Jeremiya 6

₁“Balekani niyewubhaca, sive sakaBhenjamini!

Sukani eJerusalema nibaleke!

Shayani impalampala eThekhowa!

Phakamisani siboniso semlilo eBhethi Hakheremu!

Ngobe kulunguta inhlekelele, ichamuka ngasenyakatfo,

yebo, imbhubhiso lenkhulu.

₂Ngiyawuyibhubhisa iNdvodzakati yaseSiyoni,

lenhle kangaka naleyincelencele kangaka.

₃Iyawusukelwa belusi

kanye nemihlambi yabo balwe nayo,

bayawumisa emathende abo bayitungelete,

ngulowo nalowo anakekele indzima yakakhe.”

₄Batsi: “Tilungiseleleni imphi yekubhekana nayo!

Sukumani nihlasele kusesemini!

Kodvwa bukani, kukhanya kwelilanga sekuyafiphala,

nematfunti akusihlwa semadze.

₅Ngako-ke sukumani,

asihlasele ebusuku,

sibhubhise tinqaba tayo!”

“Gawulani tihlahla,

nibutsise tindvundvuma tekuvimbetela iJerusalema.

Lelidolobha kufanele lijeziswe;

ligcwele incindzetelo.

₇Njengemtfombo umpompota emanti awo,

nalo liwukhafula kanjalo-ke umonakalo walo.

Budlwangudlwangu nembhubhiso kuhokoma kulo,

kugula kwalo nemanceba alo asembikwami njalo.

₈Tsatsa seluleko, wena Jerusalema,

nome-ke ngitakufulatsela nawungasitsatsi,

live lakho ngilente lisale lilihlane,

khona kutebate umuntfu lohlala kulo.”

“Abakhukhute insali yaka-Israyeli,

bayikhwimite njengemvini;

phindza wendlulise sandla sakho etikwemagala,

ulingise umuntfu lovuna emagelebisi.”

₁₀Ngubani nje lengingakhuluma kuye ngimecwayise?

Ngubani lotangilalela?

Tindlebe tabo tivalekile, kuze bangetikuva.

Livi laSimakadze lisikhubekiso kubo,

abajabuli ngalo.

₁₁Kodvwa mine ngigcwele lulaka lwaSimakadze,

futsi ngingeke ngisalubeketelela lukimi.

“Lutfululele kubantfwana labasetitaladini,

nasemajaheni labutsene ndzawonye;

bonkhe bafati nemadvodza abo bayawubhajwa kulo,

kanye nalabadzala labo lasebahanjelwe ngiminyaka.

₁₂Tindlu tabo tiyawunikwa labanye,

konkhe kanye nemasimi abo nebafati babo,

nangiphindza ngelula sandla sami

kulabo labahlala kulelo live,” kusho Simakadze.

₁₃“Kusukela kulomncane kakhulu kuye kulomkhulu kakhulu,

bonkhe babogubhela kwesabo;

baphrofethi nebaphristi bayafanana,

bonkhe bayayengana.

₁₄Babopha emanceba ebantfu bami

kube shangatsi yintfo nje lengenamsebenti,

babe batsi: ‘Kuthula, kuthula,’

kube kantsi kute nalokuthula.

₁₅Kantsi banawo yini emahloni

ngemanyala abo labawentako?

Cha, bate nalamancane nje emahloni,

abakwati ngisho nekukhophota.

Ngako batakuwela kulabawile,

bayawukwehliselwa phansi nangibajezisa,”

kusho Simakadze.

“Manini emahlanganweni etindlela, nibuke,

butani tindlela takadzeni,

butani kutsi nguyiphi indlela lelungile,

bese nihamba ngayo,

niyawutfola kuphumula kwemiphefumulo yenu.

Kodvwa nine natsi: ‘Singeke sihambe ngayo.’

₁₇Ngabeka balindzi etikwenu, ngatsi:

‘Lalelani kukhala kwempalampala,’

kodvwa nine natsi: ‘Ngeke sikulalele.’

₁₈Ngako lalelani, nine tive.

Caphelisisani, nani bofakazi,

kutsi kuyakwenteka njani kubo.

₁₉Awu mhlaba, vani!

Ngitakwehlisela inhlekelele kulesive,

sitselo semacebo abo,

ngobe abakawalaleli emavi ami,

bawala nemtsetfo wami.

₂₀Nginandzabani mine nemphepho yaseSheba,

nome-ke nemakha ekhalamusi lanongotelako

laphuma eveni lelikhashane?

Iminikelo yenu yekushiswa ayikemukeleki kimi,

nemihlatjelo yenu ayingijabulisi.”

“Ngiyawubeka emavimbandlela embikwalesive.

Boyise kanye nemadvodzana bayawukhutjwa kuwo,

bomakhelwane kanye nebangani bayawubhubha.”

“Buka, kuta imphi,

lechamuka eveni langasenyakatfo,

sive lesikhulu sichukulutiwe,

sisukela emikhawulweni yemhlaba.

₂₃Bahlome ngebutjoki nangesikhali;

banelulaka, abanamusa.

Bevakala njengelwandle loludvumako,

nabagijima ngemahhashi abo;

beta njengebantfu labavivele imphi,

batewuhlasela wena,

awu, Ndvodzakati yaseSiyoni.”

₂₄Siyivile imibiko ngabo,

saphela emandla,

imikhono yetfu iyalenga nje kitsi,

sibanjwe kudzabuka nekwesaba lokukhulu,

tinhlungu letifanana netemfati lobelekako.

₂₅Ningaphumeli emasimini,

nome-ke nihambe emigwacweni,

ngobe sitsa siphetse inkemba,

kuyesabeka yonkhe indzawo.

₂₆Awu, sive sami, yembatsani emasaka,

nitiphucaphuce emlotseni;

lilani ngekudzabuka lokukhulu,

kube shangatsi kwendvodzana lekukuphela kwayo,

ngobe umbhubhisi uyakusitselekela

ngekushesha lokukhulu.

₂₇“Ngikwente waba ngumhloli wetinsimbi,

nebantfu bami bayinsimbi,

khona utewucaphela utivivinye tindlela tabo.

₂₈Bonkhe babonhloko ayivutfwa, nebahlubuki,

bahambe bahlambalata.

Balukhuni balitfusi nensimbi,

bonakele bonkhe ngetento tabo letimbi.

₂₉Umfutfo uyafutseka kuyesabisa,

kutsi utewushisa umtfofu ngemlilo,

kodvwa kucengisiselwa lite nje,

ngobe laba lababi abakhishwa.

₃₀Babitwa ngekutsi bayisiliva lelahlwako,

ngobe mine Simakadze ngibalahlile.”