Isaya 5

₁Ngitawuhlabelela lowo

lengimtsandzako

ingoma ngesivini sakhe, ngitsi:

Lowo lengimtsandzako abenesivini

egcumeni lelivundzile.

₂Wasimba wesusa onkhe ematje kuso,

wahlanyela kuso imivini yelikhetselo.

Wakha umbhoshongo wekulindza ekhatsi kuso,

wacopha nesikhamo seliwayini edvwaleni.

Abetsembe kutsi sitawutsela emagelebisi lamahle,

kodvwa satsela emagelebisi esiganga lamunyu.

₃“Nine lenihlala eJerusalema,

nani madvodza akaJuda,

yehlulelani emkhatsini wami nesivini sami.

₄Bekufanele ngenteni lokunye kulesivini sami,

ngetulu kwaloku lese ngikwentile?

Pho, kwentiwe yini kutsi nangifuna

emagelebisi lamahle kuso,

sona sitsele emagelebisi esiganga lamunyu?

₅Manje-ke senginitjela

kutsi ngitakwentani kulesivini sami:

Ngitawususa lolutsango lwaso,

lesivini sibhujiswe,

ngitawuhhihlita nalolubondza lwaso,

sinyatselwe phansi.

₆Ngitawusenta sibe siganga lesingenalutfo,

nemvini longatsenwa,

nemhlaba waso awuyikulinywa.

Kuyawukwena tinchachabutane nemanyeva.

Ngitawuyala nemafu kutsi anganisi imvula kuso.”

₇Phela, sivini saSimakadze longuSomandla

yindlu yaka-Israyeli,

kantsi sive sakaJuda

sona sititfombo tekujabula kwakhe.

Abebheke umtsetfocotfo,

kodvwa wakhandza kucitfwa kwengati,

wabheka kulunga,

kodvwa weva kukhala kwelusizi.

₈Maye kini nine lenengeta indlu kulenye indlu,

nengete insimi kulenye insimi,

kuze kubete nesikhadlana nje lesisalako,

bese nihlala nodvwana eveni.

₉Simakadze longuSomandla

ufunge etindlebeni tami, watsi:

“Impela tindlu letinyenti titawuba tindzala,

netindlu letinkhulu naletinhle tisale tingenamuntfu.

₁₀Sivini lesingalinywa tinkhabi letimbili

ngemalanga lalishumi

siyawuba nesivuno

lesilibhasikidi linye nje lemagelebisi,

nelisaka lenhlanyelo

liyawuba nesivuno lesiyimbita yinye kuphela.”

₁₁Maye kulabo labavuka ekuseni ngeluvivi

bagijimele etinatfweni letidzakanako,

batihlalele kuze kube ngusebusuku kakhulu,

badzimate behlulwe nguleliwayini labo.

₁₂Banemahabhu nemalire emadzilini abo,

nemafahlawane nemintjingozi kanye neliwayini,

kodvwa abatinaki tento taSimakadze,

abayiboni imisebenti yetandla takhe.

₁₃Ngako-ke lesive sami sitawutfunjwa

ngenca yekubate kucondza,

emadvodza aso lanetikhundla

atakuwa abulawe yindlala,

tincumbi taso tiyawuhashulwa komela emanti.

₁₄Ngako-ke lithuna selandzise kakhulu

kukhanuka kwalo kudla,

selivule umlomo walo ngalokwengcile;

bahlonishwa baso bayakwehlela khona

kanye nabo bonkhe bantfu baso

nabo bonkhe labajabulako babanga umsindvo lomkhulu.

₁₅Ngako umuntfu uyakwehliselwa phansi,

neluntfu lonkhe lutfotjiswe;

nemehlo alabanekutigcabha ayawutfotjiswa.

₁₆Kodvwa Simakadze longuSomandla utawuphakanyiswa

ngekwehlulela kwakhe lokumsulwa.

Nkulunkulu longcwele utabubonakalisa

bungcwele bakhe ngekulunga kwakhe.

₁₇Timvu tiyakudla

kube shangatsi ngusemadlelweni ato;

emazinyane etimvu ayakudla

emkhatsini wetindzala talabanjingile.

₁₈Maye kulabo labahudvula sono

ngetintsambo temacebo, badvonse bubi

kube shangatsi kungetintsambo tetincola,

₁₉maye kulabo labatsi:

“Nkulunkulu akasheshise,

akaphangise umsebenti wakhe,

khona sitewubona.

Longcwele waka-Israyeli akakwente masinyane

loko latimisele kukwenta,

khona sitekwati.”

₂₀Maye kulabo labatsi lokubi kuhle,

nalokuhle batsi kubi,

lababeka bumnyama bube kukhanya,

babeke kukhanya kube bumnyama,

lababeka lokubabako kube ngulokunongotelako,

babeke lokunongotelako kube ngulokubabako.

₂₁Maye kulabo labatibona

bahlakaniphile emehlweni abo,

batibone bona kutsi bahlakaniphile.

₂₂Maye kulabo labangemachawe

ekunatseni liwayini,

nakulabo labangemachawe

ekudidiyeleni sinatfo lesinemandla,

₂₃labemukela umdizo,

khona batawukhulula labo labanelicala,

kuze babalahle ngelicala labo labate licala.

₂₄Ngako-ke, njengobe lulwimi lwemlilo

lukhotsa tibi,

nanjengobe tjani lobomile bushona phansi,

nabushiswa ngemalangabi,

kanjalo timphandze tabo tiyawubola,

netimbali tabo tiphephuke njengelutfuli;

ngobe bawalile umtsetfo waSimakadze longuSomandla,

bedzelela livi laLongcwele waka-Israyeli.

₂₅Ngako-ke intfukutselo yaSimakadze

yasivutsela sive sakhe;

waphakamisa sandla sakhe

wabashaya wabalahla phansi,

tintsaba tatamatama.

Tidvumbu tabo

taba njengemfuhlululu etitaladini.

Noko ngako konkhe loku

lulaka lwakhe alukagucuki,

sandla sakhe sisephakeme.

₂₆Tive letikhashane uyakutiphakamisela siboniso,

ashaye impembe atibite khona emaphetselweni emhlaba.

Ngekushesha lokukhulu tiyakuta.

₂₇Kute lodziniwe, kute lokhubatelako,

kute lowetelako nome lolalako,

kute lonelibhande lelicekako elukhalweni,

kute lonencabule lenemchilo lodzabukile;

₂₈imicibisholo yabo iyakhalipha,

bonkhe butjoki babo sebugotjiwe,

tinselo temahhashi abo tilukhuni njengematje,

emasondvo etincola tabo temphi

afanana nesiwunguwungwana semoya.

₂₉Kubhodla kwabo kufanana nekwemabhubesi,

yebo, babhodla njengemabhubesi lamancane,

atsi ahhonga abe abamba imphango yawo,

ayetfwale ahambe nayo kubete longayisindzisa.

₃₀Ngalelo langa bayawubhodla etikwa-Israyeli

njengekubhodla kwelwandle.

Umuntfu uyawutsi nakabuka live,

abone bumnyama lobesabekako;

ngisho nekukhanya imbala

emafu ayawukwenta kube bumnyama.