Jobe 39

₁“Uyati yini kutsi timbuti tentsaba titala nini?

Uyaye ubukele yini inyamatane nayitalako?

₂Uyaye utibale yini tinyanga tato tize titale?

Uyasati yini sikhatsi sato sekutala?

₃Tiguca phansi titale bantfwabato,

kuphele nemihelo yato.

₄Emazinyane ato ayacina,

akhulele etigangeni,

ahambe angaphindzi abuye.

₅“Ngubani lowenta imbongolo yesiganga

kutsi ihambe ikhululekile?

Ngubani lowatfukulula tindilimo tayo?

₆Ngayinika lihlane kutsi libe likhaya layo

nematsafa eluswayi kutsi abe yindzawo yayo yekuhlala.

₇Ayihlushwa ngimisindvo yemadolobha,

kantsi futsi kute nemuntfu longayifuya ayisebentise.

₈Yehla yenyuka nemagcuma abe lidlelo layo,

ifunana neluhlata lonkhe.

₉“Inyatsi ingavuma yini kutsi uyisebentise?

Ingakutsambela yini kuhlala esibayeni sakho ebusuku?

₁₀Ungayifaka yini emseleni ngematomu?

Ingatilima yini leto tigodzi emvakwakho?

₁₁Ungawetsemba yini lamandla ayo lamakhulu?

Ungawuyekelela yini umsebenti wakho lomkhulu kuyo?

₁₂Ungetsembela yini kuyo

kutsi ingakuletsela sivuno sakho,

isibutsisele ndzawonye ebaleni lakho lekubhulela?

₁₃“Timphiko tenshi tiyaphephetela ngenca yenjabulo.

Kodvwa tingeke tilinganiswe

netingwabha netinsiba tadvoye.

₁₄Emacandza ayo iwatalela phansi,

iwafukamele ngesihlabatsi,

₁₅inganaki kutsi angahle anyatseleke ngetinyawo,

nekutsi tilwane tesiganga tingawafohlota.

₁₆Emantjwele ayo iwaphatsa ngelunya,

kube shangatsi akasiwo ayo,

ayinaki nekutsi yake yahelwa yini ngawo,

₁₇ngobe Nkulunkulu akazange ayiphe kuhlakanipha,

nome-ke ayinike ingcondvo levulekile.

₁₈Noko nayivula tinsiba tayo yentela kugijima,

ivele ilihleke lusulu lihhashi nemgibeli walo.

₁₉“Lihhashi uyalinika yini emandla alo,

nome wembese intsamo yalo ngemdlonga?

₂₀Uyalenta yini ligcumagcume njengentsetse,

ulente likhale ngendlela yekutigcabha lokutfutfumelisako?

₂₁Lihwaya phansi ngendlela leyesabekako,

lijabule emandleni alo,

lisukeleke naliya ekuhlaseleni emphini.

₂₂Likuhleka lunya kwesaba,

lingesabi lutfo;

alikhweshi futsi aliyibalekeli inkemba.

₂₃Umgodla wemicibisholo ukhehletela ecebeni lalo,

kukanye nesikhali lesimanyatelako nesikhali lesidze.

₂₄Livukwa lusinga,

litsatse emabanga lamakhulu,

nakukhala licilongo,

kute longakhona kulimisa.

₂₅Litsi licilongo lingakhala, litsi: ‘Nako-ke!’

Imphi liyiva ngeliphunga isesekhashane,

liva netindvuna temphi tidla siga.

₂₆“Lokuhlakanipha kwakho kuyamfundzisa yini lohheya

kutsi ate akwati kundiza,

endlalele timphiko takhe ngaseningizimu?

₂₇Lona lusweti lundiza ngekutjelwa nguwe yini,

luze lwakhe nesidleke salo etulu?

₂₈Luhlala esiweni ngisho nasebusuku,

inqaba yalo kube lufantsa lwelidvwala.

₂₉Nalusuka lapho,

luhamba luyewufuna kudla kwalo;

emehlo alo avele akubone kusesekhashane.

₃₀Bantfwabalo lubondla ngengati;

lapho kunalokubulewe ngakhona,

ngulapho lukhona nalo.”