Sililo 5

₁Awu Simakadze!

Khumbula kutsi kwentekeni kitsi.

Buka ulibone lihlazo letfu.

₂Lifa letfu selijikisiwe lanikwa bafokati,

nemakhaya etfu anikwa bachamuki.

₃Sesigucuke saba tintsandzane,

sabate nabobabe,

nabomake sebabafelokati.

₄Emanti lesiwanatsako kufanele siwatsenge,

netinkhuni sititfola ngemali kuphela.

₅Labo labasicoshako basihleti emsileni,

sikhatsele sidziniwe,

asikutfoli kuphumula.

₆Satinikela kubaseGibhithe nakubase-Asiriya,

kuze sitfole kudla lokwenele.

₇Bobabemkhulu labona sebafa,

tsine sesetfwele licala labo.

₈Tigcili tibusa etikwetfu,

kute namunye longasikhulula etandleni tato.

₉Kudla kwetfu sikutfola ngekutidzela ematsambo

ngenca yenkemba lesehlane.

₁₀Sikhumba setfu sishisa njengelitiko,

siyavevetela ngenca yekulamba.

₁₁Bafati badlwenguliwe eSiyoni,

netintfombi tadlundlulutwa emadolobheni akaJuda.

₁₂Tikhulu tilengiswe ngetandla tato;

labadzala bangete bahlonishwa.

₁₃Emajaha ayaphishaneka etigayweni,

bafana bayadzayitela ngaphansi

kwetinyandza tetinkhuni.

₁₄Baholi besukile emasangweni elidolobha,

emajaha asewuyekele umculo wawo.

₁₅Injabulo iphelile etinhlitiyweni tetfu;

kugidza kwetfu kwenjabulo

sekugucuke kwaba sililo.

₁₆Umchele udzilikile etinhloko tetfu.

Maye kitsi! Ngobe sonile.

₁₇Ngenca yako konkhe loku

tinhlitiyo tetfu tidzabukile,

nangenca yato tonkhe letintfo

emehlo etfu ayadvumba,

₁₈ngobe intsaba iSiyoni

seyisele ikhala libhungane,

timphungutja tiyajangaza kuyo.

₁₉Awu, wena Simakadze,

uyabusa kuze kube phakadze.

Sihlalo sakho sebukhosi sihlala sicinile

titukulwane ngetitukulwane.

₂₀Usikhohlwelani njalo nje?

Usilahleleni sikhatsi lesidze kangaka?

₂₁Awu! Simakadze, sibuyisele kuwe,

kuze natsi sitewubuyela kuwe;

sivusetele emalanga etfu abe njengemalanga asendvulo.

₂₂Nome sewusilahle kokuphela yini?

Sekute yini siphetfo ekutfukutseleni kwakho?