Isaya 40

₁“Badvudvuteni, dvudvutani bantfu bami,”

kusho Nkulunkulu wenu.

₂“Khulumani kahle kubaseJerusalema,

nimemetele kubo kutsi

umshikashika wabo wemsebenti sewuphelelisiwe,

nekutsi licala lesono sabo selihlawulelwe,

nekutsi sebatfole ngalokuphindziwe

esandleni saSimakadze ngaletono tabo.”

₃Livi lalomemetako litsi:

“Lungisani indlela yaSimakadze ehlane;

yentani ucondze ekhatsi ehlane

umgwaco lomkhulu waNkulunkulu wetfu.

₄Tonkhe tigodzi tiyawugcwaliswa;

tonkhe tintsaba nemagcuma kuyakwehliswa.

Umhlaba lomagebhugebhu uyawulinganiswa,

ematsafa latigodzigodzi entiwe abeke.

₅Inkhatimulo yaSimakadze iyakwembulwa,

nalo lonkhe luntfu luyakuyibona;

ngobe umlomo waSimakadze sewukhulumile.”

₆Livi litsi: “Memeta.”

Mine ngitsi: “Ngimemete kutsini?”

“Bonkhe bantfu banjengetjani,

nako konkhe kudvuma kwabo kunjengembali yesiganga.

₇Tjani buyabuna netimbali tiyahhohloka,

ngobe umoya waSimakadze uhhusha etikwako.

Ngempela bantfu batjani.

₈Tjani buyabuna,

netimbali tiyahhohloka,

kodvwa livi laNkulunkulu wetfu

limile kuze kube nguphakadze.”

₉Wena loletsa tindzaba letimnandzi eSiyoni,

khuphukela entsabeni lephakeme.

Wena loletse tindzaba letimnandzi eJerusalema,

phakamisa livi lakho, umemete, liphakamise, ungesabi.

Tsanini kuwo emadolobha akaJuda:

“Nangu Nkulunkulu wenu!”

₁₀Bukani, Simakadze longuSomandla ute ngemandla,

nangemkhono wakhe uyabusa.

Bukani, umvuzo wakhe unaye,

nenkhokhelo yakhe ihamba naye.

₁₁Welusa umhlambi wakhe njengemelusi:

Ugona emazinyane akhe ngemikhono yakhe,

awasondzete edvutane nenhlitiyo yakhe;

utihola kahle leto letinemazinyane.

₁₂Ngubani lolinganise emanti

ngentsendze yesandla sakhe,

nome lowatsi ngebubanti besandla sakhe

wemisa imikhawulo yemazulu?

Ngubani lolinganisa lutfuli lwemhlaba ngembita,

nome lowake wakala tintsaba ngesikali,

wakala nemagcuma ngesilinganiso?

₁₃Ngubani loke wacondza Moya waSimakadze,

nome wamfundzisa angumeluleki wakhe?

₁₄Ngubani lowake wabutwa nguSimakadze

kutsi akamkhanyisele lokutsite?

Ngubani lowake wamlayela indlela lengiyo?

Ngubani yena lona lowamfundzisa lwati

nome wamlayela indlela yekucondza?

₁₅Buka, tive tifanana nelitfonsi embiteni,

titsatfwa njengelutfuli esikalweni;

ukala tichingi kube shangatsi

tilutfuli lolucolisakele.

₁₆Lihlatsi laseLebanoni alikaweneli umlilo wemalati,

netifuyo talo atikaweneli umnikelo wekushiswa.

₁₇Tonkhe tive tinjengelite emehlweni akhe,

kuye titsatseka njengentfo lengenamsebenti,

futsi tingaphansi kwelite.

₁₈Ungamfanisa nabani-ke Nkulunkulu?

Ungamlinganisa nasiphi-ke sitfombe?

₁₉Sithico-ke sona, intfo lebunjwa yingcweti,

umfuli nje usembesa ngegolide,

asentele netinketane tesiliva.

₂₀Umuntfu lomphofu lowehluleka kunikela

ngeminikelo lenjena,

ukhetsa lukhuni lolungaboli kalula.

Utifunela ingcweti yembumbi lohlakaniphile

itemmisela sithico lesingeke siwe.

₂₁Anati yini? Anikeva yini?

Anizange senitjelwe yini kona kwasekucaleni?

Anizange nicondzisise yini

kusukela umhlaba wasekelwa?

₂₂Nkulunkulu uhleti esihlalweni sebukhosi

etikwembulunga lengumhlaba,

nebantfu bakhona bafanana netintsetse.

Wendlala emazulu njengempheme,

awendlale njengeliseyili

entele bantfu kutsi batewuhlala kuwo.

₂₃Utsatsa tikhulu atente lite,

ehlise babusi bakulomhlaba babe lite.

₂₄Batsi basengakahlanyelwa,

basengakatjalwa nekutjalwa,

basengakasimi ngisho nasemhlabatsini,

bese uyabaphuphutsa, babune,

kutsi umoya losiwunguwungwane ubaphephule,

ubalahle khashane njengemakhoba.

₂₅“Ningangilinganisa nabani nje mine?

Nome-ke ngubani lofanana nami?”

kusho Yena Longcwele.

₂₆Phakamiselani emehlo enu ezulwini:

Ngubani lowadala konkhe loku?

Nguye lokhipha emabutfo etinkhanyeti ngayinye ngayinye,

atibite tonkhe tinkhanyeti

nguleyo naleyo ngelibito layo.

Ngenca yemandla akhe lamakhulu

nangebukhulu bemandla akhe,

kute nome yinye lesilelako.

₂₇Ukhononelani, wena Jakobe?

Wena Israyeli, usolelani ngekutsi:

“Indlela yami ifihlakele kuSimakadze;

lilungelo lami alikanakeki kuNkulunkulu wami”?

₂₈Awati yini? Awukeva yini?

Simakadze unguNkulunkulu waphakadze,

uMdali wemikhawulo yemhlaba.

Angeke adzinwe, futsi ngeke akhatsale,

nekucondza kwakhe kute longakuphenyisisa.

₂₉Ubapha emandla labo labakhatsele,

awandzise emandla alababutsakatsaka.

₃₀Nalabasha bayaphela emandla, badzinwe,

nemajaha ayakhubatela awe,

₃₁kodvwa labo labetsembele kuSimakadze

batfola emandla lamasha.

Bayawukhuphuka ngemaphiko njengetinsweti,

bayawugijima bangadzinwa,

bayawuhamba bangaphelelwa ngemandla.