Jobe 4

₂“Nangabe umuntfu atimisele kukhuluma nawe,

wena utambeketelela yini?

Ngubani nje longake athule angakhulumi?

₃Ase ucabange kutsi banyenti kangakanani

bantfu bewubafundzisa,

nalababutsakatsaka bewubakhutsata.

₄Emavi akho abesimisa labakhubatelako,

acinise nemadvolo lagedletelako.

₅Kodvwa nyalo kuhlupheka sekuhlasele wena,

nawe sewujabhile, kuhlupheka sekukusukele,

nawe sewuphelelwa ngemandla.

₆Kantsi lokukhonta kwakho Nkulunkulu

akukudvudvuti ngani?

Bona lobucotfo bakho abukuniki ngani litsemba?

₇“Ase ucabange naku:

Wase wambona yini longenacala abhubha?

Ngukuphi lapho labalungile bake babulawa khona?

₈Njengobe sengike ngabona kutsi

labo labalima bubi bahlanyele kuhlupheka,

bavele bavune kona loko.

₉Ngekuphefumula kwaNkulunkulu bayabhubha;

ngekuvunguta kwentfukutselo yakhe bayaphela.

₁₀Emabhubesi angabhodla ahhonge,

noko ematinyo alawo mabhubesi lamakhulu ahhumukile.

₁₁Libhubesi libulawa kweswela kudla,

emawundlu elibhubesi abaleke asabalale.

₁₂“Kwanyenyiselwa livi kimi,

tindlebe tami takubamba loko lokwakuhletjwa.

₁₃Kwatsi emkhatsini wekuvinjetelwa kwami ngemaphupho ebusuku,

ngesikhatsi bantfu behlelwa ngulobukhulu butfongo,

₁₄kwesaba nekutfutfumela kwangigagadlela,

kwatfutfumelisa onkhe ematsambo ami.

₁₅Umoya wantjuza wendlula embikwami,

kwasikitela tinwele emtimbeni wami.

₁₆Wema; kodvwa angizange ngati kutsi kuyini.

Kwema intfo embikwemehlo ami,

ngase ngiva liphimbo lelihlebako, litsi:

₁₇‘Kungenteka yini lobhubhako alunge kakhulu kunaNkulunkulu?

Kungenteka yini umuntfu abe msulwa kakhulu kuneMdali wakhe?

₁₈Nangabe Nkulunkulu angatetsembi tinceku takhe,

nangabe tingilosi takhe atibeka licala,

₁₉kakhulu kangakanani-ke

labo labahlala etindlini letakhiwe ngeludzaka,

letitisekelo tato tiselutfulini,

labo labapitjiteka kalula njengemiyiyane.

₂₀Babhujiswa emkhatsini wekusa nekuhwalala,

babhubha kokuphela kubete nalokunakako loko.

₂₁Atikadvonswa yini tindophi temathende abo,

badzimate bafe bangenakuhlakanipha nje?’ ”