Lukha 12

₁Tatsi lapho ticumbi tebantfu tisondzela madvutane, bantfu banyatselana ngenca yebunyenti, Jesu wase utsi kubafundzi bakhe kucala: “Caphelani imvubelo yebaFarisi yekutentisa. ₂Konkhe lokumbonyiwe kuyawugwatjulwa, yonkhe imfihlo iyakwatiwa. ₃Ngako-ke, konkhe lenakusho ebumnyameni kuyawuvakala ekukhanyeni, lenake nakuhleba emasitseleni kuyawuba yindzaba lesematseni.”

₄“Ngiyanitjela, tihlobo tami, ngitsi: Ningabesabi labo lababulala umtimba kodvwa bangenamandla ekwenta lokubi lokungetulu kwaloko. ₅Kodvwa ngitaneluleka ngalenifanele kumesaba. Mesabeni lowo longuYena anemandla ekubulala umtimba aphindze ashisane esihogweni; yebo, nginitjela ngitsi: Yesabani lowo!

₆“Boncedze labasihlanu ababiti emasenti lamabili yini? Noko Nkulunkulu akakhohlwa ngisho nome munye wabo. ₇Hhawu, ingani netinwele tenhloko yenu tibaliwe. Ngako ningesabi; nine nibaluleke kakhulu kunaboncedze labanyenti.”

₈“Nginitjela kutsi: Longivuma embikwebantfu kutsi wami, iNdvodzana yeMuntfu nayo iyawumvuma embikwetingilosi taNkulunkulu. ₉Kodvwa lowo longiphika embikwebantfu kutsi akasiye wami, iNdvodzana yeMuntfu nayo iyawumphika embikwetingilosi taNkulunkulu.

₁₀“Nome ngubani lokhuluma kabi ngeNdvodzana yeMuntfu, uyawutsetselelwa; kodvwa lowo lowetfuka Moya Longcwele, angeke atsetselelwe.

₁₁“Nabaniletsa kutenigweba emasinagogeni, nome embikwebabusi nemakhosi, ningakhatsateki ngekutsi niyawutsini nitiphendvulele njani. ₁₂Ngobe Moya Longcwele uyawunifundzisa ngaso leso sikhatsi lenifanele kukusho.”

₁₃Lomunye abesesicunjini wase utsi kuJesu: “Mfundzisi, tjela umnaketfu kutsi angabele incenye yelifa.”

₁₄Kodvwa wamphendvula watsi: “Ndvodza, ngubani losangente umehluleli nemenetisi kini?” ₁₅Watsi kubo: “Caphelani, nikubalekele konkhe kufisa lokubi; ngobe imphilo yemuntfu ayinconotiswa bunjinga bakhe.”

₁₆Wase ubatjela umfanekiso watsi: “Emasimi esicebi enta sivuno lesikhulu; ₁₇sase sicabanga enhlitiyweni yaso satsi: ‘Manje sengitakwente njani, ngobe ayisekho indzawo yekugcina lesivuno sami?’ ₁₈Sachubeka satsi: ‘Ngitakwenta naku: Ngitawubhidlita tonkhe tinyango tami, bese ngakha letinkhulu, lapho ngitawugcina khona sonkhe sivuno netimphahla tami, ₁₉bese ngikhuluma ngedvwana ngitsi: Cha, senginetimphahla lengitibekele tona teminyaka leminyenti; angikhululeke, ngidle, nginatse, ngijabule!’ ₂₀Kodvwa Nkulunkulu watsi kuso: ‘Silima! Kulobusuku balamuhla umphefumulo wakho uyabitwa kuwe; pho, letintfo lesewutilungisile titawuba tabani?’

₂₁“Kunjalo-ke kulowo lotibekela umcebo, kantsi akacebi kuNkulunkulu.”

₂₂Jesu wase utjela bafundzi bakhe utsi: “Ngako-ke nginitjela kutsi: Ningakhatsateki ngemphilo yenu, nekutsi nitawudlani, nangekutsi nitakwembatsani emitimbeni yenu. ₂₃Ngobe imphilo ibaluleke kakhulu kunekudla, nemtimba ubaluleke kakhulu kunetimphahla. ₂₄Ase nibuke emangangane! Akahlanyeli akavuni; ate tincolobane netilulu, kodvwa noko Nkulunkulu uyawondla. Nibaluleke kakhulu kangakanani-ke nine kunetinyoni! ₂₅Ngubani nje lapha emkhatsini wenu longatsi ngekunanta kwakhe kwengeteke iminyaka lembalwa ngetulu kwemphilo yakhe? ₂₆Nangabe ningeke nibe nemandla ekwenta loku lokuncane kangaka, nitihluphelani ngaloku lokunye?

₂₇“Ase nibheke kutsi timbali tikhula njani! Atisebenti nome tititfungele timphahla. Kodvwa nginitjela kutsi, naSolomoni, labenjinge kangaka, abete timphahla letatihlotjiswe kwendlula ngisho nayinye yaletimbali. ₂₈Nangabe Nkulunkulu embatsisa tjani besiganga lobukhona lamuhla, kusasa abusekho sebushile, angeke yini etsembeke kutsi anganembatsisa nani? Maye, bantfu bekukholwa lokuncane! ₂₉Ngako ningakhatsateki ngekufuna leningahle nikudle nikunatse; netingcondvo tenu tingakhatsateki. ₃₀Ngobe tonkhe tive temhlaba tifuna letintfo; neYihlo uyati kutsi niyatidzinga letintfo. ₃₁Esikhundleni saloko, funani umbuso wakhe, khona-ke tonkhe letintfo titawuba tenu.”

