Jobe 24

₁“Somandla akatimisi ngani tikhatsi tekwehlulela?

Kwentiwa yini kutsi labo labamatiko

bangabi nalo lwati ngetikhatsi takhe?

₂Bantfu bayatikhweshisa tikhonkhwane teminyele,

belusele khona imihlambi yabo yekwebiwa.

₃Bacosha imbongolo yentsandzane,

batsatse nenkhabi yemfelokati ibe sibambiso.

₄Bakhweshisa labeswele endleleni,

baphocelele bonkhe labamphofu belive kutsi babhace.

₅Njengetimbongolo tesiganga ehlane,

labamphofu bayazulazula bafunane nekudla ehlane,

kute lenye indzawo

lapho bangatfolela bantfwababo khona kudla.

₆Babutsa kudla kwetifuyo emahlangeni,

bakhwimite etivinini talababi.

₇Ngenca yekweswela kwekwembatsa,

balala bangcunu busuku bonkhe;

kute labangakwembatsa nakumakhata.

₈Banetfwa babe manti timvula temagcuma,

banamatsele emadvwaleni, ngobe beswele indlu.

₉Umntfwana longenayise uyahlutfulwa ebeleni,

luswane lwalomphofu lutsatselwe kubhadala sikwelede.

₁₀Ngenca yekweswela kwekwembatsa, bahamba ngcunu,

betfwala tinyandza, kodvwa bajinge babulawe yindlala.

₁₁Bafihlita titselo temincumo etibebesini,

bahlikihle ngematje ekuhluta liwayini;

noko bajinge babulawe koma.

₁₂Kuquma kwalabafako kuvakala edolobheni,

nemiphefumulo yalabalimele ikhalela kusitwa.

Kodvwa Nkulunkulu kute lambeka licala

ngaloko lokubi lokwentiwe.

₁₃“Bakhona labo labamelene nekukhanya,

labangatati tindlela tako,

nalabangahlali etindleleni tako.

₁₄Kutsi kungahlwa, umbulali avuke,

abulale labamphofu nalabeswele;

ebusuku uhamba eba,

agcekeza tindlu njengelisela.

₁₅Liso lesiphingi licaphela bumnyama,

sicabange sitsi: ‘Kute lotangibona,’

sihlala ngekufihla buso baso.

₁₆Nase kumnyama emadvodza agcekeza angene etindlini,

kodvwa emini ativalela endlini,

akevani nekukhanya.

₁₇Ngobe kubo bonkhe

bumnyama lobukhulu ngusekuseni ngeluvivi,

batente bangani netesabiso tebumnyama.”

₁₈“Bantfu labanjalo bangemagwebu lantanta emantini,

sabelo sabo sicalekisiwe eveni,

khona kutabate loya etivinini.

₁₉Njengobe kushisa nesomiso

kuhlwitsa sitfwatfwa lesincibilikile,

kanjalo nelithuna liyabahlwitsa labo labonako.

₂₀Sibeletfo siyabakhohlwa,

badliwe timphetfu;

lababi abasakhunjulwa,

kodvwa babhidlika njengesihlahla lesibolile.

₂₁Bagagadlela inyumba lengenamntfwana,

nakumfelokati abakhombisi musa.

₂₂Kodvwa Nkulunkulu ngemandla akhe

uyabahohobisa labo labanemandla,

nome bangahlala batinte,

noko abanasiciniseko ngekuphila kwabo.

₂₃Angabenta bativele kuphumula lokuphephile,

kodvwa emehlo akhe abuka tindlela tabo.

₂₄Kwesikhashana nje bayaphakanyiswa banotse,

emvakwaloko sebayanyamalala,

bayatfotjiswa,

batsatfwe njengabo bonkhe,

basikwe njengesikhwebu eluhlangeni.

₂₅“Nangabe akunjalo,

ngubani longasho kutsi nginemanga,

anciphise emavi ami awente lite?”