Isaya 43

₁Kodvwa nyalo, naku lokushiwo nguSimakadze,

lowo lowakudala, wena Jakobe,

lowo lowakubumba, wena Israyeli, utsi:

“Ungesabi, ngobe ngikuhlengile,

Ngikubite ngelibito lakho,

wena uwami.

₂Nawudzabula ekhatsi emantini,

mine ngitawuba nawe;

nanawudzabula ekhatsi emifuleni, ingeke ikukhukhule.

Nawuhamba udzabula ekhatsi emlilweni, ngeke ushe,

emalangabi ngeke akulumekele.

₃Ngobe mine nginguSimakadze Nkulunkulu wakho,

Longcwele waka-Israyeli, uMsindzisi wakho,

ngitawuhlawula ngelive laseGibhithe,

ngishintjiselane iKushe neSheba ngawe.

₄Njengobe wena uligugu kimi, uhloniphekile emehlweni ami,

nanjengobe ngikutsandza nje,

ngitawunikela bantfu ngenca yakho,

netive ngitishintjise ngekuphila kwakho.

₅Ungesabi, ngobe nginawe;

bantfwabakho ngitabaletsa kusuka emphumalanga,

ngikubutse wena kusukela enshonalanga.

₆Ngiyawukhuluma nenyakatfo ngitsi: ‘Bakhulule,’

neningizimu ngikhulume kuyo ngitsi: ‘Ungabagodli.’

Buyisani emadvodzana ami kusukela khashane,

nemadvodzakati ami kusukela emikhawulweni yemhlaba,

₇bonkhe lababitwa ngelibito lami,

labo lengabadalela ludvumo lwami,

yebo, labo lengababumba ngabenta.”

₈Letsani labo labanemehlo kodvwa babe batimphumphutse,

labo labanetindlebe kodvwa babe batihhulu.

₉Tonkhe tive tibutsana ndzawonye,

nebantfu bonkhe bayahlangana.

Ngusiphi emkhatsini wetithico tabo lesake

sakukhuluma kucala loku kungakenteki,

samemetela kitsi tintfo takadzeni?

Abaletse bofakazi babo,

batewusikhombisa kahle kutsi bebasho kona,

khona labanye batewuva batsi: “Kuliciniso.”

₁₀Simakadze utsi:

“Nine ma-Israyeli, nibofakazi bami

kanye nenceku yami lengiyikhetsile,

kuze nitewukwati nikholwe kimi,

nicondze nekutsi mine Nginguye.

Ngaphambi kwami kute nkulunkulu lowake wabunjwa,

futsi kute loyawubuye abe khona emvakwami.

₁₁Mine, nginguye Simakadze,

ngaphandle kwami kute umsindzisi.

₁₂Ngembulile, ngasindzisa, ngamemetela,

ngimi, akusiso sithico sebetive lesisemkhatsini wenu.

Nine nibofakazi bami kutsi mine nginguNkulunkulu,”

kusho Simakadze.

₁₃“Yebo, kusukela endvulo solomane Nginguye.

Kute longakhulula esandleni sami.

Nangenta lutfo,

ngubani longakujikisa loko?”

₁₄Naku lokushiwo nguSimakadze,

uMhlengi wenu,

Longcwele waka-Israyeli, utsi:

“Ngenca yenu ngitawutfumela eBhabhulona,

ngibabuyise njengemambuka

bonkhe baseBhabhulona,

ngibabuyise ngemikhumbi

lababetigabatisa ngayo.

₁₅NginguSimakadze, Longcwele wenu,

uMdali wema-Israyeli, iNkhosi yenu.”

₁₆Naku lokushiwo nguSimakadze,

lowo lowavula indlela ekhatsi elwandle,

wenta umkhondvo ekhatsi emantini lanemandla,

₁₇lowadvonsa tincola temphi kanye nemahhashi,

emabutfo nemachawe onkhe kanyekanye

kwalala khona lapho,

akuyiwuphindze futsi kuvuke,

kwacinywa, kwaphuphutfwa njengentsambo yesibane.

₁₈Watsi: “Tikhohlweni tintfo takadzeni;

ningahlali etintfweni lesetengca.

₁₉Bukani la, ngenta intfo lensha!

Manje seyiyavumbuka, aniyiboni yini?

Ngenta indlela ehlane,

nemifula eveni leligagadzekile.

₂₀Tilwane tesiganga tiyangihlonipha,

yebo, timphungutja kanye netahhukulu,

ngobe ngiveta emanti ehlane

nemifula eveni leligagadzekile,

ngentele kunatsisa sive sami lesikhetsiwe,

₂₁sive lengatibumbela sona,

kuze sitewumemetela ludvumo lwami.”

₂₂“Noko awukangibiti, wena Jakobe,

awukatihluphi ngami, wena Israyeli.

₂₃Awukatiletsi kimi timvu temnikelo wakho wekushiswa,

futsi awukangihloniphi nangemihlatjelo yakho.

Angikakwetfwesi umtfwalo ngeminikelo yalokutinhlavu,

nome-ke ngikuhluphe ngekufuna imphepho kuwe.

₂₄Awukangitsengeli nayinye imphepho letsaphukako,

wangete wangenelisa nangemanoni emihlatjelo yakho.

Kodvwa wena ungetfwese umtfwalo ngetono takho,

wangikhatsata ngetikhubekiso takho.

₂₅“Mine, ngimi, losusa tiphambuko takho ngenca yami,

tono takho angiphindzi ngitikhumbule.

₂₆Asibuyekete loko lese kwentekile,

ase sikhulumisane ngalendzaba;

beka indzaba yakho yekuba msulwa kwakho.

₂₇Uyihlomkhulu wekucala wenta sono;

nalabo lababengumlomo wakho bangivukela.

₂₈Ngako-ke nami ngitatihlazisa

tikhulu telithempeli lenu,

ngivele ngitfumele Jakobe ekubhujisweni,

na-Israyeli kutsi edzelelwe.”