Jobe 30

₁“Kodvwa nyalo sebahlekisa ngami,

bantfu labancane kunami,

boyise babo lengangingabeyisa

ngingabavumeli kutsi basite tinja tami

ekweluseni timvu tami.

₂Ngangingatfolani nje ngemsebenti wetandla tabo,

bantfu lababemandla abo esukile kubo?

₃Bondziswe kweswela nesigagadvu sendlala,

bahhubhana netimphandze tetihlahla tasehlane,

yebo, elugwadvule ebusuku.

₄Babehlwatsika titselo letimunyu emahlatsini,

kudla kwabo kutimphandze tesihlahla semtsanyelo.

₅Bacoshwa kubantfu bakubo,

bekhutwa njengemasela.

₆Bacindzeteleka kutsi bayewuhlala etihosheni letomile,

yebo, etihosheni letomile letingenamanti;

bahlale emkhatsini wemadvwala nasemigodzini.

₇Babebhonsa ekhatsi emahlatsini

njengetimbongolo tesiganga,

bahlangane ngetinhloko phasetihlahla,

₈luhlobo lwebantfu lababi

nalabalihlazo lelingachazeki,

bacoshwa bakhishwa eveni.

₉“Manje sengiyinhlekisa kumadvodzana abo,

sengiyingoma kuwo;

ngiyintfo yekudlala.

₁₀Sebayangenyanya,

bahambela khashane nami,

abasesabi nekungikhafulela ebusweni.

₁₁Njengobe Nkulunkulu sewungente ngaba butsakatsaka,

wangenta ngaba sehluleki,

bangitfobisa ngibukile.

₁₂Ngesekudla sami sive siyahlasela,

babekela tinyawo tami tingibe,

bakha emasu ekungibhubhisa.

₁₃Bavimba indlela yami,

bayaphumelela ekungibhubhiseni,

kantsi kute nalobasitako.

₁₄Batseleka ngato tonkhe tintfunjana

tenqaba batengihlasela.

Bafohla lapho kubhidlike khona,

batseleke ngekhatsi.

₁₅Tesabiso tiyangehlula,

kuhlonipheka kwami kususiwe kimi,

kwaba shangatsi kupheshulwe ngumoya,

kuphepha nenhlalakahle yami kunyamalale njengemafu.

₁₆“Manje kuphila kwami kuyangikhweshela,

emalanga eminjunju ayangintfonya.

₁₇Busuku bubhobosa ematsambo ami,

emahlaba ami langihhwebhako akanakuphumula.

₁₈Ngemandla akhe lamakhulu

Nkulunkulu ugucuka abe njengekwekwembatsa kimi.

Ungibopha njengentsamo yengubo yami.

₁₉Ungilahla eludzakeni,

sengehliswe ngaze ngaba njengelutfuli nemlotsa.

₂₀“Ngikhala kuwe, Nkulunkulu wami!

Kodvwa wena awungiphendvuli.

Ngiyasukuma ngime ngetinyawo,

kodvwa wena umane ungibuke nje.

₂₁Sewujike waba nelulaka kimi,

ngemandla esandla sakho uyangihlasela.

₂₂Uyangihlutfula ungijike ngemuke nemoya,

ungiyekele nginhlanhlatse nesivunguvungu.

₂₃Ngiyati kutsi uyawungehlisela phansi kulabafile,

endzaweni lemiselwe bonkhe labaphilako.

₂₄“Empeleni umhlaselelani umuntfu lobhujiswako,

umuntfu longeke asatisite ngalutfo

ngaphandle kwekutincengela umusa kuwe?

₂₅Angizange ngibakhalele yini

bantfu labasenhluphekweni?

Umphefumulo wami awuzange ubakhalele yini

bantfu labamphofu?

₂₆Kodvwa nangitsi ngifuna lokuhle,

kusuke kufike lokubi;

nangitsi ngifuna kukhanya,

kusuke kuchamuke bumnyama.

₂₇Inhlitiyo yami iyaphitsitela ayinako kuthula,

emalanga etinhlupheko amelene nami.

₂₈Ngihamba ngizula ngigcungcile, nginyukubele,

ngibe ngingakafuswa lilanga,

kute kimi injabulo.

Ngiyasukuma emkhambatsini ngikhale, ngicela lusito.

₂₉Sengigucuke ngaba ngumnakabomphungutja,

ngaba ngumngani wetahhukulu.

₃₀Sikhumba sami sesigucuke saba mnyama, sacecebuka;

umtimba wami uyavutsa ngumkhuhlane.

₃₁Lihabhu lami selilungiselelwe kulila,

nemntjingozi wami sewulungiselwe umsindvo wekukhala,

yebo, umsindvo wekukhala ngimemete.”