfolile luhlavu lebelulahlekile.’ ” ₁₀Jesu wachubeka watsi: “Ngalokufananako-ke, ngitsi kini: Tingilosi taNkulunkulu tiyawutfokota ngesoni sinye lesiphendvukako.”

₁₁Wachubeka Jesu watsi: “Bekukhona umuntfu labenemadvodzana lamabili. ₁₂Indvodzana lencane yatsi kuyise: ‘Babe, nginike sabelo lesilifa lami.’ Ngako-ke uyise wawehlukanisela lifa emadvodzana akhe.

₁₃“Kwatsi ngemalangana indvodzana lencane yatsengisa lifa layo, yahamba nalemali yalibangisa eveni lelikhashane, lapho yayihlaphata khona imali ihleti ngekonakala. ₁₄Yayidla yonkhe imali. Kwefika indlala lenkhulu kulelo live, ingasenalutfo yahlupheka kakhulu. ₁₅Ngako-ke yahamba yayawufuna umsebenti kumuntfu walelo live, wayitfumela enhlonhleni yakhe kuyakwelusa tingulube. ₁₆Yayilamba idzimate ifise kudla imidvumba ledliwa tingulube, ngobe yayinganikwa ngumuntfu kudla.

₁₇“Sigcino yasanguluka engcondvweni yacabanga yatsi: ‘Tonkhe tisebenti tababe tidla tidzimate titibekele, kepha mine lapha ngilamba kangaka. ₁₈Ngitawuhamba ngiye kubabe ngitsi kuye: “Babe, ngonile kuNkulunkulu nakuwe. ₁₉Angisafanele nekutsi ngibitwe ngekutsi ngiyindvodzana yakho; sale umane ungenta lomunye wetisebenti takho.” ’ ₂₀Ngako-ke yesuka yahamba yaya kuyise.

“Yayisekudzeni kabi nelikhaya ngesikhatsi uyise ayibona. Inhlitiyo yeyise yagcwala sihawu, wayihawukela wagijima wayihlangabeta. Wayigaca ngemkhono wakhe, wayanga. ₂₁Lendvodzana yatsi kuyise: ‘Babe, ngonile kuNkulunkulu nakuwe, angisafanele nekutsi ngibitwe ngekutsi ngiyindvodzana yakho.’ ₂₂Kepha uyise wabita tisebenti watsi: ‘Phangisani niletse ingubo lenhle niyembatsise, niyifake nendandatho emnweni wayo, neticatfulo etinyaweni. ₂₃Nifune litfole lelihle lelikhuluphele nilihlabe sitewudla sijabule. ₂₄Ngobe lendvodzana yami beyifile, kodvwa nyalo seyiyaphila; beyilahlekile, kodvwa nyalo seyitfolakele.’ Ngako kwase kuyadliwa, kuyajatjulwa.

₂₅“Ngaleso sikhatsi indvodzana lenkhulu beyingekho isensimini, yatsi seyibuya yeva umsindvo wekuhlabela nekugidza ingakangeni ekhaya, ₂₆yase ibita lesinye setisebenti iyabuta kutsi kwente njani lapha ekhaya kunemsindvo nje. ₂₇Sisebenti satsi kuye: ‘Umnakenu sewubuyile, ngako-ke uyihlo umhlabise litfole lelikhuluphele, ngobe umnakenu ubuye asaphila.’

₂₈“Indvodzana lenkhulu yatfukutsela yabila, yase iyala nekungena lapha ekhaya. Kwadzimate kwaphuma uyise wayakuyincenga; ₂₉yamphendvula yatsi: ‘Kodvwa, babe, mine yonkhe leminyaka bengihleti nawe ngikusebentela. Angizange sengephule namunye umyalo wakho, kodvwa awuzange sewunginike nangalinye lilanga ngisho nelizinyane nje, kutsi nami ngitijabulise kanye nebangani bami. ₃₀Kodvwa lendvodzana yakho nayibuya kuyawuhlaphata lifa lakho netingwadla, yona uyihlabisa litfole lelikhuluphele!’

₃₁“Uyise watsi kuye: ‘Ndvodzana yami, wena unami njalo, nako konkhe lokukwami ubokwati kutsi kwakho. ₃₂Kepha kusifanele kutsi sijabule sidle ngekutfokota, ngobe umnakenu abefile, kepha manje sewuyaphila; abelahlekile, kepha manje sewutfolakele.’ ”