₃₂“Ningesabi, mhlambi lomncane, ngobe uYihlo utfokotela kona kutsi aninike umbuso. ₃₃Tsengisani ngako konkhe leninako, bese nabela labeswele. Tiphatseleni tipatji letingagugi, nigcine umcebo wenu ezulwini, lapho ungeke unciphe khona, kute nelisela lelingefika kuwo, kute ngisho nemvunya longawudla. ₃₄Ngobe lapho umcebo wenu ukhona, ngulapho nenhlitiyo yenu itawuba khona.”

₃₅“Hlalani tinkhalo tenu tiboshiwe netibane tenu tivutsa, ₃₆Njengetisebenti letilindzele kufika kwemnumzane wato aphuma edzilini, khona atewutsi nakefika anconcotsa, tisheshe timvulele umnyango. ₃₇Maye, tibusisekile leto tisebenti letiyakukhandvwa ngumnumzane wato tilindzele tingakalali! Ngicinisile, ngitsi kini, uyawubopha acinise libhande lakhe elukhalweni, atihlalise phansi, atiphe kudla. ₃₈Maye, tibusisiwe nakatikhandza tilindzele, nome ngabe ufike ekhatsi nebusuku nome kusengakasi! ₃₉Kodvwa yatini loku, kutsi kube lomniyo wendlu bekati sikhatsi sekufika kwelisela, abeyawulindza indlu yakhe kuze ingetikugcekezwa. ₄₀Nani futsi, lindzani, ngobe iNdvodzana yeMuntfu iyawufika ngesikhatsi leningakasilindzeli.”

₄₁Phetro watsi: “Nkhosi, utjela tsine sodvwa yini lomfanekiso, nome uwucondzise kubo bonkhe bantfu?”

₄₂INkhosi yaphendvula yatsi: “Ngubani-ke losisebenti lesetsembekile nalesihlakaniphile lesiyawutfunywa kutsi sicize indlu yenkhosi kanye nekunika letinye tisebenti kudla lokutifanele nangesikhatsi lesifanele? ₄₃Sibusisiwe leso sisebenti lesiyawukhandvwa yinkhosi yaso senta tonkhe timfanelo talelo khaya nayibuyako. ₄₄Ecinisweni leso sisebenti siyawunikwa umsebenti wekutsi siphatse tonkhe timphahla talenkhosi, ₄₅kodvwa nangabe lesisebenti sicabange satsi: ‘Inkhosi yami isalibele,’ bese sishaya tonkhe letinye tisebenti, letidvuna naletisikati, sihlaphate kudla, sinatse sidzakwe, ₄₆lenkhosi yaso iyawufika ngelilanga nangesikhatsi lesingakasilindzeli isijezise, isihlanganise nalabangetsembeki.

₄₇“Sisebenti lesatiko kutsi inkhosi yaso ifuna senteni, kodvwa singatilungiseleli kutsi sente loko lokufunwa yinkhosi yaso, siyawujeziswa ngekushaywa kakhulu; ₄₈kodvwa sisebenti lesingati kutsi inkhosi yaso ifunani, bese senta lokubi lesifanele sishayelwe kona, siyawujeziswa ngekushaywa kancane. Umuntfu lonikwe lokukhulu, kuyawudzingeka lokukhulu kuye; umuntfu lonikwe lokukhulu kakhulu, kuyawudzingeka lokukhulu kakhulu kuye.”

₄₉“Ngitele kutakokhela umlilo emhlabeni, maye, ngifisa shangatsi ngabe sewokhelekile!

₅₀“Kunembhabhatiso lengitawemukela; maye, ngicindzetelekile, uyawudzimate wendlule! ₅₁Nicabanga kutsi ngiletse kuthula yini emhlabeni? Cha, hhayi kuthula, kodvwa ngiletse kwehlukana. ₅₂Kusukela manje indlu lenebantfu labasihlanu itakwehlukana, labatsatfu bacabane nalababili, lababili nalabatsatfu. ₅₃Bayawucabana, uyise nendvodzana, indvodzana neyise, unina nendvodzakati, indvodzakati nenina, uninatala nemalukatane, malukatane neninatala.”

₅₄Jesu wachubeka watsi eticumbini tebantfu: “Nanibona lifu lemvula lichamuka ngasenshonalanga, niyaye nitsi: ‘Litakuna,’ livele line. ₅₅Naniva umoya lochamuka eningizimu uhhusha, niyaye nitsi: ‘Kutawushisa,’ livele lishise. ₅₆Batentisi! Ngekubuka umhlaba nesibhakabhaka niyakwati kufundza lesikushoko; pho, nehlulwa yini kufundza inchazelo yaletikhatsi talamuhla?”

₅₇“Anitiboneli ngani kutsi ngukuphi lokulungile? ₅₈Nangabe umuntfu akumangalele enkantolo, yetama ngawo onkhe emandla akho kulungisana naye endleleni nisaya kuyawuliteka lelicala, kuze angetikufikisa embikwemehluleli, ngobe umehluleli utakunikela emaphoyiseni, wona akufake ejele. ₅₉Lapho-ke ngikutjela kutsi, ungeke uphume ungakayikhiphi yonkhe inhlawulo.”