Sililo 2

₁ Maye! Simakadze uyimbonye kanjani

iNdvodzakati yaseSiyoni

ngelifu lentfukutselo yakhe!

Ubudzaceke phansi bukhosi baka-Israyeli,

busuka ezulwini buya emhlabeni.

Akazange asikhumbule senabelo setinyawo takhe

ngelilanga lentfukutselo yakhe.

₂Simakadze ushwabudzele

onkhe emakhaya akaJakobe,

ngaphandle kwekuwahawukela.

Ngelulaka lwakhe udladlabule tinqaba

teNdvodzakati yakaJuda.

Uwehlisele phansi emhlabatsini ngelihlazo

umbuso wayo kanye netikhulu tayo.

₃Ngentfukutselo leyesabekako uncamule

tonkhe timphondvo taka-Israyeli.

Usifinyetile sandla sakhe sekudla

ngesikhatsi kuchamuka sitsa.

Ushise Jakobe, kwaba shangatsi

kulavutela emalangabi emlilo,

yebo, umlilo lodla ucotfule

konkhe lokusedvutane nawo.

₄Ujijimete umcibisholo wakhe njengesitsa,

sandla sakhe sangesekudla silungele kulwa.

Njengesitsa ujube bonkhe

labebajabulisa emehlweni;

watfulula lulaka lwakhe njengemlilo

etikwelithende leNdvodzakati yaseSiyoni.

₅Simakadze unjengesitsa;

umgwinyile Israyeli.

Ugwinye tonkhe tigodlo takhe,

wabhubhisa tinqaba takhe.

Wandzise kulila nekukhala kabuhlungu

kuyo iNdvodzakati yakaJuda.

₆Indzawo yakhe yekuhlala

uyicitse njengelidlangala lasensimini,

uyibhubhisile indzawo yakhe yekuhlangana.

Simakadze wente iSiyoni yawakhohlwa

emadzili ayo lemisiwe,

nemaSabatha ayo.

Ngentfukutselo yakhe ukudvube kokubili:

inkhosi yayo nemphristi wayo.

₇Simakadze ulilahlile lilati lakhe,

wayishiya indzawo yakhe lengcwele.

Unikele tibondza tetigodlo taseSiyoni etitseni;

tamemeta kakhulu ekhatsi endlini yaSimakadze,

kwaze kwaba shangatsi ngungelilanga

lelidzili lelamiswa.

₈Simakadze watimisela kudzilitela phansi

lubondza lolutungelete iNdvodzakati yaseSiyoni.

Welula intsambo yekukala,

wangete wasincandza

sandla sakhe ekubhubhiseni.

Wenta tibondza tekuvikela, netindvonga kwakhala,

konkhe kwaguga kanyekanye.

₉Emasango ayo ashone emhlabatsini;

imicabo yayo wayifohlota wayibhubhisa.

Inkhosi yayo netikhulu tayo tahlakatwa tayiswa etiveni,

umtsetfo sekwabate,

Nebaphrofethi bayo abasayitfoli imibono

levela kuSimakadze.

₁₀Babusi beNdvodzakati yaseSiyoni bahlala phansi bathule,

batsele lutfuli etinhloko tabo, bembatse emasaka.

Emantfombatana aseJerusalema atfobile,

abhekisa tinhloko tawo phansi.

₁₁Emehlo ami aluvitsi ngenca yekukhala.

Ngiyasha ngiyabhadla emphefumulweni wami,

inhlitiyo yami itfululeleke phansi emhlabatsini,

ngobe bantfu bakitsi babhujisiwe,

bantfwana netinswane kuyacaleka etitaladini telidolobha.

₁₂Bakhuluma kubonina batsi:

“Kuphi kudla neliwayini?”

ngesikhatsi nabacaleka njengemadvodza

lagwaziwe etitaladini telidolobha,

ngesikhatsi imiphefumulo yabo iphuma ihamba,

basetandleni tabonina.

₁₃Ngingatsini nje ngawe?

Ngingakufananisa nani nje,

wena Ndvodzakati yaseJerusalema?

Yini nje lengingakulinganisa nayo,

kuze ngikudvudvute,

wena Ntfombi yaseSiyoni?

Linceba lakho lishona njengelwandle.

Ngubani longakwelapha?

₁₄Imibono yebaphrofethi bakho yayingemanga,

futsi ingenamsebenti.

Baphrofethi bakho abazange

batibeke ebaleni tono takho,

kuze uvikeleke kuloko kugcilateka.

Letembulo labakunika tona

tatitemanga netekwedukisa.

₁₅Bonkhe labo labendlula ngakuwe

bashaya tandla tabo ngawe.

Bayancifa, banikine tinhloko

ngayo iNdvodzakati yaseJerusalema,

batsi: “Kungabe kambe ngilo leli lelidolobha

lelalibitwa ngekutsi kuphelela kwebuhle,

nenjabulo yemhlaba wonkhe?”

₁₆Tonkhe titsa takho tikukhamisela imilomo lemikhulu.

Tiyancifa tigugudze imihlatsi titsi:

“Lidolobha sesilimitile.

Leli lilanga lebesivele sililindzele,

besihlalele kubona lona.”

₁₇Simakadze wente loko labesakumisile;

ulifezile livi lakhe lalimemetela kadzeni.

Sewubhidlitile,

wangete waba nesihawu,

wente sitsa sakucoloshela,

uluphakamisile luphondvo lwetitsa takho.

₁₈Tinhlitiyo tebantfu tikhala kuSimakadze.

Awu, wena lubondza lweNdvodzakati yaseSiyoni,

tinyembeti takho atigobhote njengemfula busuku nemini,

ungatiniki kuphumula, emehlo akho angaphumuli.

₁₉Vuka ukhale kusengusebusuku,

ngesikhatsi balindzi bangena emsebentini wabo,

utfulule inhlitiyo yakho njengemanti

ebukhoneni baSimakadze.

Phakamisela tandla takho kuye

ngenca yetimphilo tebantfwana bakho

lasebacaleka ngenca yendlala,

ekucaleni nasekupheleni kwato tonkhe titaladi.

₂₀“Buka, Simakadze, unakisise.

Ngubani nje lowake wamphatsa ngalendlela?

Kufanele yini bafati badle batukulu babo,

bantfwana lababongile babakhulisa?

Baphrofethi nebaphristi kufanele yini babulawe

bafele endlini lengcwele yaSimakadze?

₂₁“Labasha nalabadzala kulale lunja kanyekanye

elutfulini lwetitaladi;

emajaha ami netintfombi tami kuwe ngelusiko lwenkemba.

Ubabhubhisile ngelilanga lentfukutselo yakho;

ubabulale ngenkemba ungenasihawu nabo.

₂₂“Wabutsisa tesabiso tami ndzawo tonkhe,

kwaba shangatsi umemela bantfu edzilini.

Ngelilanga lentfukutselo yaSimakadze

kute namunye lowaphunyula nalowasindza.

Titsa tami tibashaye tabacotfula labo

lengangibongile ngabanakekela.”