Genesisi 42

₁Watsi kube eve Jakobe kutsi kunekudla lokutsengisako eGibhithe, wakhuluma kumadvodzana akhe watsi: “Yini nilibale kubukana emehlweni nje? ₂Ngivile kutsi kunekudla le eGibhithe. Hambani niyesitsengela khona, singaze sife sibulawe yindlala.” ₃Ngako-ke bomnakaboJosefa labalishumi behlela eGibhithe kuyawutsenga kudla. ₄Kodvwa Jakobe akazange amvumele Bhenjamini, labelama Josefa, kutsi ahambe nabo, ngobe phela abesaba kutsi angahle naye avelelwe yingoti.

₅Ngako emadvodzana a-Israyeli ahamba kanye nalabanye batsengi kuyawutsenga kudla, ngobe lendlala yase ilikhungetse lonkhe laseKhenani. ₆Ngaleso sikhatsi Josefa abesangundvunankhulu walo lonkhe live. Kwakunguye labetsengisela bonkhe bantfu kudla. Batsi bomnakaboJosefa nabefika, bamkhotsamela, babhekise buso babo phansi. ₇Kodvwa Josefa wababona kanye nje kutsi bomnakabo, noko watsalalisa nje wenta shangatsi akabati, wabaphatsa njengetihambi wakhuluma kubo ngelulaka, wababuta watsi: “Niphumaphi?”

Bamphendvula batsi: “Siphuma kulela laseKhenani, sitewutsenga kudla.”

₈Nome Josefa abebabona labomnakabo, kodvwa bona babengamboni. ₉Josefa wawakhumbula emaphupho akhe ngabo, wase utsi kubo: “Nine nitinhloli, nitewuhlola tikhala leningalingenela ngato lelive letfu.”

₁₀Bamphendvula batsi: “Cha, nkhosi, tinceku takho titewutsenga kudla. ₁₁Singemadvodzana andvodza yinye; sitinceku takho letetsembekile, asisito tinhloli.”

₁₂Wabaphendvula watsi: “Cha, nitele kutawuhlola tikhala leningalingenela ngato lelive letfu.” ₁₃Batsi: “Nkhosi, tinceku takho tingemadvodzana lalishumi namabili andvodza yinye, eveni laseKhenani. Lomncane kunatsi sonkhe usele nababe ekhaya, lona lomunye-ke akasekho.”

₁₄Josefa wabaphendvula watsi: “Kunjengobe ngishito kutsi nitinhloli. ₁₅Nitawuvivinywa kanjena-ke: Ngifunga Faro, ngitsi ningeke nikhululeke kutsi nihambe, ningakamletsi la umnakenu lomncane. ₁₆Lomunye emkhatsini wenu kufanele amlandze, nine labanye nitawuvalelwa esitokisini kuze kubonakale kahle kutsi kuliciniso yini loko lenikushoko. Nakungenjalo, ngiyanisola, ngifunga Faro, kutsi nine nitinhloli.” ₁₇Wabavalela esitokisini emalanga lamatsatfu.

₁₈Ngelilanga lesitsatfu Josefa wakhuluma nabo watsi: “Mine ngingumuntfu lowesaba Nkulunkulu, yentani naku kuze nitewuphila. ₁₉Naningemadvodza letsembekile, shiyani munye la esitokisini, laba labanye bahambe bayewutsatsa lokudla bakumikise emakhaya enu, ngobe naku indlala ibhokile. ₂₀Kufanele nite naye la kimi lomnakenu lomncane. Ngako-ke nitabe senikhombise ngempela kutsi benikhuluma liciniso, futsi ningeke nisabulawa.”

Bakuvuma loko. ₂₁Bakhuluma bodvwana batsi: “Ase nibheke-ke manje sesiyavuna ngalobubi lesabenta kumnaketfu Josefa. Satsi sesikubona kukhatsateka kwemphefumulo wakhe, nasincenga, satsalalisa sangete samlalela. Ngiko nje sesikulenhlupheko manje.”

