Isaya 14

₁Simakadze utawubonakalisa sihawu sakhe kuJakobe,

utawuphindza futsi akhetse ema-Israyeli,

awabuyisele eveni lawo.

Betive batawutihlanganisa nawo,

batihlanganise nendlu yaJakobe.

₂Tive tiyakuwatsatsa tiwamikise endzaweni yawo.

Lababendlu yaka-Israyeli bayawutsatsa betive,

babasebentise njengetigcili tabo letidvuna naletisikati

eveni laSimakadze.

Batfumbi babo bayawubenta batfunjwa babo,

babuse etikwebacindzeteli babo.

“Ase nibuke kuphela kwemcindzeteli!

Intfukutselo yakhe seyifike ekugcineni!

₅Simakadze uyephulile indvuku yalababi,

yebo, uyephulile indvuku yebabusi,

₆labahlasele tive ngelulaka,

batigadla ngaphandle kwesihe,

batigcobagcoba phansi ngentfukutselo,

baphekehla lutfutfuva bahlasela.

₇Manje, njengobe umhlaba wonkhe

usaphumulile unekuthula,

sebayakhululeka bahlabele.

₈Ngisho tipheshula nemisedari yaseLebanoni

nayo seyijabula ngawe, Bhabhulona, itsi:

‘Manje, njengaloku sewalaliswa phansi,

sekute ngisho namunye umgawuli lotasijuba.’

₉“Indzawo yalabafile ngaphansi

nayo iyanyakata itsakasele

kutsi ikuhlangabete nawuta kuyo.

Lendzawo ivusa umoya walasebalala

kutsi itekuvusela bonkhe labo bebabaholi emhlabeni,

ibente basukume etihlalweni tabo tebukhosi

bonkhe nalababengemakhosi etive.

₁₀“Bonkhe bayawuphendvula batsi kuwe:

‘Nawe sewubutsakatsaka njengatsi,

nawe sewufanana natsi.’

₁₁Bonkhe bukhatikhati bakho

nekuhlabela kwemahabhu akho

sekwehliselwe phansi endzaweni yalabafile;

timphetfu setilicansi lakho,

netibungu setisembatfo sakho.

₁₂“Maye, lokuwa kwakho ezulwini!

Awu, nkhwekhweti yekusa!

Ndvodzana yentsatsakusa!

Ugeciwe walahlwa phansi,

wena lowake walalisa tive lunja!

₁₃Ukhulume enhlitiyweni yakho watsi:

‘Ngiyakwenyukela etulu ezulwini.

Ngiyawuphakamisa sihlalo sami sebukhosi,

sibe ngetulu kwetinkhanyeti taNkulunkulu.

Ngiyawuhlala esihlalweni sebukhosi

etikwentsaba yenhlanganiso yabonkulunkulu,

esicongweni sentsaba lengcwele.

₁₄Ngiyakwenyukela ngetulu kweticongo temafu.

Ngiyawutenta ngifanane naNkulunkulu

Losetikwako Konkhe.’

₁₅Kodvwa sewehliselwe phansi

endzaweni yalabafile, emajukujukwini emgodzi.

₁₆“Labo labakubonako bayakugolotela

bakucaphele, batsi:

‘Utsi lomuntfu ngabe nguye mbamba

lona lowake wadvungutelisa umhlaba,

wanyakatisa nemibuso?

₁₇Utsi ngabe nguye lowenta umhlaba lihlane,

wabhidlita emadolobha awo,

longazange atikhulule tiboshwa takhe

kutsi tihambe tibuyele emakhaya ato?’

₁₈Onkhe emakhosi etive angcwatjwe ngeludvumo,

nguleyo naleyo ethuneni layo.

₁₉Kodvwa wena ulahliwe wangete wangcwatjwa,

walahlwa njengeligala lelaliwe,

walala encunjini yetidvumbu tebantfu,

lababulewe ngenkemba,

lese bewukele phansi emgodzini wematje.

Njengesidvumbu lesinyatselwa phansi ngetinyawo,

₂₀ungeke usangcwatjwa kanye nalamanye emakhosi,

ngobe ulibhubhisile live lakho,

wabulala bantfu bakini.

“Situkulwane semuntfu lomubi

ngeke kuphindze kukhulunywe ngaso.

₂₁Ngenca yetono taboyisemkhulu

tilungiseleleni kubulala emadvodzana akhe.

Akukafaneli avuke adle lelive njengelifa,

bese akha emadolobha yonkhe indzawo.”

“Ngiyawusukuma ngilwe nabo,

ngiyawubhubhisa iBhabhulona,

ngiyishiye ite libito nemisalela,

ingenabantfwana natitukulwane,”

usho njalo Simakadze.

₂₃“Ngiyawuyenta ibe yindzawo yetikhova,

kube yindzawo lelichaphoti.

Ngiyawuyishanyela ngemshanyelo wembhubhiso,”

usho njalo Simakadze longuSomandla.

“Impela, loku sengikuhlelile,

futsi nakanjani kutakwenteka;

njengobe sengikuhlosile nje,

nakanjani kungeke kugucuke.

₂₅Ema-Asiriya ngitakuwapitjita eveni lami,

ngiwagcobagcobele etintsabeni tami.

Lelijoko lawo belibekwe etikwesive sami

litawususwa etikwaso;

nalomtfwalo besetfweswe wona

utakwetfulwa ususwe etikwaso.

₂₆“Loku-ke kuluhlelo lwami

lolucondzene nemhlaba wonkhe jikelele,

loku-ke kusandla sami leselulelwe etikwetive tonkhe,

ngitehlulele.”

₂₇Ngobe Simakadze longuSomandla sewutimisele ngaloko,

ngubani nje longamvimbela kuloko?

Sandla sakhe selulekile,

ngubani nje longasijikisa?

₂₉“Ningajabuli, nine nonkhe maFilisti,

ngobe nitsi lendvuku leyanishaya seyephukile;

nanjengobe lokumila kusuka emphandzeni

bese kutsela titselo,

kanjalo nasenyokeni kuyawuvela

libululu lelinesihlungu kabi.

₃₀Timbhukudvu tetimphuya tiyawutfola emadlelo,

kutsi labeswele bacambalale phansi baphephile.

Kodvwa titukulwane tenu, maFilisti,

ngiyakutibhubhisa ngendlala lenkhulu

leyawuhhela ngisho nemisalela.

₃₁“Awu, sango, lila!

Awu, dolobha, hhewula!

Ttutfumela, wena Filistiya!

Ngobe emabutfo emphi lenemandla ayeta,

aphuma ngasenyakatfo;

ate ngisho nome linye lisotja leliligwala.

₃₂“Sitawuphendvula sitsini kuletitfunywa

letiphuma kulesive? Sitawusho, sitsi:

Simakadze sewuyakhile yatinta iSiyoni,

ngulapho sive sakhe lebesihlushwa

sitawuphephela khona.”