Levithikusi 26

₁“ ‘Ningatenteli nkulunkulu nome sithico lesibatwe ngelitje, nome umfanekiso waluphi luhlobo lobatwe ngelitje eveni lenu kutsi nitewukhotsama embikwawo. NginguSimakadze, Nkulunkulu wenu. ₂Gcinani emaSabatha ami niyihloniphe nendzawo yami lengcwele. NginguSimakadze.

₃“ ‘Nanihamba ngetimiso tami nilalele, nemiyalo yami niyente, ₄ngiyawunitfumelela imvula ngesikhatsi sayo, nemhlaba uninike sivuno lesihle, netihlahla tesiganga titsele titselo tato. ₅Sivuno siyawuba sikhulu kangangekutsi niyawuchubeka nivune, kuze kushaye sikhatsi sekukha emagelebisi. Nekukha emagelebisi kuyawuchubeka kuze kushaye sikhatsi sekuhlanyela. Yebo, niyawudla konkhe kudla lenikufunako, niphindze nihlale ngekuthula eveni lenu.

₆“ ‘Lelive ngiyawulipha kuthula, nicambalale ngekukhululeka ningesatjiswa lutfo. Tonkhe tilwane letiyingoti kini ngiyawutisusa kulelo live, kungabikho timphi eveni lenu. ₇Titsa tenu niyawuticosha niticotfule ngenkemba. ₈Labasihlanu benu bayawuba nemandla ekwehlula likhulu lato, nelikhulu lenu liyawuba nemandla ekwehlula titsa leti-10 000; yebo, titsa tenu niyawutehlula niticotfule ngenkemba. ₉Ngiyawunibusisa, nginiphe bantfwana labanyenti, nandze; sivumelwane lengisenta nani ngiyawusigcina ngisifeze. ₁₀Sivuno senu siyawuba sinyenti kangangekutsi niyawuze nisilahle lesi sanyakenye, nentele kwekhweta lesi salonyaka. ₁₁Ngiyawuhlala emkhatsini wenu ngisethendeni lekukhontela, ngingesuki kini. ₁₂Ngiyawuhamba emkhatsini wenu ngibe nguNkulunkulu wenu, nine nibe sive sami. ₁₃Mine nginguSimakadze, Nkulunkulu wenu, lowanikhipha eGibhithe, kuze ningabe nisaba tigcili temaGibhithe. Ngephula tikeyi telijoko lenu, nganenta nahambela etulu nikhululekile.’ ”

₁₄“ ‘Nangabe ningangilaleli, ningayenti yonkhe lemiyalo yami, ₁₅ningatilandzeli netimiso tami, ningayenti nemitsetfo yami, nehluleke nekuyifeza lemiyalo yami ngekuphambana nesivumelwane sami, ₁₆ngiyawunijezisa nganaku: Ngiyawunehlisela kutfutfumela lokwesabekako, netifo letingelapheki, nemikhuhlane lephumphutsekisa emehlo, nginente nihusheke. Niyawulima nihlanyelele lite, ngobe titsa tenu tiyawunehlula tidle konkhe loko kudla. ₁₇Buso bami buyawumelana nani, bese nehlulwa titsa tenu, tona leto letinitondzako tiyawunibusa, nani nibaleke, ngisho nome seningasacoshwa ngumuntfu.

₁₈“ ‘Nanichubeka ngekungangilaleli nome sekunehlele konkhe loku, sijeziso senu ngiyawusikhulisa siphindvwe kasikhombisa. ₁₉Ligcabho lenu lelinenkhani ngiyawulifohlota; sibhakabhaka senu ngiyawusenta sibe njengensimbi, sibete imvula; umhlaba ngiyakuwomisa ube lukhuni njengelitfusi. ₂₀Konkhe kusebenta kwenu kamatima kungeke kunibuyisele lutfo, ngobe emasimi enu angeke abe nesivuno, netihlahla tingeke titsele titselo.

₂₁“ ‘Nanichubeka kumelana nami nale nekungilalela, lokuhlupheka kwenu ngiyawukuphindza kasikhombisa kuye ngaleto tono lenitentile. ₂₂Ngiyawunitfumelela tilwane tesiganga, tidle bantfwabenu netinkhomo tenu, nize nibe mbalwa, kangangekutsi ngisho nemigwaco yenu iyawubate bantfu.

