Isaya 51

₁“Lalelani kimi,

nine lenifunisisa kulunga,

nalenifuna Simakadze:

Bukani kulelo dvwala lenacetulwa kulo

nakuleyo nkwali lenacotwa kuyo,

₂bukani ku-Abrahama, uyihlo,

nibuke nakuSara lowanitala.

Ngesikhatsi nangimbita abesemunye kuphela,

ngambusisa, ngamenta waba mnyenti.

₃“Ngempela, Simakadze uyakuyidvudvuta iSiyoni,

uyawutibuka ngesihawu tonkhe tindzala tayo;

emahlane ayo uyakuwenta abe njenge-Edeni,

tindzawo tayo letilihlane

atente tibe njengensimi yaSimakadze.

Kujabula nekutfokota kuyawutfolakala kuyo,

yebo, kubonga kanye nemsindvo wekuhlabela.

₄“Lalelani kimi, bantfu bami,

ngiveni, sive sami:

Umtsetfo uyawuphuma kimi,

umtsetfocotfo wami uyawuba kukhanya etiveni.

₅Kulunga kwami kusondzela ngekushesha,

insindziso yami isendleleni,

ngiyakwehlulela tive ngemkhono wami.

Tichingi tiyawubuka kimi,

tilindzele ngekwetsemba umkhono wami.

₆Phakamiselani emehlo enu emazulwini,

niwubuke nemhlaba phansi;

emazulu ayawunyamalala njengentfutfu,

nemhlaba uguge njengengubo,

nalabahlala kuwo bafe njengetimphungane.

Kodvwa insindziso yami

iyawukhonsa phakadze naphakadze,

kulunga kwami ngeke kuphele.

₇“Ngilaleleni, nine lenati kutsi kuyini lokulungile,

nine bantfu leninemtsetfo wami

etinhlitiyweni tenu:

Ningakwesabi kusolwa bantfu,

ningetfuswa ngisho natinhlamba tabo.

₈Ngobe umvunya uyawubadla njengengubo,

imphetfu iyawubamita njengensontfo.

Kodvwa kulunga kwami

kuyawukhonsa phakadze naphakadze,

nensindziso yami iyakuma

titukulwane ngetitukulwane.”

₉Vuka, vuka! Tembatsise ngemandla,

wena mkhono waSimakadze;

vuka, ube nguloku bewungiko kucala,

njengasetitukulwaneni takadzeni.

Kwakungesiwe yini lona lowacoba Rahabi waba ticucu,

lowagwaza leso silwane lesikhulu nalesesabekako?

₁₀Kwakungesiwe yini lowa lowomisa lwandle,

emanti alapho kushona khona kakhulu,

lowenta umgwaco ekujuleni kwelwandle,

kuze labahlengiwe bewelele ngesheya?

₁₁Labahlawulelwe baSimakadze bayawubuya.

Bayawungena eSiyoni ngekuhlabela

nangekujabula kwaphakadze

lokuyawuba ngumchele etinhloko tabo.

Kutfokota nekujabula kuyawuba kubo,

lusizi nekububula kubabalekele.

₁₂“Mine, mine ngekwami,

nginguye lonidvudvutako.

Benibobani-ke nine

kutsi ningesaba bantfu lababhubhako,

emadvodzana ebantfu, latjani nje,

₁₃kutsi ningakhohlwa Simakadze, uMenti wenu,

loweneka emazulu,

wabeka tisekelo temhlaba,

kutsi seningahlala ngekutfutfumela onkhe emalanga

ngenca yelulaka lwemcindzeteli,

lotilungiselela kunibhubhisa?

Ngobe lukuphi nje lulaka lwemcindzeteli?

₁₄Labo labatiboshwa batawukhululwa masinyane;

bangeke bafele kulomgodzi welijele labo,

futsi bangeke bakweswele kudla.

₁₅Ngobe nginguSimakadze Nkulunkulu wakho,

lonyakatisa lwandle kubhodle emagagasi alo,

nguSimakadze longuSomandla libito lakhe.

₁₆Ngibeke emavi ami emlonyeni wakho,

ngakusibekela ngemtfunti wesandla sami;

mine lengibeke emazulu endzaweni yawo,

nalengabeka tisekelo temhlaba,

ngikhuluma neSiyoni ngitsi:

‘Wena usive sami!’ ”

₁₇Vuka, vuka, sukuma, wena Jerusalema,

wena lonatse esandleni saSimakadze

indzebe yentfukutselo yakhe,

wena lominyele sinatfo lesiseludziweni

lesenta bantfu badzayitele.

₁₈Kuwo onkhe emadvodzana lowawatala

kwabate nayinye yekukucondzisa endleleni;

kuwo onkhe emadvodzana lowawakhulisa,

kwabate nayinye leyakubamba ngesandla sakho.

₁₉Lamaphindze etinhlekelele ehlele etikwakho,

ngubani nje longakudvudvuta?

Kulokuphihlitwa nekubhujiswa,

kuyo indlala kanye nenkemba,

ngubani longakudvudvuta?

₂₀Emadvodzana akho acalekile, adzindzibele

ekugcineni kwato tonkhe titaladi

njengenyamatane ibanjwe elugibeni.

Emadvodzana akho ehlelwe yintfukutselo yaSimakadze,

ahlaselwa kwekhutwa nguNkulunkulu wakho.

₂₁Ngako-ke, vani naku, wena lohlushwako,

nalosadzakisiwe, kodvwa hhayi ngeliwayini.

₂₂Naku lokushiwo yiNkhosi Simakadze,

Nkulunkulu wakho,

lovikela sive sakhe, utsi:

“Uyabona, sengiyisusile esandleni sakho

indzebe beyikwenta udzayitele;

kuleyo ndzebe, ludziwo lwentfukutselo yami,

ungeke uphindze unatse kuyo futsi.

₂₃Ngiyakuyifaka etandleni tebahluphi bakho,

labakhuluma kuwe batsi:

‘Khotsama phansi, khona sitewuhamba etikwakho.’

Umhlane wakho uwente ufanane nesiyilo,

ufanane nemgwaco lekungahanjwa etikwawo.”