Levithikusi 2

₁“Nangabe umuntfu aletsa kuSimakadze umnikelo walokutinhlavu, kufanele kube yimphuphu lecolisakele. Kufanele afake emafutsa emncumo kanye nemphepho, ₂bese ukuletsa kumadvodzana a-Aroni labaphristi. Umphristi utawukha libinta lemphuphu kanye nemafutsa emncumo, nemphepho yawo yonkhe akushisele etikwelilati kube sikhumbuto, umnikelo lowentiwa ngemlilo, kube liphunga lelinuka lusi lolumnandzi kuSimakadaze. ₃Yonkhe lemphuphu lesele itawuba ya-Aroni nemadvodzana akhe; ingcwele, ngobe itsetfwe ekudleni bekunikelwe ngemlilo kuSimakadze.

₄“Nangabe uletsa umnikelo walokutinhlavu longumpotongwane lophekiwe, kufanele kube ngulote imbiliso, lowentiwe ngafulaha wabhicwa nemafutsa emncumo nome-ke kube ngimicatsane legcotjiswe ngalawo mafutsa.

₅“Nangabe lomnikelo walokutinhlavu utfoswa ngelikesi, kufanele wentiwe ngafulaha lobhicwe nemafutsa emncumo kodvwa kubete imbiliso lefakwako. ₆Kufanele uhleshulwe ube ticucu bese utselwa ngemafutsa. Lowo-ke ngumnikelo walokutinhlavu.

₇“Nangabe lomnikelo walokutinhlavu uphekwe ngelibhodo, kufanele wentiwe ngafulaha nemafutsa emncumo. ₈Uboletsa kuSimakadze lomnikelo walokutinhlavu lowentiwe ngaleto tintfo, uwetfule kumphristi kucala, yena-ke utawumikisa elatini. ₉Umphristi utawutsatsa licashana lawo libe sikhumbuto bese ulishisela elatini, kube ngumnikelo lowentiwa ngemlilo, liphunga lelinuka lusi lolumnandzi kuSimakadze. ₁₀Incenye yawo lesele iyawuba sabelo sa-Aroni nemadvodzana akhe; ingcwele kakhulu ngobe itsetfwe emnikelweni lowentiwa ngemlilo kuSimakadze.

₁₁“Konkhe lokutinhlavu lokunikelwa kuSimakadze akuyiwufakwa imbiliso; ningacali nikufake imbiliso nome luju lwetinyosi kuloko lokunikelwa kuSimakadze ngemlilo. ₁₂Niyawukuletsa kuSimakadze njengemnikelo losivuno sekwendvulelisa, kodvwa ngeke sishiselwe elatini kutsi sibe liphunga lelinuka lusi lolumnandzi kuye. ₁₃Wonkhe umnikelo wenu walokutinhlavu nibowuvanga ngeluswayi. Ningacali nilushiye luswayi lwesivumelwane saNkulunkulu eminikelweni yenu yalokutinhlavu. Kufanele niyifake luswayi yonkhe iminikelo yenu. ₁₄Nawuletsa umnikelo walokutinhlavu wesivuno sekwendvulelisa kuSimakadze, ubonikela ngako kulukhotse. ₁₅Ubengeta emafutsa emncumo kanye nemphepho; lowo ngumnikelo walokutinhlavu. ₁₆Umphristi uyawushisa incenye yalokutinhlavu ibe sikhumbuto, ayishise kanye nemafutsa, nemphepho; loko-ke ngumnikelo lowentiwa ngemlilo kuSimakadze.”