Habakhuki 1

₂Awu, Simakadze,

kuyawudzimate kube ngunini

solo ngikhala ngicela lusito,

kodvwa wena solomane ungalaleli?

Kuyawudzimate kube ngunini ngimemeta

ngikhala kuwe ngitsi: “Budlwangudlwangu!”

kodvwa wena ungasindzisi?

₃Wentelani kutsi ngibone bubi lobungaka?

Ukubeketelelani kuhlushwa kwalabacindzetelekile?

Imbhubhiso nebudlwangudlwangu busembikwami njalo;

kukhona kulwa nekubanga lokunyenti.

₄Ngako-ke umtsetfo sewuchwale waze waba butsakatsaka,

akusehlulelwa ngebucotfo.

Lababi behlula labalungile,

kuze kutsi bucotfo bemtsetfo buphanjukiswe.

₅“Bukani tive letinye, nicaphelisise, nimangale nife.

Ngobe ngitakwenta intfo emalangeni enu,

intfo leningasoze nayikholwa,

nome beningatjelwa.

₆Ngobe bukani-ke,

ngivusa baseBhabhulona,

leso sive lesingenamusa, nalesiphulukundlelako,

lesidzabula wonkhe umhlaba sitewuphanga tindzawo tekuhlala

letingasito taso.

₇Basive lesesatjwako nalesitfutfunyelelwako,

bona bangumtsetfo wabo cobo lwabo,

batibabatela bona ludvumo lwabo.

₈“Emahhashi abo agijima kwendlula tingwe,

esabeka kwendlula timphisi ebusuku.

Emasotja abo lagibela emahhashi agijima ashiye inyosi.

Bagibeli babo bemahhashi bachamuka khashane.

Bandiza njengelusweti naluhlwitsa kudla.

₉“Bonkhe beta basahlose kulwa nekubhubhisa.

Emabutfo abo agijima ashulungane

njengemoya waselugwadvule,

abutse batfunjwa njengesihlabatsi.

₁₀BaseBhabhulona basive lesiphukuta emakhosi,

sihlekise ngebabusi.

Siwahleka onkhe emadolobha latinqaba;

sakha lutsango lwemhlabatsi lwekuvimbetela,

siwahlasele siwadle.

₁₁Bese sishulungana sendlulele embili njengemoya,

emadvodza lanemacala,

lamandla awo angunkulunkulu wawo.”

₁₂Awu, Simakadze,

awusiye yini wena wasendvulo?

Nkulunkulu wami, wena Longcwele wami, singeke sife.

Awu, Simakadze,

ubeke bona baseBhabhulona

kutsi behlisele kitsi sijeziso.

Awu, dvwala letfu,

umise bona kutsi batewusishaya.

₁₃Emehlo akho ahlanteke kakhulu kutsi angabuka bubi;

ungeke ukubeketelele kuhlushwa kwalabacindzetelwe.

Manje-ke ubabeketelelani laba labambulutako?

Ubindzeleni ngesikhatsi lababi bamita

labo labalunge kwengca bona?

₁₄Bantfu ubaphatselani njengetinhlanti taselwandle,

babe njengetilwanyakatana

letinwabutelako letingenambusi?

₁₅BaseBhabhulona babadvonsa bonkhe ngemadweba,

bababamba ngemanetha abo, bababutsele ndzawonye,

enetheni labo lekuhudvula;

bajabula ngaloko, futsi batsakasa.

₁₆Ngako-ke benta umhlatjelo emanetheni abo ekuhudvula,

bashisele imphepho emanetheni abo ekuhudvula,

ngobe ngalamanetha abo badla ngaloludzala,

batijabulise ngekudla kudla lokukhetsekile.

₁₇Kungabe batawuchubeka yini,

batfulule emanetha abo,

babhubhise tive ngelunya?