YaJakobe 3

₁Bazalwane bami, akukuhle kutsi linyenti lenu libe bafundzisi, nati kutsi tsine lesifundzisako siyakwemukeliswa kwehlulelwa lokumatima. ₂Ngobe sonkhe siphosisa ngetindlela letinyenti; nakukhona longaphosisi ngekukhuluma, lowo uphelele ngempela, ngobe uyakwati kubamba ngisho nemtimba wakhe wonkhe shangatsi ngematomu. ₃Nasifaka ematomu emilonyeni yemahhashi kutsi atewusilalela, sisuke siwacondzisa umtimba wonkhe. ₄Ase nibuke nemikhumbi, nome imikhulu kangaka, ichutjwa ngimimoya lenemandla, noko icondziswa ngeliphini lelincane nje, iye lapho bashayeli bayo bafuna iye khona. ₅Kanjalo nelulwimi lusitfo lesincane, kantsi lutigabatisa ngetintfo letinkhulu.

Ase nibuke nje umlilo lomncane wokhela lihlatsi lelikhulu! ₆Lulwimi lungumlilo, lulive lebubi, lulwimi lusitfo lesingcolisa wonkhe umtimba, lokhela yonkhe imphilo ngemlilo lulunyekwa sihogo. ₇Yonkhe indalo yetilwane ingatsanjiswa: ngisho tinyoni, netilwane letihamba ngetisu, netilwane taselwandle; vele, bantfu batitsambisile letilwane. ₈Kodvwa kute longatsambisa lulwimi; lububi lobuyalukako, lugcwele shevu lobulalako. ₉Ngalo sibonga iNkhosi lenguBabe, nangalo sicalekisa bantfu labentiwe baba ngumfanekiso waNkulunkulu. ₁₀Emlonyeni munye kuphuma kubusisa nekucalekisa. Bazalwane bami, akufanele kube njalo. ₁₁Kuyenteka yini kutsi esicojeni sinye kuphume emanti lamnandzi nalababako? ₁₂Bazalwane bami, sihlahla semkhiwa singatitsela yini titselo temncumo, nome umvini temkhiwa? Sicobho lesikhipha emanti lababako singeke siwavete lamnandzi.

₁₃Ngubani lohlakaniphile nalocondzisisako emkhatsini wenu? Akakhombise imphilo yakhe lelungile ngemisebenti yakhe ngekutfobeka lokunenhlakanipho. ₁₄Kepha naninemona lobabako, nembango etinhlitiyweni tenu, ningatigabatisi; ngobe ngaloko liciniso nilenta emanga. ₁₅Lokuhlakanipha akuchamuki ngetulu, kodvwa ngekwemhlaba, nekwemvelo, nekwebusathane; ₁₆ngobe lapho kunemona nembango khona, kunesiphitsiphitsi nayo yonkhe imisebenti lemibi. ₁₇Kodvwa kuhlakanipha lokuchamuka ngetulu kwekucala kumsulwa, bese kuba nekuthula, nekutfobeka, nekulalela, kugcwele bubele netitselo letihle; akunalo lubandlululo nekutentisa.

₁₈Bantfu labaletsa kuthula, basuke bahlanyela kuthula, bese bavuna kulunga.