Isaya 2

₂Ngemalanga ekugcina

intsaba yelithempeli laSimakadze iyawucina,

ibe ngulephakeme kwendlula tonkhe tintsaba;

iyawuphakanyiswa ibe ngetulu kwemagcuma,

tonkhe tive tiyawubekelela

tiye kuyo tingasakhawuli.

₃Bantfu labanyenti bayawufika batsi:

“Wotani, senyukele entsabeni yaSimakadze,

endlini yaNkulunkulu waJakobe.

Utasifundzisa tindlela takhe,

khona sitewuhamba emikhondvweni yakhe.”

Ngobe umtsetfo uyawuphuma eSiyoni,

livi laSimakadze liphume eJerusalema.

₄Uyakwehlulela emkhatsini wetive,

acatulule imibango yetive letinyenti.

Tona-ke tiyawukhandza tinkemba tato,

titente tibe ngemakhuba,

tikhali tato tibe tikelo tekutsena tihlahla.

Sive singeke sihlasele lesinye ngenkemba,

futsi tive tingeke tisaceceshelwa kulwa imphi.

₅Kota, wenandlu yakaJakobe,

sitewuhamba ekukhanyeni kwaSimakadze.

₆Ubalahlile bantfu bakho,

indlu yakaJakobe,

ngobe sebagcwele bungoma basemphumalanga;

bagcwele nekuphengula njengemaFilisti,

bamdzibimunye nemahedeni.

₇Live labo ligcwele isiliva negolide;

ingcebo yabo ayinasiphetfo.

Live labo ligcwele emahhashi;

tincola temphi tinyenti kakhulu.

₈Live labo ligcwele tithico;

bakhotsamela umsebenti wetandla tabo,

loko lokwentiwe ngemino yabo.

₉Ngako umuntfu utakwehliswa

neluntfu lonkhe lutfotjiswe,

ungabatsetseleli.

₁₀Hambani niyewungena emadvwaleni,

nibhace elutfulini,

nibalekele kwesabeka kwaSimakadze

nebumengemenge bebukhosi bakhe!

₁₁Emehlo ebantfu labatikhukhumetako ayawutfotjiswa,

kutsi kutigcabha kwebantfu kwehliswe;

Simakadze yena yedvwa

uyawuphakanyiswa ngalelo langa.

₁₂Simakadze longuSomandla umise lilanga,

ulibekele bonkhe labatigcabhako nalabatiphakamisako,

nako konkhe lokuphakanyisiwe,

kuze kutfotjiswe;

₁₃lilanga lelibekelwe yonkhe imisedari yaseLebanoni,

lephakeme naletiphakamisako,

futsi libekelwe onkhe ema-okhi aseBhashani;

₁₄lilanga lelimiselwe tonkhe tintsaba letiphakeme,

futsi limiselwe onkhe emagcuma laphakeme;

₁₅lilanga lelibekelwe yonkhe imibhoshongo lephakeme,

futsi libekelwe tonkhe tibondza letitinqaba;

₁₆lilanga lelimiselwe yonkhe imikhumbi yekuhweba,

libekelwe yonkhe imikhumbi lemikhulu

letfwele imicebo nemagugu.

₁₇Kutiphakamisa kwebantfu

kuyakwehliselwa phansi,

nekutigcabha kwebantfu kutfotjiswe;

Simakadze yena yedvwa

uyawuphakanyiswa ngalelo langa,

₁₈netithico tiyawunyamalala tiphele nya.

₁₉Bantfu bayawubalekela emigedzeni yasemadvwaleni,

nasemigodzini lesemhlabatsini,

babalekele kwesabeka kwaSimakadze

nebumengemenge bebukhosi bakhe,

nakasukumela kunyakatisa umhlaba.

₂₀Ngalelo langa bantfu bayawulahla tithico tabo

emagundvwaneni nasemalulwaneni;

yebo, tithico tabo tesiliva

kanye netithico tabo tegolide,

lababetentele kutikhonta.

₂₁Bayawubalekela emihumeni lesemadvwaleni

kanye naseticongweni tetihhehle,

babalekela kwesabeka kwaSimakadze

nebumengemenge bebukhosi bakhe,

nakasukumela kunyakatisa umhlaba.

₂₂Yekelani kwetsembela kubantfu,

emakhaleni abo kunekuphefumula nje.

Empeleni bayini nje?