₂₃“ ‘Emvakwalesijeziso nanichubeka nekungangilaleli ngekungakwemukeli kucondziswa ngimi ngekutsi nijinge nimelane nami, ₂₄nami-ke sengiyawumelana nani ngekunivisa buhlungu ngalokuphindvwe kasikhombisa ngenca yetono tenu. ₂₅Ngiyawuniletsela imphi itenijezisa ngekwephula kwenu sivumelwane. Niyawutsi nanihlangana emadolobheni enu etindzaweni tekuphepha, bese nginihlasela ngetifo letingelapheki, nivele niphoceleke kutinikela etitseni tenu. ₂₆Umtfombo wesinkhwa ngiyakuwujuba kangangekutsi bafati labalishumi bayawuhlanganyela hhavini munye kupheka sonkhe sinkhwa labanaso. Bayawukwenetisana ngalelo lite labayawube banalo. Niyawudla, kodvwa ningeke nesutse.

₂₇“ ‘Nangabe etikwako konkhe loku seloku aningilaleli, nichubeka nekumelana nami, ₂₈ngiyawunigucukela ngentfukutselo yami ngimelane nani, sijeziso ngisente sibe buhlungu ngekusiphindza kasikhombisa. ₂₉Niyawudla inyama yemitimba yemadvodzana nemadvodzakati enu. ₃₀Ngiyawubhidlita tindzawo tenu tekukhontela, ngidzilite nemalati enu etimphepho, tidvumbu tenu ngitibutsisele ndzawonye etikwetithico tenu letite imphilo naletiwile; umphefumulo wami uyawunicansukela. ₃₁Emadolobha enu ngiyakuwenta abe tindzala, netindzawo tenu tekukhontela ngitente tibe lihlane, kantsi neliphunga lelinuka lusi lelimnandzi leminikelo yenu yekushiswa ngingeke ngilemukele. ₃₂Live lenu ngiyawuliphundla, kuze kutsi netitsa tenu letingena kulo timangale ngalo. ₃₃Ngiyawunisakatela kuletinye tive, nginicoshe ngenkemba yami. Live lenu liyawuphundleka nemadolobha enu abe tindzala. ₃₄Live liyawuba nesikhatsi senjabulo ngeminyaka yemaSabatha ngalesikhatsi lisaphundlekile nani nisahleti eveni letitsa tenu; live liyawuphumula libe nesikhatsi lesimnandzi ngeminyaka yemaSabatha. ₃₅Ngaso sonkhe lesikhatsi live lenu lisaphundlekile liyawuba nekuphumula lelalingazange selibe nako ngesikhatsi semaSabatha enu nisahlala kulo.

₃₆“ ‘Labo benu labayawube basasele bangakafi kulawo mave labayawube batfunjelwe kuwo, ngiyawukwenta tinhlitiyo tabo tibe nekwesaba kangangekutsi ngisho nemsindvo welicembe lelipheshulwa ngumoya liyawubenta babaleke batephule, kube shangatsi babalekela imphi. Bayawukuwa nome kungekho lobacoshako. ₃₇Bayawugilana bawe, lomunye etikwalomunye, kube shangatsi babalekela imphi, nome kungekho lobacoshako. Ngako-ke aniyikuba nawo emandla ekuma embikwetitsa tenu. ₃₈Niyawufela emkhatsini webantfu betive, live letitsa tenu liyawunidla linicedze. ₃₉Labo benu labayawube basasele bangakafi eveni letitsa tabo, bayawukondza babe tincotfo ngenca yetono tabo, nangenca yetono taboyise bayawukondza besabeke.

₄₀“ ‘Kodvwa nabavuma tono tabo netaboyise ekungihlubukeni kwabo nasekumelaneni nami kwabo, ₄₁lokungukona kwangenta ngaze ngabayisa eveni letitsa tabo, nangabe netinhlitiyo tabo letingakasoki titfobeka bayikhipha nenkhokhelo yesono sekuhlubuka kwabo, ₄₂ngiyawusikhumbula sivumelwane sami naJakobe, sivumelwane sami na-Isaka, sivumelwane sami na-Abrahama, ngilikhumbule live. ₄₃Lelo live bayawulifulatsela lisale litijabulisa ngemaSabatha alo ngesikhatsi liselihlane bangekho kulo. Bayawukhipha inkhokhelo yetono tabo, ngobe bayilahlile imitsetfo baticansukela netimiso tami. ₄₄Kodvwa nome kunjalo, nasebaseveni letitsa tabo, ngingeke ngibadvube, futsi ngingeke ngibacansukele kangangekutsi ngize ngibabhubhise baphele nya, ngephule sivumelwane sami nabo. NginguSimakadze, Nkulunkulu wabo. ₄₅Kodvwa ngenca yabo ngiyawusikhumbula sivumelwane sami nabokhokho babo, lengabakhipha eveni laseGibhithe embikwato tonkhe tive kutsi ngitewuba nguNkulunkulu wabo. NginguSimakadze.’ ”

₄₆Leti-ke timiso, nemiyalo, nemitsetfo Simakadze layenta entsabeni yaseSinayi emkhatsini wakhe nesive sema-Israyeli ngesandla saMosi.