Genesisi 46

₁Ngako Israyeli watsatsa konkhe labenako wahamba, waze wefika eBherisheba, lapho efike wanikela iminikelo kuNkulunkulu wa-Isaka, uyise. ₂Nkulunkulu wakhuluma ku-Israyeli embonweni ebusuku, watsi: “Jakobe! Ye Jakobe!”

Waphendvula watsi: “Ngilapha!”

₃Watsi: “NginguNkulunkulu, Nkulunkulu weyihlo. Ungesabi kwehlela eGibhithe, ngiyawukwenta ube sive lesikhulu khona. ₄Ngitawuba nawe ngehle ngiye eGibhithe, ngiyawuphindze ngenyuke nawe ngikubuyise futsi; Josefa cobo lwakhe nguye loyawuvala emehlo akho ekufeni kwakho ngetandla takhe.”

₅Jakobe wesuka eBherisheba; emadvodzana akhe agibelisa uyise, nebantfwabawo, nebafati bawo etincoleni lababetitfunyelelwe nguFaro kutsi titewubetfwala. ₆Bahamba netinkhomo tabo netimphahla tabo lababetitfole baseseveni laseKhenani. Labaya eGibhithe kwakunguJakobe nentalo yakhe yonkhe: ₇emadvodzana akhe, nemadvodzana awo, nemadvodzakati akhe, nemadvodzakati emadvodzana akhe; tonkhe titukulwane takhe wefika nato eGibhithe.

₈Nankha ema-Israyeli langena eGibhithe naJakobe: Rubeni bekulitubulo lakhe. ₉Emadvodzana aRubeni bekuboHanoki, naPhalu, naHesroni, naKhami. ₁₀Emadvodzana aSimeyoni bekuboJemuweli, naJamini, na-Ohade, naJakhini, naSohari, naShawule, indvodzana leyatalwa ngumfati labengumKhenani. ₁₁Emadvodzana aLevi bekuboGeshoni, naKhohati, naMerari. ₁₂Emadvodzana aJuda bekubo-Era, na-Onani, naShela, naPheresi, naZera; kodvwa Era na-Onani bafela eveni laseKhenani. Emadvodzana aPheresi bekubo-Hesroni naHamule. ₁₃Emadvodzana a-Isakhari bekuboThola, naPhuwa, naJashubi, naShimroni. ₁₄Emadvodzana aZebuloni bekuboSeredi, na-Eloni, naJaleli. ₁₅Lawa-ke ngemadvodzana aLeya, lawatalela Jakobe eMesophothamiya ngaphandle kwaDina. Asawonkhe emadvodzana nemadvodzakati aLeya abengema-33.

₁₆Emadvodzana aGadi bekuboSefoni, naHagi, naShuni, na-Esboni, na-Eri, na-Arodi, na-Areli. ₁₇Emadvodzana a-Asheri bekuboJimna, naJishuwa, naJishvi, naBheriya, naSera labengudzadzewabo. Emadvodzana aBheriya bekuboHebere naMalkhiyeli. ₁₈Lawa-ke kwakungemadvodzana aZilpha, Labani lamnika Leya, indvodzakati yakhe. Watalela Jakobe bantfu lababeli-16.

₁₉Emadvodzana aRakheli, umkaJakobe, bekuboJosefa naBhenjamini. ₂₀Eveni laseGibhithe Josefa watalelwa boManase na-Efrayimu; lamtalela bona Asenathi, indvodzakati ya-Photifera, umphristi wase-Oni. ₂₁Emadvodzana aBhenjamini bekuboBela, naBekheri, na-Ashbeli, naGera, naNamani, na-Ehi, naRoshe, naMuphimi, naHuphimi, na-Adi. ₂₂Lawo-ke kwakungemadvodzana aRakheli lawatalela Jakobe; wamtalela bantfu lababeli-14.

₂₃Indvodzana yaDani bekunguHushimu. ₂₄Emadvodzana aNaftali bekuboJasiyeli, naGuni, naJeseri, naShilemi. ₂₅Lawo-ke kwakungemadvodzana aBilha, Labani lamnika Rakheli, indvodzakati yakhe. Sebabonkhe kwakubantfu labasikhombisa.

₂₆Sebabonkhe bantfu bekutalwa nguJakobe labaya eGibhithe babengema-66, ngaphandle kwabomalukatana bakakhe. ₂₇Emadvodzana aJosefa latalelwa eGibhithe aba mabili; ngako-ke bantfu bemndeni wakaJakobe labehlela eGibhithe babengema-70 sebabonkhe.

₂₈Jakobe watfumela Juda embili kuJosefa kutsi atewubahlangabeta eGosheni. Bahamba baze befika eGosheni. ₂₉Josefa wagibela incola yakhe waphikelela khona eGosheni, wayawuhlangabeta uyise Israyeli. Watsi achamuka nje, Josefa wambona uyise watigaca entsanyeni yakhe, wakhalela kuye sikhatsi lesidze. ₃₀Israyeli watsi kuJosefa: “Cha, sengingafa-ke manje, ngobe sengibubonile buso bakho, futsi sengiyati kutsi usaphila.”

₃₁Josefa wakhuluma kubomnakabo kanye nemndeni wonkhe weyise, watsi: “Kufanele ngenyuke ngiye kuFaro ngimatise kutsi bomnaketfu nemndeni wababe labebaseKhenani, sebefikile, bete kimi. ₃₂Ngitawufike ngimtjele kutsi nine nibelusi betinkhomo, nifuyile, ngimtjele nekutsi nite nayo yonkhe imihlambi yenu, netimvu, netinkhomo, nako konkhe leninako. ₃₃Nasanibita-ke Faro abuta atsi: ‘Yini umsebenti wenu?’ ₃₄nibomphendvula nitsi: ‘Tinceku takho tibelusi betinkhomo kusukela ebusheni bato kuze kube ngunyalo, tsine nabobabe betfu.’ Nanimlandzise kanjalo, utanivumela kutsi nakhe lapha eGosheni.”

Phela Josefa abesho loku, ngobe emaGibhithe abewubukela phansi umsebenti wekwelusa.