Jobe 37

₁“Ngenca yaloku ngiva shangatsi inhlitiyo yami

iyagcumagcuma,

isuka endzaweni yayo.

₂Lalela! Lalela kudvuma kwelivi lakhe,

nalokugedletela lokuphuma emlonyeni wakhe.

₃Ujikijela imibane yakhe ngaphansi kwemazulu,

ayitfumele emikhawulweni yonkhe yemhlaba.

₄Emvakwaloko kuta umsindvo wekudvuma kwakhe,

ubhavumula ngelivi lakhe lebukhosi.

Liphimbo lakhe lingabhavumula

akusali lutfo lunganyakati.

₅Liphimbo laNkulunkulu libhavumula

ngetindlela letimangalisako.

Wenta tintfo letinyenti letinkhulu

naletingetulu kwetingcondvo tetfu.

₆Utjela ngcocwane atsi:

‘Yehlela emhlabeni,’

nasetihlambini tetimvula atsi:

‘Bani sihhuhhula lesinemandla.’

₇Usuke entela kutsi bonkhe bantfu labentile

bayati imisebenti yakhe,

umisa bonkhe bantfu emisebentini yabo.

₈Tilwane tiyabhaca,

tihlale emihumeni yato.

₉Sihhushuhhushu sihoshobe siphume emgodzini waso,

nelichwa liphume emoyeni lowendlulako.

₁₀Kuphefumula kwaNkulunkulu kukhafula lichwa,

kwente emanti abe tibhelekeca temanti lomile.

₁₁Wetfwesa emafu ngemswakama,

asakate imibane igcwale kuwo.

₁₂Ngekuyalwa nguye

iphitsitela igcwale umhlaba wonkhe jikelele,

iphutfuma kwenta loko layitfume kona.

₁₃Wehlisa emafu,

khona atewujezisa bantfu,

nome atewunisela umhlaba wakhe,

akhombise lutsandvo lwakhe.

₁₄“Lalela lapha, Jobe,

asewume ucabange kahle ngetimanga taNkulunkulu.

₁₅Uyati yini kutsi Nkulunkulu uwabusa kanjani emafu,

nekutsi uyiklazisa kanjani imibane yakhe?

₁₆Uyawati yini kutsi emafu alenga kanjani

eme kahle kangaka emoyeni, angadziliki,

leto timangaliso takhe lowo lophelele ngelwati?

₁₇Wena muntfu loshiswa kwekwembatsa kwakho

ngesikhatsi kuhhusha umoya waseningizimu uthulisa live,

₁₈ungahlanganyela yini naye

ekwendlaleni kwakhe sibhakabhaka

lesicine njengesibuko selitfusi lelincibilikisiwe?

₁₉“Sitjele kutsi sifanele sitsini kuNkulunkulu;

tingcondvo tetfu timnyama,

site lutfo lesingalusho kuye.

₂₀Kufanele yini kutsi atjelwe

kutsi nami ngifuna kukhuluma?

Ukhona yini kambe umuntfu longafuna kumitwa eva?

₂₁Kute umuntfu longabukana nelilanga,

ebukhatikhatini balo esibhakabhakeni,

emvakwekutsi umoya sewusishanyele sonkhe.

₂₂Uchamuka enyakatfo ngebukhatikhati bakhe begolide,

Nkulunkulu uta ngebuNkulunkulu bakhe lobesabekako.

₂₃Somandla ungetulu kwemandla etfu,

uphakeme ngemandla nangekulunga kwakhe;

ngebukhulu bekulunga kwakhe akacindzeteli muntfu.

₂₄Ngako-ke bantfu bayamhlonipha,

ngobe akabanaki yini bonkhe labacabanga

kutsi bahlakaniphile enhlitiyweni?”