Levithikusi 27

₁Simakadze wakhuluma kuMosi, watsi: ₂“Tjela sive sema-Israyeli utsi: ‘Nangabe umuntfu ente setsembiso ngebantfu kuSimakadze ngekunika intsengo lelingene bona, ₃lomdvuna loneminyaka lesemkhatsini kwalengema-20 kuya kulengema-60 budzala, kuyawuba tinhlavu tesiliva letingaba ngema-50 ngekwesilinganiso lesisemtsetfweni. ₄Nangabe lomuntfu amsikati, inhlawulo yakhe kuyawuba tinhlavu tesiliva letingaba ngema-30. ₅Nangabe lomuntfu uneminyaka lesihlanu kuya kulengema-20 budzala, nakangulomdvuna, inhlawulo yakhe kuyawuba tinhlavu tesiliva letingaba ngema-20, kantsi nakamsikati, inhlawulo yakhe kuyawuba tinhlavu tesiliva letingaba lishumi. ₆Nangabe lomuntfu unenyanga atelwe kuya eminyakeni lesihlanu budzala, inhlawulo yakhe nakangulomdvuna, kuyawuba tinhlavu tesiliva letingaba sihlanu, kantsi nakamsikati, kuyawuba tinhlavu tesiliva letingaba tintsatfu. ₇Nangabe lomuntfu aneminyaka lengema-60 kuya etulu budzala, nakangulomdvuna, inhlawulo yakhe kuyawuba tinhlavu tesiliva letingaba li-15, kantsi nakangulomsikati, kuyawuba tinhlavu tesiliva letingaba lishumi.

₈“ ‘Nangabe lomuntfu amphofu kakhulu angakhoni kukhokha lenhlawulo loyibitako, lomuntfu kufanele aletse umuntfu kumphristi lotawubala inhlawulo yakhe lengakhonwa ngulowo muntfu.

₉“ ‘Nangabe wetsembise ngesilwane lesingemukeleka kutsi sibe ngumnikelo kuSimakadze, leso silwane lesesinikwe Simakadze sesiyawuba ngcwele. ₁₀Akukafaneli enane silwane lesihle ngalesibi, nome lesibi ngalesihle; nangabe asenana ngalesinye silwane, leso lenana ngaso naleso lesenanwako totimbili tiyawuba ngcwele. ₁₁Nangabe kwetsenjiswe ngesilwane lesingcolile, lesingemukeleki kuSimakadze kutsi sibe ngumnikelo, lomuntfu kufanele amikise lesilwane kumphristi, ₁₂lokunguyena atawuhlolisisa simo saso kutsi sihle nome sibi. Inhlawulo yaso iyawuba nguleyo lejutjwe ngumphristi ngekwesimo saleso silwane. ₁₃Nangabe umniyo afuna kusihlenga, uyakwengeta incenye yesihlanu yenhlawulo yaso.

₁₄“ ‘Nangabe umuntfu anikela ngendlu yakhe kutsi ibe ngcwele kuSimakadze, umphristi uyawuyihlolisisa kutsi ilungile yini nome cha. Leyo nhlawulo lebalwa ngumphristi ngalelo langa kuyawuma yona. ₁₅Nangabe lomuntfu lonikela lendlu asafuna kuyihlenga, kufanele engete incenye yesihlanu yenhlawulo yayo, bese lendlu iphindze iba ngeyakhe.

₁₆“ ‘Nangabe umuntfu anikela ngencenye yemhlaba wemndeni wakhe kuSimakadze, inhlawulo yawo iyawubalwa isuselwa entsengweni yenhlanyelo lehlanyelwa kulowo mhlaba lekutinhlavu tesiliva letingaba lishumi kuleso nakuleso sisindvo sebhali lesingemakhilogremu langaba ngema-20. ₁₇Nangabe anikela ngensimi yakhe kusukela ngalowo Mnyaka Wekubuyiselwa, inhlawulo yayo iyawuba ngulephelele. ₁₈Kodvwa nangabe anikela ngensimi yakhe emvakwaloMnyaka Wekubuyiselwa, umphristi uyawubala inhlawulo ayinciphise kuye ngeminyaka lesasele kutsi kufike uMnyaka Wekubuyiselwa. ₁₉Nangabe lomuntfu lonikele lensimi asafuna kuyihlenga futsi, kufanele engete incenye yesihlanu yenhlawulo, bese-ke lensimi iphindze iba ngeyakhe. ₂₀Kodvwa nakangafisi kuyihlenga lensimi nome asayitsengisele lomunye umuntfu, ingeke iphindze ihlengeke. ₂₁Kutawutsi lensimi nase ikhululekile ngeMnyaka Wekubuyiselwa, iyawuba ngcwele kuSimakadze njengensimi leseyinikelwe kuye, ibe ngeyebaphristi.

₂₂“ ‘Nangabe umuntfu anikela kuSimakadze ngensimi layitsengile, lengesilo lifa lemndeni wakubo, ₂₃umphristi uyawubala inhlawulo yayo kuye ngeminyaka lesele kuze kufike uMnyaka Wekubuyiselwa, lomuntfu uyawukhipha inhlawulo yayo ngalona lelo langa, bese yehlukaniselwa Simakadze. ₂₄NgeMnyaka Wekubuyiselwa leyo nsimi iyawuphindze ibuyiselwe kulomnikati lebeyitsengwe kuye, kulifa lakhe.

₂₅“ ‘Yonkhe inhlawulo iyawubasemtsetfweni, kusetjentiswe silinganiso sasendzaweni lengcwele.

₂₆“ ‘Kufanele kubete lonikela ngelitubulo lesilwane, ngobe phela lona vele laSimakadze: nome lenkhomo, nome lemvu, laSimakadze. ₂₇Nangabe litubulo kusilwane lesingcolile ngekwemtsetfo, umuntfu angalihlenga ngaleyo nhlawulo lesemtsetfweni, engete kulo incenye yesihlanu yenhlawulo yalo. Nangabe angalihlengi, kufanele litsengiswe ngalelo nani lalo lese libaliwe.

₂₈“ ‘Kodvwa kufanele kubete umuntfu lotawutsengisa nome lotawuhlenga loko lesekunikelwe kuSimakadze, nome kungumuntfu, nome kusilwane, nome kungumhlaba lolifa lakhe. Konkhe loko sekuyawuhlala kukwaSimakadze kungcwelengcwele. ₂₉Umuntfu lonikelwe ekufeni kuSimakadze akayiwuhlengwa; kufanele abulawe.

₃₀“ ‘Konkhe kwelishumi kwako konkhe lokulinywako kwetilimo nome kwetitselo kwaSimakadze; kungcwele kuSimakadze. ₃₁Nangabe umuntfu afisa kuhlenga kwelishumi kwakhe, kufanele engete incenye yesihlanu yako enhlawulweni yako. ₃₂Konkhe kwelishumi emhlambini wetinkhomo netimvu, ngisho sonkhe silwane selishumi lesendlula ngaphansi kwendvuku yemelusi, siyawuba ngcwele kuSimakadze. ₃₃Lomnikati akayiwutiphambanisa leto tilwane, khona kutewukhetseka leto letinesici. Nakwenteka enana lesilwane ngalesinye, totimbili letilwane, lesenaniwe nalekwenanwa ngaso tiyawuba taSimakadze, futsi atiyiwuhlengwa.’ ”

₃₄Ngiyo lena-ke imiyalo yesive sema-Israyeli Simakadze layinika Mosi entsabeni yaseSinayi.