₂₂Rubeni wakhuluma watsi: “Angitsi nganitjela kutsi ningamlimati lomfana. Kodvwa nangete nangilalela. Manje sekumele sitilandze ngaleyo ngati yakhe.” ₂₃Babengati kutsi Josefa abeluva lolulwimi lwabo, ngobe kwakukhona labemhumushela. ₂₄Josefa wesuka kubo wayawukhala. Watsi kube acedze kukhala, asakwati kukhuluma kahle, wabuya weta kubo, wafike watsatsa Simeyoni wambopha embikwabo.

₂₅Josefa wayala kutsi bagcwaliselwe kudla emasakeni abo, nemali yalowo nalowo wabo ibuyiselwe esakeni lakhe, banikwe nemiphako yeluhambo lwabo. Konkhe loko kwentiwa. ₂₆BomnakaboJosefa bayikhweta-ke imitfwalo yabo etimbongolweni tabo, besuka bahamba. ₂₇Kwatsi lapho befike baphumula khona, lomunye wabo watsi uvula esakeni lakhe atewupha imbongolo yakhe, wakhandza imali yakhe emlonyeni welisaka lakhe. ₂₈Wakhuluma kubomnakabo watsi: “Imali yami ibuyiselwe nayi emlonyeni welisaka lami.” Tinhlitiyo tabo takhatsateka kakhulu ngaloko, badzimate bakhulumisana batsi: “Yini lena lasentele yona Nkulunkulu?”

₂₉Batsi nabefika kuyise Jakobe eveni laseKhenani bamlandzisa ngako konkhe lokwabehlela, batsi: ₃₀“Lendvodza lengundvunankhulu kulela laseGibhithe yakhuluma natsi ngelulaka, yasitsatsa njengetinhloli telive labo. ₃₁Kodvwa samphendvula satsi: ‘Asisito tinhloli, singemadvodza letsembekile. ₃₂Singemadvodzana andvodza yinye lali-12. Lenye ayisekho, lencane kakhulu isekhaya kubabe, eveni laseKhenani.’ ₃₃Lendvodza lengundvunankhulu isiphendvule yatsi: ‘Naku lengitanihlola ngako kutsi netsembekile: Lomunye wenu utawusala nami, laba labanye benu bahambe bamikise kudla emakhaya, ngobe naku indlala ibhokile. ₃₄Niboletsa lomnakenu lomncane lapha kimi. Ngitawubona ngaloko-ke kutsi nine ningemadvodza letsembekile, anisito tinhloli. Ngitabe sengiyaninika-ke futsi lomnakenu nani nihambe nikhululekile kulelive; kutsi ningakha, nitsenge, nitsengise ngekutsandza.’ ”

₃₅Base bakhumula emasaka abo, kwaba ngulowo nalowo watfola imali yakhe emlonyeni welisaka lakhe. Bona neyise befikelwa kwesaba nekudvumala lokukhulu. ₃₆Uyise wakhuluma kubo watsi: “Maye mine bo! Bonkhe bantfwabami bayangiphelela; Josefa akasekho, naSimeyoni akasekho, kodvwa manje senifuna kutsatsa naBhenjamini. Mine konkhe nje kuyangihlanekela.”

₃₇Rubeni waphendvula uyise watsi: “Nangabe Bhenjamini angikambuyisi, ubobulala lamadvodzana ami lamabili. Myekelele etandleni tami, ngitambuyisa kuwe.”

₃₈Kodvwa Jakobe watsi kuye: “Indvodzana yami angiyivumeli kutsi uhambe nayo, yewukele eGibhithe. Umnakabo ufile, nguye yedvwa losasele. Nakungahle kwenteke avelelwe yingoti nisesendleleni, ngitakufa ngibulawe buhlungu ebudzaleni bami.”