Isaya 29

₁Maye kuwe, Ariyeli, Ariyeli,

lidolobha lapho kwafike

kwangenisa Davide khona!

Yengetani umnyaka ngemnyaka,

vumelani umjikeleto wemadzili enu uchubeke.

₂Noko ngiyakuvimbetela i-Ariyeli,

iyawukhala ilile kimi,

iyawuba njengelilati lemlilo.

₃Ngiyawumisa emabutfo ami akutungelete.

Ngiyawukutungeleta ngemibhoshongo,

ngimise tindvonga tekukuvimbetela.

₄Uyawukhuluma sewulele phansi sengikwehlisile;

inkhulumo yakho kuyawuba kuvungama nje kwaselutfulini.

Liphimbo lakho liyawuvakala njengelesipoko emhlabatsini;

livi lakho liyawuvumbuka livela elutfulini.

₅Kodvwa titsa takho letinyenti

titawuba njengelutfuli lwemhlabatsi,

leticumbi tebantfu labanelunya

tiyawuba njengemakhoba lapheshulwa ngumoya.

Ngekushesha, ngekuphatima kweliso

₆Simakadze longuSomandla uyakuta

ngekudvuma nangekutamatama kwemhlaba,

nangemsindvo lomkhulu,

nangesikhukhula semoya nesihhushuhhushu,

nangemalangabi emlilo lodlako.

₇Ngako lemilalandle yato tonkhe tive

lelwa ne-Ariyeli naleyihlaselako

kanye netinqaba tayo, iyivimbetele,

iyawuba njengeliphupho,

nanjengembono ebusuku.

₈Njengemuntfu losabulewe yindlala nakabhudza adla,

kodvwa utsi navuka ekuseni

akhandze indlala imphetse,

nanjengemuntfu nakomile abhudze anatsa,

kodvwa atsi navuka ekuseni

atikhandze afile koma,

kuyawuba njalo-ke nangalemilalandle

yato tonkhe tive letilwa neNtsaba yaseSiyoni.

₉Yetfukani nimangale,

banini timphumphutse nibe ngulabangenamehlo,

dzakwani, kodvwa hhayi ngenca yeliwayini,

yendzani, kodvwa ningayendziswa tjwala.

₁₀Simakadze wehlisele etikwenu butfongo lobukhulu:

Uwavalile emehlo enu, baphrofethi,

utimbonyile tinhloko tenu, baboniswa.

“Labantfu basondzela kimi ngemilomo yabo,

bangihlonipha ngetindzebe temilomo yabo kuphela;

kodvwa tinhlitiyo tabo tikhashane kabi nami.

Kungikhonta kwabo kukwenta nje

leyo mitsetfo lefundziswa bantfu.

₁₄Ngako-ke ngisetawuphindze ngibamangalise labantfu

ngetigigaba etikwetigigaba.

Inhlakanipho yetihlakaniphi tabo itawuphela,

kukhalipha kwemcondvo kwalabanengcondvo

lekhaliphile kutawuphela.”

₁₅Maye kulabo labaya ematfunjini emhlaba,

bayewufihla emasu abo,

bawafihlele Simakadze,

labentela imisebenti yabo ebumnyameni,

bacabange batsi:

“Ngubani nje losibonako?

Ngubani loyawukwati?”

₁₆Niguculela tintfo,

liphansi libheke etulu,

nente shangatsi ngumbumbi longuyena afanana nelibumba!

Loko lokwentiwe, kungasho yini kulomenti wako kutsi:

“Akazange asangente mine”?

Ludziwo lungasho yini kumbumbi walo kutsi:

“Akati lutfo loyo”?

₁₇ILebanoni ingete yaguculwa

yini ngesikhashana lesincane nje ibe yinsimi levundzile,

nensimi levundzile ibonakale seyinjengelihlatsi?

₁₈Ngalelo langa tihhulu tiyakuva

emavi alencwadzi legocotwako;

ekhatsi ebumnyameni kahlongasibi

emehlo etimphumphutse ayawubona.

₁₉Labatfobekile bayawubuye bajabule ngaSimakadze;

labeswele bayawujabula ngaLongcwele waka-Israyeli.

₂₀Labanelunya bayawunyamalala,

baphukuti bayawuphela,

bonkhe labaneliso lengulube bayawuncanyulwa,

₂₁labo labenta umuntfu adliwe licala

ngeligama linye nje,

bambekele lugibe lowo lotsetsa emacala enkhundleni,

ngebufakazi bemanga baphambukise umtsetfocotfo,

badlelele longenacala.

“Jakobe akasayikuba nemahloni;

nebuso babo abusayikuphaphatseka.

₂₃Nababona emkhatsini wabo bantfwababo,

umsebenti wetandla tami,

bayawuligcina lingcwele Libito lami;

bayawubuhlonipha bungcwele baLongcwele wakaJakobe,

bamangale ngaNkulunkulu wema-Israyeli.

₂₄Labo labanhlanhlatselako emoyeni bayawuba nelwati,

labo labakhononako bayakwetsabela kufundziswa.”