Jeremiya 7

₁Leli livi laSimakadze lelefika kuJeremiya, latsi: ₂“Mani esangweni lendlu yaSimakadze; ushumayele umemetele nankha emavi:

“ ‘Vanini livi laSimakadze, nonkhe nine sive sakaJuda leningena kulamasango kuyawukhonta Simakadze. ₃Naku lokushiwo nguSimakadze longuSomandla, Nkulunkulu wema-Israyeli, utsi: Guculani tindlela tenu kanye netento tenu tilunge, khona ngiyawunivumela kutsi nihlale kulendzawo. ₄Ningawetsembi lamagama langemanga nitsi: “Leli lithempeli laSimakadze, lithempeli laSimakadze, lithempeli laSimakadze!” ₅Nanitigucula ngempela tindlela tenu netento tenu, niphatsane ngekwemtsetfocotfo, ₆naningabacindzeteli labo bekuhamba, nalabangenaboyise, nebafelokati, ningayicitsi nengati lengenacala kulendzawo, ningabalandzeli labanye bonkulunkulu kutsi nitilimate nine, ₇mine-ke ngiyawunenta nihlale kulendzawo, eveni lengalipha boyihlomkhulu kutsi libe labo phakadze naphakadze. ₈Kodvwa bukani la, nine netsembele emavini langemanga nalangenamsebenti.

₉“ ‘Nisetakweba yini, nibulale, niphinge, nifungele emanga, nitfuncise imphepho kuBhali, nilandzele labanye bonkulunkulu leningazange senibati, ₁₀bese niyeta nitewuma lapha embikwami kulendlu leneLibito lami, nitsi: “Siphephile,” kambe niphephele kutsi nente tonkhe letintfo letisinengiso? ₁₁Kungabe lendlu, leneLibito lami, seyigucuke yaba ngumhume wabosidlani yini lapha kini? Kodvwa bengisolomane ngibuka! Kusho Simakadze.

₁₂“ ‘Hambani nyalo niye endzaweni leseShilo, lapho ngacala khona kwenta indzawo yekubeka Libito lami, nibone kutsi ngentani kuyo ngenca yebubi besive sami, ema-Israyeli. ₁₃Ngesikhatsi nenta tonkhe letintfo, bengikhuluma kini njalonjalo ngaletintfo, kodvwa anikangilaleli; nginibitile, kodvwa anikasabeli, kusho Simakadze. ₁₄Ngako-ke loko lengakwenta eShilo, ngisetakwenta nanyalo kulendlu lebitwa ngeLibito lami, lelithempeli lenetsembele kulo, nendzawo lengayipha nine kanye naboyihlomkhulu. ₁₅Ngitanikhipha lapha ebukhoneni bami nginilahle, njengaloku ngenta kubomnakenu, sonkhe sive saka-Efrayimu.’ ”

₁₆“Ngako-ke, wena Jeremiya, ungabathandazeli labantfu, futsi ungabancuseli, ungabancengeli; ungangincengi nami, ngobe ngingeke ngikuve. ₁₇Awuboni yini kutsi bentani kulamadolobha akaJuda, nasetitaladini taseJerusalema? ₁₈Bantfwana batfota tinkhuni, emadvodza alumekela imililo, bafati badovana nenhlama, babhaka emakhekhe eNdlovukazi yeliZulu. Batfulula iminikelo yetinatfo kulabanye bonkulunkulu bentela kuchukuluta lulaka lwami. ₁₉Kodvwa ngimi yini lona labamchukulutako? kusho Simakadze. Abatilimati bona yini, batitsele bona ngelihlazo?

₂₀“Ngako-ke naku lokushiwo yiNkhosi Simakadze, itsi: Intfukutselo yami kanye nelulaka lwami kutawutfululelwa etikwalendzawo, etikwebantfu netinkhomo, etikwetihlahla tesiganga kanye nasetikwetitselo temhlaba, lutawuvutsa lungaphindzi lucimeke.

₂₁“Naku lokushiwo nguSimakadze longuSomandla, Nkulunkulu wema-Israyeli, utsi: Chubekani, yengetani leminikelo yenu yekushiswa kulena leminye imihlatjelo yenu, nijinge nitidlele kwanine lenyama! ₂₂Ngobe ngesikhatsi ngikhipha boyihlomkhulu eGibhithe, ngikhuluma kubo, angizange ngibanike imiyalo ngeminikelo yekushiswa nangemihlatjelo, ₂₃kodvwa ngabanika umyalo lotsi: Ngilaleleni, mine-ke ngiyawuba nguNkulunkulu wenu, nine nibe sive sami. Hambani ngato tonkhe tindlela tami lenginiyale ngato, kuze kunihambele kahle. ₂₄Kodvwa abazange balalele, futsi abanakanga nekunaka; esikhundleni saloko balandzela kutsambekela kwenkhani yetinhlitiyo tabo letimbi. Babuyela emuva, bangete baya embili. ₂₅Kusukela ngesikhatsi lekwaphuma ngaso boyihlomkhulu eveni laseGibhithe, kuze kube ngunyalo, benginitfumelela tinceku tami baphrofethi lilanga ngelilanga njalo nje. ₂₆Kodvwa abazange bangilalele, abanginakanga nekunginaka. Bacinisa tinhloko tabo, benta tono letinyenti kakhulu kunaletentiwa boyisemkhulu.

₂₇“Nawubatjela konkhe loku, bangeke bakulalele; nawubabita, bangeke basabele. ₂₈Ngako-ke tsani kubo: ‘Lesi sive lesingamlalelanga Simakadze Nkulunkulu waso, futsi asiphendvukanga nasicondziswa. Liciniso seliphelile; linyamalele emilonyeni yabo. ₂₉Hhulani tinwele tenu, nine bantfu baseJerusalema, nitilahle, nilile sililo emagcumeni laphakeme, ngobe Simakadze usilahlile, wasishiya lesitukulwane lesingaphansi kwelulaka lwakhe.’ ”

₃₀“ ‘Sive sakaJuda sente bubi emehlweni ami, kusho Simakadze. Bagcumeke tithico tabo letitinengiso endlini lebitwa ngeLibito lami, bayingcolisa. ₃₁Bakhe tindzawo letiphakeme taseThofethi eSigodzini sakaBheni Hinomu kutsi bayewushisa emadvodzana nemadvodzakati abo emlilweni, intfo lengingazange ngibayale ngayo, futsi lengazange ingene nasengcondvweni yami. ₃₂Ngako-ke caphelani, ayeta emalanga, kusho Simakadze, lapho bantfu bangasayikuyibita ngekutsi yiThofethi nome batsi Sigodzi sakaBheni Hinomu, kodvwa bayawutsi Sigodzi Sekuhlatjwa, ngobe bayawungcwaba labafile eThofethi, kuze kubete indzawo. ₃₃Tidvumbu talabo bantfu tiyawuba kudla kwetinyoni tasemoyeni nekwetilwane tesiganga; kuyawubate nalokuyatetfusa, aticoshe. ₃₄Ngiyawucedza imisindvo yekujabula neyekutsakasa, ngicedze neliphimbo lemyeni nelamakoti emadolobheni akaJuda nasetitaladini taseJerusalema, ngobe lelive liyawusala likhala libhungane.’ ”