Habakhuki 3

₂Awu Simakadze,

ngivile ngeludvumo lwakho;

ngimangaliswa tento takho,

wena Simakadze.

Phindza utivusetele nangalamalanga etfu,

tente tatiwe nangaletikhatsi tetfu.

Elulakeni lwakho khumbula umusa.

₃Nkulunkulu uchamuka eThemani,

Longcwele wesuka eNtsabeni iPharani. Cabanga.

Inkhatimulo yakhe isibekela emazulu,

ludvumo lwakhe lugcwalisa umhlaba.

₄Kucwebetela kwakhe

kunjengekuphuma kwelilanga;

kubaneka imisebe etandleni takhe,

lapho kufihlakele khona emandla akhe.

₅Sishayo sihamba embikwakhe,

mashayacotfule wesifo ulandzela

etinyatselweni takhe.

₆Nakema, kunyikanyika umhlaba,

nakabuka, kutfutfumela tive.

Tintsaba takudzala tiyahhihlika,

nemagcuma akadzenidzeni ayagocana.

Tindlela takhe taphakadze naphakadze.

₇Ngabona emathende aseKushani aselusizini,

nemakhaya akaMidiyani ayatfutfumela.

₈Awu, Simakadze,

kungabe bewuyitfukutselele yini imifula?

Kungabe lulaka lwakho belumelene

nemifudlana yini?

Walutfukutselela yini lwandle

ngesikhatsi ugibele emahhashi akho,

netincola takho tekuncoba?

₉Wagwabula butjoki bakho,

wabita imicibisholo leminyenti. Cabanga.

Wadzabula umhlaba ngemifula,

₁₀tintsaba takubona tatfutfumela.

Kwendlula tikhukhula temanti,

kujula kwabhodla,

kwaphakamisela emagagasi ako etulu.

₁₁Lilanga nenyanga kwema emazulwini

ngekumanyatela kwemicibisholo yakho legijimako

nangekubaneka kwekumanyatela kwesikhali sakho.

₁₂Ngelulaka wahambahamba wadzabula umhlaba,

ngentfukutselo wagcobagcoba tive.

₁₃Waphumela kutawukhulula bantfu bakho,

nekutawusindzisa logcotjiwe wakho.

Wambhubhisa umholi waseveni lalababi,

wabahlubula kusukela etinweleni tenhloko

kuye etintwaneni tetinyawo. Cabanga.

₁₄Wamhlaba ngesakhe sikhali enhloko,

ngesikhatsi emabutfo akhe aphutfuma

aphuma atsi atesihlakata,

asivutela tince

shangatsi asatawudla labamphofu lababebhacile.

₁₅Wagcobagcoba lwandle

ngetinselo temahhashi akho,

abhodla emanti lamakhulu.

₁₆Ngeva, nenhlitiyo yami yabhakuta,

netindzebe temlomo wami tavevetela ngalomsindvo,

kubola kwakhasabela ematsanjeni ami,

imilente yami yachachatela.

Noko ngiyakulilindzela ngekubeketela

lilanga lesehlakalo

leliyawusifikela sive lesisihlasele.

₁₇Nome sihlahla semkhiwa singahlumi,

nemagelebisi kute esihlahleni semvini,

nome umncumo ungatseli,

nemasimi angasatitseli tivuno,

nome sekute timvu esibayeni,

netinkhomo sekute esibayeni,

₁₈noko ngitawujabula ngaSimakadze,

ngijabulele Nkulunkulu,

uMsindzisi wami.

₁₉Simakadze loyiNkhosi ungemandla ami;

wenta tinyawo tami tibe njengetenyamatane,

ungenta ngihambe ngiphephile etindzaweni letiphakeme.