Joweli 1

₂Lalelani naku, nine baholi,

nani nonkhe lenihlala kulelive.

Kwase kwenteka yini loku

ngetikhatsi tenu nome ngetikhatsi taboyihlomkhulu?

₃Loku kutjeleni bantfwabenu,

nebantfwabenu bakutjele bantfwababo,

nebantfwababo bakutjele situkulwane lesilandzelako,

₄kutsi loko lokwasala nyakana welifu lesikhonyane

sekudliwe tibotfo

naloko lokusele kuletibotfo

sekudliwe sigegedlana,

naloko lokusele kulesigegedlana,

sekudliwe tinkumbi.

₅Phaphamani, nine tidzakwa, nikhale!

Lilani nonkhe nine banatsi beliwayini,

lilani ngenca yaleliwayini lelisha,

ngobe selisusiwe emilonyeni yenu.

₆Sive sihlasele live lami,

sive lesinemandla nalesingenakubalwa;

sinematinyo lanjengewelibhubesi lelidvuna

netingcovela tematinyo

letinjengewelibhubesi lelisikati.

₇Lesive sibhubhise imivini yami,

safohlota imikhiwa yami.

Sebule emagcolo ayo,

sawalahla le khashane,

sashiya emagala ato amhlophe.

₈Lilani njengentfombi leyembetse emasaka,

iwavunulele umyeni wayo webusha.

₉Iminikelo yalokutinhlavu neyetinatfo

seyiyekelwe endlini yaSimakadze.

Baphristi sebayakhala,

labo labakhonta embikwaSimakadze.

₁₀Emasimi asonakele,

nemhlaba sewomile,

ngobe nesivuno sibhujisiwe,

neliwayini lelisha sekwabate,

nemafutsa akasatfolakali.

₁₁Jabhani, nine balimi,

lilani, nine lenilima tivini.

Dzabukelani kolo kanye nebhali,

ngobe sivuno sensimi sibhujisiwe.

₁₂Umvini sewomile,

nemkhiwa sewubunile

kanjalo nemahananandza,

nemasundvu,

nesihlahla semahhabhula

kanye nato tonkhe tihlahla tensimi setomile.

Ngempela kujabula kweluntfu sekuphelile.

₁₃Yembatsani emasaka,

nine baphristi, nilile.

Khalani, nine lenikhonta elatini.

Wotani nitekwembatsa emasaka busuku bonkhe,

nine lenikhonta embikwaNkulunkulu wami,

ngobe umnikelo walokutinhlavu

kanye nemnikelo wetinatfo sebakugodlile,

akuseti endlini yaNkulunkulu wenu.

₁₄Memetelani kuzila lokungcwele,

nimemetele umhlangano longcwele,

butsani baholi

kanye nabo bonkhe labahlala kulelive,

nibabitele endlini yaSimakadze Nkulunkulu wenu,

nikhale kuSimakadze.

₁₅Maye, lilanga lelesabekako!

Ngobe lilanga laSimakadze lisedvute,

lilanga Somandla layawuletsa ngalo imbhubhiso.

₁₆Kudla akukapheli yini embikwetfu?

Kujabula nekutfokota akukakhawuli yini

endlini yaNkulunkulu wetfu?

₁₇Inhlanyelo seyiyabuna ngaphansi kwemagadze ayo.

Tingungumakamelo setiyimfuhlululu,

kanjalo netingungu setibhidlikile,

ngobe naloku lokutinhlavu sekomile.

₁₈Maye, tinkhomo tiyabhonsa!

Imihlambi ihlakatekile,

ngobe ayinalo lidlelo,

ngisho nemihlambi yetimvu iyahlupheka.

₁₉Awu, Simakadze, ngikhala kuwe,

ngobe umlilo sewukhotse onkhe emadlelo,

nemalangabi asashise tonkhe tihlahla tesiganga.

₂₀Ngisho netilwane tesiganga tikhalela wena,

imifula yemanti seyomile,

nemlilo sewuwakhotse onkhe lamadlelo.