Iminyaka lengema-70 yekutfunjwa
1Livi lefika kuJeremiya macondzana nabo bonkhe bantfu bakaJuda emnyakeni wesine wekubusa kwaJehoyakimu, umsa waJosaya, inkhosi yakaJuda, lekwakungumnyaka wekucala wekubusa kwaNebukhadnezari, inkhosi yaseBhabhulona. 2Ngako Jeremiya, umphrofethi, wakhuluma kubo bonkhe bantfu bakaJuda nakubo bonkhe lababehlala eJerusalema, watsi: 3Iminyaka lengema-23, kusukela emnyakeni weli-13 wekubusa kwaJosaya, umsa wa-Amoni, inkhosi yakaJuda, kuze kube ngulamuhla, livi laSimakadze belifika kimi, nami ngilikhulume kini emaphindzephindze, kodvwa anizange senilalele.
4Lite nome Simakadze asanitfumelele tonkhe tinceku takhe baphrofethi emaphindzephindze, anikalaleli, futsi aninakanga nekunaka. 5Batsi: “Gucukani nyalo, ngulowo nalowo kini, niyiyekele imihambo yenu lemibi kanye netento tenu letimbi, khona nitewuhlala kulelive Simakadze lanipha lona nine naboyihlomkhulu phakadze naphakadze. 6Ningabalandzeli labanye bonkulunkulu kutsi nibasebentele nikhonte bona. Ningacali ningicunule ngize ngitfukutsele ngaloko lenikwente ngetandla tenu. Khona-ke ngingeke nginilimate.”
7Simakadze utsi: “Kodvwa anizange ningilalele, seningicunule ngaloko lokwentiwe tandla tenu, natiletsela kulinyatwa etikwenu.”
8Ngako-ke Simakadze Somandla utsi: “Njengobe ningakawalaleli emavi ami, 9ngitawubita tonkhe tive tangasenyakatfo kanye nenceku yami Nebukhadnezari, inkhosi yaseBhabhulona, ngibaletse batekulwa nalelive kanye netakhamiti talo nato tonkhe tive letibomakhelwane,” kusho Simakadze. “Ngiyawubabhubhisa ngibacedze nya, ngibente intfo yekwesabisa, nenhlekisa, nencitsakalo yaphakadze. 10Imisindvo yekujabula nekutfokota ngiyawuyisusa kubo, ngisuse nemaphimbo abomakoti nemyeni, nemsindvo wematje ekusila kanye nekukhanya kwesibane. 11Lonkhe live liyawusala lilihlane lelikhala libhungane, naletive tiyawukhonta inkhosi yaseBhabhulona iminyaka lengema-70.
12“Kodvwa kuyawutsi kungaphela leminyaka lengema-70, bese ngijezisa inkhosi yaseBhabhulona nesive sayo, nelive lemaBhabhulona, ngenca yelicala labo, bese lelive lawo ngilenta liba lihlane phakadze naphakadze,” kusho Simakadze. 13“Lelive ngiyawuliletsela tonkhe letintfo lengikhulume ngato letimelene nalo, ngilehlisele konkhe lokubhalwe kulencwadzi kwaphrofethwa nguJeremiya ngato tonkhe letive. 14Bona matfupha bayawugcilatwa tive letinyenti nangemakhosi lamakhulu. Ngiyawubakhokhela ngaloko lokubafanele ngetento tabo nangemsebenti wetandla tabo.”
Kwehlulela kwaNkulunkulu tive
15Naku-ke lokwashiwo nguSimakadze Nkulunkulu wema-Israyeli kimi, watsi: “Tsatsa lapha esandleni sami nansi inkomishi legcwele liwayini lentfukutselo yami, bese unatsisa tonkhe letive lengikutfumela kuto kutsi tilinatse. 16Titawutsi tingalinatsa, bese tiyadzayitela, tihlanye, ngenca yenkemba lengitayitfumela emkhatsini wato.”
