Isaya 57

₁Lolungile uyabhubha, kubete nalotihluphako

ngako enhlitiyweni yakhe.

Bantfu labatinikelako bayesuswa,

kubete nalokucondzako loko

kutsi labalungile bayesuswa,

kuze batewuphephiswa kulokubi.

₂Labo labahamba ngebucotfo

bangena ekuthuleni;

batfola kuphumula,

nabangena ekufeni.

₃“Kodvwa nine, wotani la,

nine madvodzana esangoma lesisikati,

nine ntalo yetiphingi neyetingwababane!

₄Ngubani lona lenimphukutako?

Ngubani lona lenikhombana ngaye ngetinhloko,

nisinekelane ematinyo ngaye?

Anisiyo yini intalelwane yebahlubuki?

Anisiwo yini umliba webacali bemanga?

₅Nishiselwa tinkhanuko etihlahleni tema-okhi

nangaphansi kwato tonkhe tihlahla

letendlala emagala ato.

Ninikela ngebantfwabenu emifudlaneni

nangaphansi kwemifantfu yemadvwala.

₆Emkhatsini wematje labusheleleti

asemifudlaneni ukhetsa tithico takho,

tona titabelo takho.

Yebo, utfululele kuto iminikelo yetinatfo,

wanikela nangeminikelo yalokutinhlavu.

Ngifanele ngeneliseke yini

ngato tonkhe letintfo?

₇Wendlale umbhedze wakho

etulu etintsabeni letiphakeme,

wase wenyukela khona kuyawushisa imihlatjelo.

₈Emvakwetivalo nasemvakwetinsika temnyango wakho,

ubeke titfombe tetithico takho.

Ungikhohliwe mine, wagwabula umbhedze wakho,

wagibela kuwo, wawandzisa kakhulu,

wavumelana nalabo lotsandza imibhedze yabo,

wabukana nebungcunu babo.

₉Waya kuMoloki nemafutsa emncumo,

wandzisa emakha akho.

Watfumela emancusa akho khashane,

wehlela edlizeni cobo lwalo!

₁₀Ukhatsatwe ngito tonkhe letindlela takho,

kodvwa awuzange usho kutsi: ‘Akusiti lutfo.’

Watfola kuvusetelwa kwemandla akho,

ngiko nje ungazange ucaleke.

₁₁“Ngubani lona lebewumvevela kangaka, umesaba,

uze ungetsembeki kimi,

ungasangikhumbuli,

futsi ungasangicabangi

ngisho nasenhlitiyweni yakho?

Akwentiwa kutsi sengithule

sikhatsi lesidze yini lokutsi ungasangesabi?

₁₂Ngitakudalula kulunga kwakho

kanye nemisebenti yakho,

futsi ingeke ikusite ngalutfo.

₁₃Nawukhala ucela kusitwa,

leticumbi takho tetithico atikusindzise!

Umoya uyawutiphephula tonkhe,

umoyana lomncane nje uyawutikhukhula.

Kodvwa lowo lowenta mine

ngibe siphephelo sakhe,

uyawudla lifa lelive,

adle lifa lentsaba yami lengcwele.”

₁₄Kuyawutsiwa: “Yakhani, yakhani,

lungisani umgwaco.

Susani emavimbela endleleni yebantfu bami.”

₁₅Ngobe nguloko lokushiwo nguLophakeme Losetulu,

lolibito lakhe linguLongcwele, utsi:

“Ngihlala etulu endzaweni lengcwele,

kodvwa nakuye lodzabukile

nalotfobekile emoyeni,

kutewuvuselela umoya walabatfobekile

nekuvuselela tinhlitiyo talabephukile emoyeni.

₁₆Ngingeke ngihlale ngisola njalonjalo,

futsi ngingeke ngihlale ngitfukutsele,

ngobe phela umoya wemuntfu ungaze ucaleke embikwami,

umphefumulo wemuntfu lengamdala.

₁₇Bengitfukutseliswe ngulesono sakhe sekuba bukhali,

ngase ngiyamjezisa,

ngabufihla buso bami

ngenca yekutfukutsela,

noko wachubeka nekuhlubuka kwenhlitiyo yakhe,

ahamba ngendlela yakhe.

₁₈Sengitibonile tindlela takhe,

kodvwa ngitamphilisa, ngimhole,

ngibuyisele indvudvuto kuye,

₁₉ngidale tibongelelo etindzebeni temlomo

walabalilako baka-Israyeli.

Kuthula, kuthula, kulabo labakhashane nalabasedvute,”

kusho Simakadze, “ngitawubaphilisa.”

₂₀Kodvwa lababi banjengelwandle loluyalutelako,

lwandle lolute kuphumula,

lolumagagasi alo akhephuta ludzaka nelubishi.

₂₁“Kute kuthula kulababi,” kusho Nkulunkulu wami.