Jona 3

₁Livi laSimakadze laphindze lefika kuJona kwesibili, latsi: ₂“Hamba, uye eNineve, kulelidolobha lelikhulu, ufike umemetele lesimemetelo lengikunike sona.” ₃Ngako-ke wahamba Jona waya eNineve, njengekusho kwelivi laSimakadze. INineve lena kwakulidolobha lelikhulukati; bekungatsatsa emalanga lamatsatfu kutsi umuntfu alihambe lonkhe. ₄Jona walingenela lelidolobha, wahamba lilanga lonkhe. Wase uyacala uyamemetela utsi: “Sekusele emalanga langemashumi lamane kutsi iNineve ibhujiswe!”

₅Bantfu baseNineve balikholwa lelivi laNkulunkulu. Ngako base bamemetela kutsi bonkhe bantfu abazile, kusukela kulomkhulu kuze kube ngukulomncane, bembatse emasaka, bakhombise kutsi baphendvukile.

₆Letindzaba tatsi natifika enkhosini yaseNineve, yasukuma esihlalweni sayo sebukhosi, yakhumula ingubo yayo yebukhosi, yatembonya ngendvwangu yemasaka, yahlala phansi emlotseni. ₇Yakhipha simemetelo kuyo yonkhe iNineve, yatsi: “Inkhosi netiphatsimandla tayo itsi: ‘Akubete lodlako nalonambitsa lutfo nome lonatsa emanti: Umuntfu nome silwane, umhlambi wetinkhomo nome timvu ungadli unganatsi. ₈Kodvwa bantfu netilwane akumbonywe ngetindvwangu temasaka kukhalwe kuNkulunkulu. Wonkhe umuntfu akaphendvuke endleleni yakhe lembi nasebudloveni lobusetandleni takhe. ₉Ngobe ngubani nje lowatiko, mhlawumbe Nkulunkulu angatisola ayiyekele lentfukutselo yakhe leyesabekako, kuze singabhubhi?’ ”

₁₀Watsi kube Nkulunkulu abone loko labasebakwentile, kutsi batishiye tindlela tabo letimbi, watisola ngalokubi labeshito kutsi utabehlisela kona. Akazange abajezise.