Jeremiya 45

₁Naku Jeremiya, umphrofethi, lakutjela Bharuki, umsa waNeriya, ngemnyaka wesine wekubusa kwaJehoyakimu, umsa waJosaya, inkhosi yakaJuda, emvakwekutsi Bharuki asabhale encwadzini legocotwako emavi Jeremiya labemtjele wona, watsi: ₂“Naku lokushiwo nguSimakadze Nkulunkulu wema-Israyeli, ukhuluma kuwe Bharuki, utsi: ₃Watsi kimi: ‘Nako kimi! Simakadze sewengete iminjunju etinhlungwini tami, sengiphelile ngenca yekububula kwami, angisatfoli nekuphumula.’ ”

₄Simakadze watsi: “Khuluma kuye, utsi: ‘Naku lokushiwo nguSimakadze, utsi: Loko lesengikwakhile ngiyawukuketula, ngikuzuphune naloko bengikuhlanyelile eveni lonkhe. ₅Pho, ungatifunela yini wena tintfo letinkhulu? Ungatifuni. Ngobe ngiyakwehlisela inhlekelele etikwabo bonkhe bantfu, kodvwa wena nome ngukuphi lapho uya khona, ngiyawukwenta uphunyule kanye nemphilo yakho, kusho Simakadze.’ ”