17Ngako ngatsatsa lenkomishi esandleni saSimakadze nganatsisa tonkhe letive Simakadze labengitfumele kuto: 18IJerusalema nemadolobha akaJuda, emakhosi netindvuna tawo, kubenta kutsi babe yincitsakalo, nentfo yekwesabisa neyekuhlekisa, nesicalekiso, njengobe banjalo nalamuhla; 19Faro, inkhosi yaseGibhithe, netinceku takhe, netiphatsimandla takhe kanye nabo bonkhe bantfu bakhe, 20nabo bonkhe bantfu betive labalapho; onkhe emakhosi ase-Usi; onkhe emakhosi emaFilisti e-Ashkeloni, nase-Gaza, nase-Ekroni, nebantfu labasele e-Ashdodi; 21bonkhe baka-Edomu, nebakaMowabi, nebaka-Amoni; 22onkhe emakhosi aseThire naseSidoni; emakhosi langaselugwini ngesheya kwelwandle; 23iDedani, neThema, neBuze, nabo bonkhe labasetindzaweni letikhashane; 24onkhe emakhosi ase-Arabiya kanye nawo onkhe emakhosi ebantfu betive labahlala ehlane; 25nawo onkhe emakhosi aseZimri, newase-Elamu, newaseMediya; 26nawo onkhe emakhosi asenyakatfo, edvutane nakhashane, lenye emvakwalenye, nayo yonkhe imibuso lesebusweni bemhlaba. Kuyawutsi emvakwabo bonkhe inkhosi yaseSheshaki nayo iyawulinatsa.
27“Uyawubatjela-ke utsi: ‘Naku lokushiwo nguSimakadze Somandla, longuNkulunkulu wema-Israyeli, utsi: Natsani, nidzakwe, nihlante, bese niyawa ningaphindzi nivuke, ngenca yenkemba lengitayitfumela emkhatsini wenu.’ 28Kodvwa nangabe bayala kutsatsa lenkomishi esandleni sakho banatse, batjele utsi: ‘Naku lokushiwo nguSimakadze Somandla, utsi: Kufanele niyinatse! 29Bukani, sengiyacala kwehlisela inhlekelele kulelidolobha lelineLibito lami, ngempela kungenteka yini kutsi nihlale ningajeziswa? Ningeke nihlale ningajeziswa, ngobe sengibita inkemba etikwabo bonkhe labahlala emhlabeni, kusho Simakadze Somandla.’
30“Nyalo-ke phrofetha kubo onkhe lamavi lamelana nabo, utsi:
“ ‘Simakadze uyawubhavumula asetulu,
livi lakhe uyawuliphakamisa
asendzaweni yakhe lengcwele,
uyawubhavumula ngemandla emelane nelive lakhe.
Uyawumemeta njengalabahluta emagelebisi,
amemete emelane nabo bonkhe labahlala emhlabeni.
31Sidvumo siyawuhokoma sivakale
nasemikhawulweni yemhlaba,
ngobe Simakadze tive uyawutibeka emacala,
uyakwehlulela bonkhe bantfu,
lababi abalalise phansi ngenkemba,’ ” kusho Simakadze.
32Naku-ke lokushiwo nguSimakadze longuSomandla, utsi:
“Bukani! Inhlekelele yandza tive ngetive,
kukhuphuka sivunguvungu lesinemandla
emikhawulweni yonkhe yemhlaba.”
33Ngaleso sikhatsi labo labayawube sebabulewe nguSimakadze bayawugcwala yonkhe indzawo, kusukela ngala kwemhlaba kuye ngale kwawo. Bangeke balilelwe, futsi bangeke babutfwe nome bangcwatjwe, kodvwa bayawufanana netibi letisakateke phansi emhlabatsini.
34Khalani nilile, nine belusi;
gicikani elutfulini, nine baholi bemhlambi.
Ngobe sikhatsi sekuhlatjwa kwenu sesifikile,
niyakuwa niphihlike njengeludziwo loluhle.
35Kute lapho belusi bayawubalekela khona,
nebaholi bemhlambi abayiwuba naso siphephelo.
36Lalelani kukhala kwebelusi
nekulila kwebaholi bemhlambi,
ngobe Simakadze ubhidlita lidlelo labo.
37Tibaya tekuthula tiyawubhujiswa
ngenca yentfukutselo leyesabekako yaSimakadze.
38Njengelibhubesi umelusi uyawuphuma
ashiye umhume wakhe,
live labo liyawusala likhala libhungane
ngenca yenkemba yemcindzeteli,
nangenca yelulaka lolwesabekako lwaSimakadze.
