Jeremiya 2

“ ‘Ngiyakukhumbula kutinikela kwakho ebusheni bakho,

kutsi wawungitsandza kanjani usengumakoti,

wangilandzela kulo lonkhe lihlane,

eveni lelalingakahlanyelwa lutfo.

₃Israyeli abengcwele kuSimakadze,

tilinga tesivuno sakhe;

bonkhe labamshwabudzela babekwa licala,

inhlekelele yehlela etikwabo,’ ” kusho Simakadze.

₄Vanini livi laSimakadze,

ninendlu yakaJakobe,

nonkhe nine bantfu belusendvo lwendlu yaka-Israyeli.

₅Naku lokushiwo nguSimakadze, utsi:

“Cala lini boyihlo labalitfola kimi,

kutsi bangaze baphambuke kangaka kimi?

Balandzela tithico letingenamsebenti,

nabo sebagucuka baba lite.

₆Abazange babute, batsi:

‘Uphi Simakadze lowasikhipha eGibhithe,

wasihola sadzabula lihlane lelingenalutfo,

sadzabula live lelinetingagadvu nemigedze,

live lesomiso nebumnyama,

live lelingahanjwa ngumuntfu

nalelingahlalwa ngumunfu?’

₇Nganiletsa eveni lelivundzile

kutsi nitewudla titselo talo

kanye nesivuno salo lesinonile,

kodvwa nefika nalingcolisa live lami,

nenta lifa lami laba ngulelinengekako.

₈Baphristi abazange babute, batsi:

‘Uphi Simakadze?’

Labo labafundzisa ngemtsetfo abazange bangati,

nebaholi bangivukela.

Baphrofethi baphrofetha ngaBhali,

balandzela tithico letingenamsebenti.”

₉“Ngako-ke ngiyaphindza nginibeka emacala,” kusho Simakadze.

“Yebo, nebantfwana bebantfwabenu ngiyawubabeka emacala.

₁₀Yewelelani ngesheya

niye elugwini lwaseKhithimu nibuke,

tfumelani eKhedari nibukisise kahle, nibone kutsi

yake yaba khona yini intfo lefanana nale:

₁₁Sive sake santjintjiselana yini ngabonkulunkulu baso?

Yebo kona abasibo bonkulunkulu balutfo.

Kodvwa sive sami

sintjintjise ngenkhatimulo yaNkulunkulu waso,

sakhonta tithico letingenamsebenti.

₁₂Awu mazulu, tfutfumelani nimangale ngaloku!

Yetfukani ngekwetfuka lokukhulu,” kusho Simakadze.

₁₃“Sive sami sente tono letimbili:

Singishiyile mine, mtfombo wemanti ekuphila,

satimbela ticojana taso emadvwaleni,

ticojana letinetimbobo letingeke tiwemise emanti.”

₁₄“Kungabe Israyeli uyinceku yini

nome usigcili sekutalwa?

Kepha, kwentiwe yini kutsi abe yimphango?

₁₅Emabhubesi abhodlile, amhhongela.

Live lakhe alente laba lihlane lelingenalutfo,

emadolobha akhe ashisiwe,

asala akhala libhungane.

₁₆Kanjalo futsi nebantfu baseMemfisi nebaseThaphanesi

bahhumbule lukhakhayi lwenhloko yakho.

₁₇Ngabe anikatiletseli nine yini loku,

ngalokutsi nishiye Simakadze Nkulunkulu wenu

ngesikhatsi asanihola kahle endleleni?

₁₈Manje niyelani eGibhithe kuyawunatsa emanti aseShihori?

Kona niyeleni e-Asiriya

kuyawunatsa emanti alowo Mfula?

₁₉Bubi benu butanijezisa,

nekuhlubuka kwenu kutanitsetsisa.

Cabangani-ke nibukisise kahle

kutsi kubi kangakanani nekutsi kunibabela kangakanani,

nanishiya Simakadze Nkulunkulu wenu,

ningangesabi mine,”

kusho Simakadze, Simakadze longuSomandla.

₂₀“Lijoko lakho walephula, lokwa kadzeni,

watidzabula tibopho takho,

watsi: ‘Ngingeke ngikukhonte!’

Ngempela, kuwo onkhe emagcuma laphakeme

nangaphansi kwato tonkhe tihlahla

letendlala emagala ato,

walala phansi,

walala njengengwababane.

₂₁Bengikuhlanyele njengemvini welikhetselo,

weluhlobo lolucinile nalolwetsembekile.

Pho, ungigucukele kanjani lokutsi

bese uba ngumvini lokhohlakele longewesiganga?

₂₂Nome utigezisa ngasota

usebentisa nensipho lenyenti,

noko lelo chashata lelilicala lakho

solomane limile embikwami,”

kusho iNkhosi Simakadze.

₂₃“Ungasho kanjani-ke utsi: ‘Angikangcoliswa,

angikabalandzeli boBhali’?

Ase ubuke kutsi watiphatsa njani esihosheni,

cabangisisa ngaloko lokwentile.

Ulikamela lelisikati leligijima kakhulu,

leligijima lapha nalapha,

₂₄unjengembongolo yesiganga, leyetayele lihlane,

lehosha umoya nase ikhanuka,

ngubani nje longayivimbela nase ifuna kwekhwelwa?

Tonkhe tinkunzi tetimbongolo letiyicoshako

atikafaneli kutsi titikhatsate,

ngesikhatsi sekwekhwelwa titayitfola.

₂₅Ungagijimi kuze kudzabuke ticatfulo takho

nemphimbo wakho uze wome.

Kodvwa wena watsi: ‘Akusiti lutfo!

Ngiyatitsandza tithico tebetive,

futsi tona ngitatilandzela.’ ”

₂₆“Njengobe lisela lihlazeka nase libanjiwe,

kanjalo nendlu yaka-Israyeli ihlazekile,

bona, nemakhosi abo, netindvuna tabo,

nebaphristi babo kanye nebaphrofethi babo.

₂₇Bakhuluma elugodvweni batsi:

‘Wena ungubabe wami,’

nasetjeni bakhulume batsi:

‘Wena wangitala.’

Bangifulatsele, bafihla buso babo kimi,

kodvwa batsi nase bahluphekile bese batsi:

‘Kota utesisindzisa!’

₂₈Baphi kantsi labonkulunkulu benu lenatentela bona?

Abete phela, nangabe banganisindzisa nanisekuhluphekeni!

Maye Juda, ninabonkulunkulu labanyenti

ngangemadolobha enu.

₂₉“Ningibekelani emacala?

Nine nonkhe ningihlubukile,” kusho Simakadze.

₃₀“Ngajezisa bantfu bakini, kodvwa akukanisiti,

abakaphendvuki nasekujezisweni kwabo.

Inkemba yenu ishwabudzele baphrofethi benu,

njengelibhubesi lelifukutsako.

₃₁“Nine balesitukulwane,

zindlani ngelivi laSimakadze lelitsi:

Mine bengilihlane yini ku-Israyeli,

nome-ke live lebumnyama lobukhulu?

Sive sami sisholani kutsi:

‘Sikhululekile kutsi singajangaza,

singeke siphindze site kuwe’?

₃₂Intfombi iyabukhohlwa yini

buhlalu bayo lobuligugu,

nome makoti imihlobiso yakhe nakashada?

Noko sive sami singikhohlwe

emalanga lamanyenti langeke abalwe.

₃₃Maye, unemasu ekucoshaneni nelutsandvo!

Ngisho nebesifazane labangcole kabi

bangafundza tindlela takho.

₃₄Etingutjeni takho tekugcoka emadvodza atfola

umnyombo wekuphila kwalabamphofu labangenacala,

nome ungazange ubabambe bagcekeza.

Noko ngetulu kwako konkhe loku,

₃₅wena utsi: ‘Angati lutfo; akangitfukutseleli.’

Kodvwa mine ngitakwehlulela,

ngobe utsi: ‘Angikoni lutfo.’

₃₆Utiguculelani kangaka tindlela takho?

IGibhithe itakujabhisa,

njengaloku wake wajabhiswa yi-Asiriya.

₃₇Nawe utawusuka kuleyo ndzawo,

utawusuka ujabhile,

ngobe Simakadze sewubalahlile

labo bewukadze ubetsemba,

bangeke bakusite ngalutfo.”